Көксу ауданы Қазақ КСР Жоғарғы Кеңесі Президиумының 1944 жылғы 8 мамырдағы Жарлығымен құрылды.
Сол кезде аудан құрамында 1 кенттік және 7 ауылдық округ, 38 шағын колхоз, 1 совхоз, 1 Айнабұлақ МТС-і, Айнабұлақ және Көксу теміржол станциялары, қант зауыты, сондай-ақ 1 орта, 1 жетіжылдық және 13 бастауыш мектеп болды.
1944 жылғы партия конференцияларының тарихи құжаттарында 11721 гектар егістік алқап көрсетілген. 1945 жылдың басында ауданда 4550 бас жылқы, 11182 бас ірі қара, 75227 бас ұсақ мал және 92 бас түйе болған.
Ауданда 18 мектеп болды, оның ішінде 4 орта, 5 толық емес және 9 бастауыш мектеп. Оларда 2310 оқушы білім алды. Мектептерде 154 мұғалім жұмыс істеді, олардың тек 13-і жоғары білімді болды.
1943 жылы 2570 гектар қант қызылшасы егілді. Әр гектардан небәрі 19 центнер өнім жиналды. Кейінгі жылдары ауданның жекелеген шаруашылықтары қант қызылшасының өнімділігін 150-170 ц/га дейін жеткізді.
Ұлы Отан соғысы жылдарында аудан еңбеккерлері танк колонналары мен авиациялық эскадрильялар жасауға 2 млн. рубльден астам қаражат жинады.
1945 жылғы 20 маусымдағы есеп бойынша ауданда 29120 адам тұрды. Жердің жалпы аумағы 641814 гектарды құрады. Оның ішінде 18902 гектар жер жыртылып, себілді, жалпы егістік алқап 13800 га, суармалы жерлер – 11114 га болды. Ауданда негізінен қой, ірі қара және түйе өсірілді. Ауданда 11182 бас ірі қара, 4550 бас жылқы, 75227 бас қой мен ешкі, 21 бас шошқа, 92 бас түйе болды.
Қант зауытының жылдық жалпы өнімділігі 51 мың центнер қантты құрады. Кәсіпорында 500 адам жұмыс істеді. 1944 жылы 28 колхозға қызмет көрсеткен Мукры ауылындағы МТС-те 76 трактор, 29 комбайн, 51 сепкіш, 5 бастырғыш, 42 культиватор болды.
1959 жылы аудан таратылып, 10 жылдан кейін, 1969 жылы қайта құрылды.
Ұлы Отан соғысының алғашқы күндерінен бастап жерлестеріміз «Барлығы майдан үшін, барлығы Жеңіс үшін» ұранымен еңбек етті. Тылдағы еңбек ауыр болғанына қарамастан, қарттар, әйелдер мен балалар Жеңіс күнін жақындату үшін қолдан келгеннің бәрін жасады. 1942 жылдан бастап аудан тұрғындары майданға 11418 дана жылы киім, оның ішінде 2718 пима, 215 қысқа тон, 496 күпәйке, 893 бас киім жіберді. Сондай-ақ басқа да жылы киімдер сатып алуға 100 мың рубль қаражат жіберілді.
Қызыл Армия қорына алғашқылардың бірі болып өз қаражатын «Қызылбұлақ» колхозынан Оразбай Бөкенбаев – 300 мың рубль, «Еңбекшіқазақ» колхозынан Кішім Абданбекова, «Қаражырық» колхозынан Керімбала Сатқынбаева, «Октябрь» колхозынан Әбдіқадыр Байжұманов – 100 мың рубльден жіберді. Жалпы Ұлы Отан соғысы жылдарында аудан тұрғындары танк колонналары мен авиациялық эскадрильялар жасауға 12 млн рубльден астам көмек көрсетті.
Соғыс жылдарында Мұқаш Бабашев басқарған «Еңбекшіқазақ» колхозы алғашқы миллионер шаруашылық болды. 1944 жылы еңбекшіқазақтықтар Қызыл Армия қорына 9 мың пұт астық жіберді. Егер шаруашылықтың 1941 жылғы жылдық табысы 250 мың рубль болса, 1944 жылы бұл көрсеткіш 1 млн. 200 мың рубльге жетті.
Соғыс жылдарында барлық ауыртпалық, әрине, әйелдердің иығына түсті. Олардың қатарында ұйымдастырушылық қабілеттерімен ерекшеленген Рахия Сатқынова, Катеп Смағұлова, Кербез Керімбаева, Кішім Абданбекова, Гүлшара Сейдікожанова, Дина Доненбаева, Керімбала Сатқынбаева, Дәмеш Төлепбергенова сынды азаматшалар ел жадында мәңгі қалды.
Ауданымыздан шыққан көптеген азамат Ұлы Отан соғысы жылдарында ерлікпен шайқасты. Олардың қатарында 28 гвардияшы-панфиловшылар қатарында соғысқан Кеңес Одағының Батырлары Мусабек Сенгірбаев, Әлиасқар Қожабергенов, Иван Шадрин бар. Ал Темірғали Исабаев пен Дмитрий Крахмалев – «Даңқ» ордендерінің кавалерлері.
1950 жылы аудан шаруашылықтары ірілендіріліп, 38 колхоздың орнына 12 колхоз құрылды.
Бүгінде Көксу ауданы Жетісу облысының солтүстік бөлігінде орналасқан. Ауданның аумағы 7079 шаршы км. Аудан орталығы – Балпық би ауылы.
Көксу ауданы солтүстігінде Қаратал ауданымен, шығысында Талдықорған қаласымен, оңтүстігінде Кербұлақ ауданымен, батысында Балқаш ауданымен шектеседі.
Аудан құрамына 10 ауылдық округ: Айнабұлақ, Алғабас, Балпық, Еңбекші, Мұсабек, Қаблиса, Лабасы, Мұқаншы, Мұқыры және Жарлыөзек ауылдық округтері кіреді. Барлығы 34 елді мекен бар.
Ауданда 40,4 мың адам тұрады. Халықтың құрамында 16-дан астам ұлт пен этнос өкілдері бар: қазақтар – 84,8%, орыстар – 9,2%, әзербайжандар – 3,0%, татарлар мен кәрістер – 0,9%-дан, немістер – 0,7%, ұйғырлар – 0,6%, шешендер – 0,4%, өзбектер – 0,1%, украиндар, қырғыздар және гректер – 0,3%-дан, басқалары – 0,1%.
Аудан аумағынан 2 ірі және 7 шағын өзен ағып өтеді. Ауданның негізгі су артериясы – Жоңғар Алатауының батыс беткейлерінен бастау алатын және суармалы егіншіліктің негізгі көзі болып табылатын Көксу өзені.
Аудан суармалы жүйелермен, оның ішінде науалы каналдармен салыстырмалы түрде жақсы қамтамасыз етілген. Суармалы егіншіліктің негізгі көздері – Көксу, Биже және Мұқаншы өзендері. Аудандағы су пайдаланушыларға үш шаруашылықаралық магистральдық канал: Сол жағалау, Бақытжан және Қызылауыз каналдары қызмет көрсетеді.
Ауданның климаты күрт континенттік, кей жерлерде құрғақшылықпен сипатталады. Егіншілік екі агрономиялық аймақта: таулы-далалы және тау бөктеріндегі шөлейтті-далалы аймақта дамыған. Ауданда қарашірігі аз қара топырақ, қара-қоңыр, ашық-қоңыр топырақтар, кәдімгі және ашық сұр топырақтар, шалғынды, шалғынды-батпақты топырақтар және сортаңдар таралған.
Ауданның бай табиғи ландшафты, тиімді орналасуы және облыс орталығына жақындығы оның әлеуметтік-экономикалық дамуына оң ықпал етеді.
Аудан аумағында алтын мен күміске бай «Далабай» бағалы металдар кен орны барланған, сондай-ақ қоңыр көмір қорлары бар.
