Ақтөбе облысының әкімдігі

Ақтөбе облысы Қазақстан Республикасының солтүстік-батысында орналасқан Батыс Қазақстан өңіріндегі ірі әкімшілік бірліктерінің бірі, шығысында Өлкейек аңғарынан батыстағы Қиылға дейін шамамен 800 шақырым, ал солтүстіктен оңтүстікке дейін 700 шақырымға созылған, жалпы жер көлемі 300 мың км ² жерді алып жатыр.

Тарихи жағынан Ақтөбе облысы Еуропа мен Азия тоғысында орналасқан мәдениеттердің шекаралық аймағы есебінде көпұлттылық, мәдениеттердің байланыстылығы мен конфессияаралық байланыстар сияқты өзіндік ерекшеліктері негізінде қалыптасып дамыды. Аймақ ерекшеліктерінің бірі, оның территориясы арқылы ежелгі заманнан бастап тарих қозғалысының иірімінде ұйыған, жерсінген және араласқан тайпалар мен рулар негізінде мәдениеттер мен этносаралық байланыстарды анықтаған маңызды миграциялық бағыттардың күретамыры (сауда, керуен жолы, жаулап алу бағыттары, қоныс аудару бағыттары және т.б.) өтті.

Бүгінде Ақтөбе облысы батысында Атырау және Батыс Қазақстан облыстарымен, солтүстігінде Ресей Федерациясының Орынбор облысымен, солтүстік-шығысында Қостанай облысымен, шығысы мен оңтүстік шығысында Қарағанды және Қызылорда облыстарымен, оңтүстігінде Қарақалпақстан автономиясымен (Өзбекстан Республикасы) шектесіп жатыр.