Агенттік басшылығы 10 ай ішіндегі сақтандыру секторының даму қорытындыларын ұсынды
ҚР Қаржы нарығын реттеу және дамыту агенттігі Төрағасының орынбасары Мария Хаджиева ҚР Президенті жанындағы Орталық коммуникациялар қызметінде өткен онлайн-брифинг барысында ағымдағы жылдың 10 айында сақтандыру секторының даму қорытындыларын ұсынды.
Бүгінгі күні сақтандыруды дамыту саласындағы Қаржы нарығын реттеу және дамыту агенттігі (бұдан әрі – Агенттік) үшін басым міндеттер тұтынушыларға қызмет көрсету сапасын арттыру, сақтандыру төлемдерінің мөлшерін ұлғайту, азаматтар мен кәсіпкерлер үшін тәуекелдерден қорғау құралы ретінде сақтандыруды қолдану аясын кеңейту болып табылады.
Бүгінгі күні Қазақстанның сақтандыру нарығында 25 сақтандыру ұйымы бар, оның 15-і жалпы сақтандырумен айналысады, ал 10-ы өмірді сақтандыру саласында жұмыс істейді. Сондай-ақ 12 сақтандыру брокері жұмыс істейді. Тұтынушылардың құқықтарын қорғау үшін Сақтандыру төлемдеріне кепілдік беру қоры, сақтандыру омбудсманы институты және Бірыңғай сақтандыру дерекқоры жұмыс істейді. Бұл құрылымдар нарықтың тұрақтылығын қамтамасыз етеді, азаматтардың мүдделерін қорғайды және сақтандыру қызметтерін цифрландыруға ықпал етеді.
«Өмірді сақтандыру» саласы сақтандыру нарығының өсу драйвері болып табылады. Биыл 1 қарашада бұл сала сақтандыру нарығының жиынтық активтерінің ең көп үлесін алады, атап айтқанда 52,5%. Соңғы 5 жылда сала активтері 2 еседен астам өсіп, 1,5 трлн теңгеге жетті. Бұл мемлекеттік субсидиямен МБЖЖ шеңберінде жинақтаушы білім беру сақтандыру өнімі, бірлескен және кейінге қалдырылған зейнетақы аннуитеттері сияқты жаңа әлеуметтік бағдарланған сақтандыру өнімдерін енгізудің арқасында орын алды», – деді М. Хаджиева.
Сонымен бірге жалпы сақтандыру саласында айтарлықтай өсу байқалады. Компаниялардың активтері соңғы бес жылда 56%-ға ұлғайып, 1,4 трлн теңгені құрады, ал сақтандыру төлемдерінің көлемі 70%-ға ұлғайды. Міндетті автосақтандыру, мүлікті ерікті сақтандыру және ауырған жағдайда ерікті сақтандыру жетекші бағыттар болып қалуда.
Цифрлық технологияларды енгізу бойынша көшбасшы болған міндетті автосақтандыруға ерекше назар аударылады. 2019 жылдан бастап осы саладағы барлық шарттар электрондық нысанда жасалады, ал 2024 жылдан бастап сақтандыру жағдайларын онлайн-реттеу, соның ішінде ЖКО-ны оңайлатылған тіркеуге арналған Еурохаттама қолжетімді. Бұл жаңалық төлем процесін едәуір жеделдетеді, оның орташа мерзімі қазіргі уақытта 15 күнді құрайды.
Сонымен қатар Агенттік сақтандыру нарығының әлеуметтік рөліне назар аударады. 2024 жылдан бастап қызметкерлерді жазатайым оқиғалардан міндетті сақтандыру шеңберінде алдын алу және оңалту шараларына төлемдер енгізілді. Бұл шаралар еңбек қауіпсіздігін арттыруға және зардап шеккендердің денсаулығын қалпына келтіруге бағытталған. Зейнетақы аннуитеттік сақтандыруды дамыту маңызды жетістік болды: 2024 жылғы қарашадағы жағдай бойынша азаматтарға өмір бойы төлем алуға мүмкіндік беретін 106 мыңнан астам шарт қолданылады.
Тұтынушыларды сапасыз қызметтер тәуекелдерінен қорғау жөніндегі функцияны Қазақстанда соңғы жылдары белсенді дамып келе жатқан жүктелген сақтандыру орындайды. Соңғы 7 жылда нарықта адвокаттардың, заң кеңесшілерінің, жеке сот орындаушыларының, кеден өкілдерінің, кеден қоймасы иелерінің, медицина қызметкерлерінің кәсіптік жауапкершілігін сақтандыруды, сондай-ақ еңбек мигранттарын медициналық сақтандыруды қоса алғанда, жүктелген сақтандырудың 7 жаңа түрі пайда болды.
«Биыл 23 қазаннан бастап енгізілген медицина қызметкерлерінің кәсіптік жауапкершілігін жүктелген сақтандыруға жеке тоқталғым келеді. Сақтандырудың бұл түрі халықты медицина қызметкерлерінің кәсіби қателіктерінен, медициналық қызмет көрсетудің сапасыздығынан қорғауды күшейтуге бағытталған және пациенттердің көрсетілетін медициналық көмектің сапасына деген сенімін арттыруға мүмкіндік береді. Сақтандыру шарттарын ресімдеу процесін жеңілдету үшін медициналық ұйымдарға сақтандыру шартын жасасуға, ал пациенттерге сақтандыру төлемін электрондық нысанда алуға мүмкіндік беретін Бірыңғай сақтандыру пулының платформасы іске қосылды», – деп хабарлады Агенттік Төрағасының орынбасары.
Биыл 20 қарашадағы жағдай бойынша медицина қызметкерлерінің кәсіптік жауапкершілігін жүктелген сақтандырудың 712 шарты жасалды, олар бойынша 155 150 қызметкердің жауапкершілігі сақтандырылды.
Бүгінгі күні алдағы жарты жылда аяқталуы жоспарланған бірнеше бастамалар іске асырылуда. Ағымдағы бастамалардың қатарында мемлекеттік білім беру жинақтау жүйесінің (МБЖЖ) бағдарламасын кеңейту, өрттен адамдар көп жиналатын объектілер иелерінің жауапкершілігін сақтандыруды қосу, жүктелген сақтандыру сыныптарын одан әрі дамыту, сондай-ақ апатты тәуекелдерден қорғау жүйесін әзірлеу бар. Осы шаралардың барлығы халықтың қаржылық қауіпсіздігін қамтамасыз етуге және сақтандыру жүйесіне деген сенімді нығайтуға бағытталған.
Сыртқы коммуникациялар басқармасы