Білім туралы құжаттарды қалай апостильдеуге болады

1. Бастауыш, негізгі орта, жалпы орта, техникалық және кәсіптік, орта білімнен кейінгі білім беру ұйымдарынан берілетін білім туралы құжаттарды апостильдеу екі тәсілмен жүзеге асырылады:

• «Азаматтарға арналған үкімет» мемлекеттік корпорациясы» коммерциялық емес акционерлік қоғамы арқылы. Апостиль қоюға өтінімді Халыққа қызмет көрсету орталығында (бұдан әрі – ХҚКО) тапсырған кезде өзіңізбен бірге келесі құжаттар болуы қажет: жеке куәлік; мемлекеттік баж төленгені туралы түбіртек (0,5 айлық есептік көрсеткіш); апостиль қойылатын құжаттың түпнұсқасы. Өтінім ХҚКО-да тапсырылғаннан кейін апостиль қойылған құжатты 15 жұмыс күні ішінде аласыз.
• «Электрондық үкімет» веб-порталы (бұдан әрі – портал): egov.kz арқылы. Электрондық құжат түрінде өтінім берген кезде оған құжаттың электрондық көшірмесін қоса тіркеу, сол жерде 0,5 айлық есептік көрсеткіш мөлшерінде мемлекеттік бажды төлеу және өтінімді ЭЦҚ-мен қол қою қажет, содан кейін 5 жұмыс күні ішінде өтінімді өңдеу туралы хабарлама аласыз. Хабарламада көрсетілген күні ХҚКО-ға барып, өзіңізбен бірге келесі құжаттарды ұсынуыңыз қажет: жеке куәлік; апостиль қойылатын құжаттың түпнұсқасы. Онлайн-өтінім тапсырылғаннан кейін апостиль қойылған құжатты 15 жұмыс күні ішінде аласыз.

2. Орта, техникалық және кәсіптік, орта білімнен кейінгі білім туралы құжаттарды тану екі тәсілмен жүзеге асырылады:

• Мемлекеттік корпорация арқылы жүгінген кезде жауапты құрылымдық бөлімшенің жауапты қызметкері ілеспе хат дайындайды және білім туралы құжатты тану туралы куәлікті Мемлекеттік корпорацияға жібереді. Бұл ретте, көрсетілетін қызметті беруші Мемлекеттік көрсетілетін қызмет нәтижесін Мемлекеттік корпорацияға мемлекеттік қызмет көрсету мерзімі аяқталғанға дейін бір тәуліктен кешіктірмей жеткізуді қамтамасыз етеді.
• портал арқылы жүгінген кезде білім туралы құжатты тану туралы электрондық куәлік электрондық цифрлық қолтаңбамен қол қойылған электрондық құжат нысанындағы сенімхаттың электрондық көшірмесі негізінде көрсетілетін қызметті алушының немесе уәкілетті өкілдің "жеке кабинетіне" жіберіледі.

Білім туралы құжаттарды тану – бұл шетелдік білім беру ұйымдары, оның ішінде олардың филиалдары, сондай-ақ ғылыми орталықтар мен зертханалар берген білім туралы құжаттарды ресми растау;

"Орта, техникалық және кәсіптік, орта білімнен кейінгі білім туралы құжаттарды тану" мемлекеттік көрсетілетін қызметті Қазақстан Республикасы Оқу-ағарту министрлігі құжаттарды танудың тиісті рәсімдерін жүзеге асыру үшін "Жоғары білім беруді дамыту ұлттық орталығы" шаруашылық жүргізу құқығындағы республикалық мемлекеттік кәсіпорны  арқылы көрсетеді.

  Білім туралы құжаттарды тану білім туралы құжаттың түпнұсқалығын анықтау, білім туралы құжатты берген білім беру ұйымында (ғылыми орталықта, зертханада) оны беру кезінде тиісті білім беру қызметін жүзеге асыру құқығының болуын анықтау, қажет болған жағдайда сараптамалық бағалау жүргізу арқылы жүзеге асырылады.

Білім туралы заңдастырылған немесе апостиль қойылған құжаттарды тану туралы өтінішті қарау мерзімі:

-портал арқылы жүгінген кезде - 15 (он бес) жұмыс күні

- Мемлекеттік корпорация бөлімшелеріне жүгінген кезде - 25 (жиырма бес) жұмыс күні

Білім туралы заңдастырылмаған және жарияланбаған құжаттарды тану туралы өтінішті қарау мерзімі:

- портал арқылы жүгінген кезде - 35 (отыз бес) жұмыс күні

- Мемлекеттік корпорация бөлімшелеріне жүгінген кезде - 45 (қырық бес) жұмыс күні

Телнұсқа беру туралы өтінішті қарау мерзімі:

Мемлекеттік корпорация бөлімшелеріне жүгінген кезде - 15 (он бес) жұмыс күні.

Портал арқылы жүгінген кезде - 7 (жеті) жұмыс күні.

Құжаттар топтамасын Мемлекеттік корпорацияға тапсыру

үшін күтудің рұқсат етілген ең ұзақ уақыты - 15 минут;

Көрсетілетін қызметті алушыға Мемлекеттік корпорацияда қызмет көрсетудің рұқсат етілген ең ұзақ уақыты - 15 минуттан аспайды.