БҚО-ДА БАЛЫҚ ШАРУАШЫЛЫҒЫ САЛАСЫНДА МЕМЛЕКЕТТІК ҚОЛДАУ КӨРСЕТУ КЕЗІНДЕГІ БҰЗУШЫЛЫҚТАР АНЫҚТАЛДЫ

Қазақстан Республикасы Бәсекелестікті қорғау және дамыту агенттігінің Батыс Қазақстан облысы бойынша департаменті мемлекеттік қолдау шараларын көрсету кезінде бәсекелестікті қорғау саласындағы заңнаманың сақталуына қатысты «Батыс Қазақстан облысының Табиғи ресурстар және табиғат пайдалануды реттеу басқармасының» қызметіне мониторинг жүргізді.

Мониторинг барысында 2023–2024 жылдары Басқарма тарапынан нарық субъектілеріне субсидия беруден бас тарту фактілері орын алғаны, алайда бас тартудың нақты себептері көрсетілген тиісті хабарламалар жолданбағаны анықталды.

Сонымен қатар, аквамәдениет саласындағы субсидиялау қағидаларына сәйкес, өтініш берушілерге бас тарту себептерінің негіздемесін қамтитын хабарламаларды жолдауы міндетті. Бұл өз кезегінде қабылданған шешімдерге белгіленген тәртіппен шағымдану мүмкіндігін қамтамасыз етеді.

Аталған әрекеттер кәсіпкерлік субъектілерінің мемлекеттік қолдау шараларына тең қол жеткізу қағидатының бұзылуына және бәсекелестіктің шектелуіне әкеп соғуы мүмкін.

Осыған байланысты Басқармаға оның әрекеттерінде (әрекетсіздігінде) Қазақстан Республикасының бәсекелестікті қорғау саласындағы заңнамасын бұзу белгілерінің бар екендігі туралы хабарлама жолданып, алдағы уақытта мұндай бұзушылықтарға жол бермеу жөнінде шаралар қабылдау талап етілді.

Қазіргі уақытта хабарлама толық көлемде орындалды.