Бұл туралы Сыртқы коммуникациялар басқармасы мәлім етті.
Қаржы нарығын реттеу және дамыту агенттігі бағалы қағаздар нарығына кәсіби қатысушыларды қадағалап бағалаудың жаңа моделін әзірлеп, оны пилоттық режимде сынақтан өткізді, деп хабарлайды inbusiness.kz сайты.
Жаңа тәсіл тәуекелге бағдарланған қадағалауды дамытуға, инвесторлардың мүдделерін қорғауға және корпоративтік басқару сапасын ескере отырып, нарық қатысушыларын бағалау тиімділігін арттыруға бағытталған.
Қадағалау тәсілдерін жетілдіру қажеттілігі нарықтың кеңеюімен, клиенттік базаның өсуімен және іс-қимыл факторларының маңыздылығы артуымен байланысты. Жаңа модель проблемалық аймақтарды ерте анықтауға, қадағалауды нақты күшейтуге және тәуекелдерді бағалау жүйесін жетілдіру арқылы нарық тұрақтылығын нығайтуға мүмкіндік береді.
Әдіснама халықаралық стандарттарға, соның ішінде IOSCO қағидаттарына және ESMA мен FCA сияқты шетелдік реттеушілердің тәжірибесіне негізделген. Бағалау төрт негізгі бағыт бойынша жүргізіледі: инвесторларды қорғау, корпоративтік басқару, бизнес-модельді талдау және клиенттердің деректері мен активтерін қорғау. Қорытындысында әр қатысушыға рейтинг беріліп, ол қадағалау шаралары мен реттеуді жетілдіру ұсыныстарына негіз болады.
Пилоттық тестілеу барысында бірқатар әлсіз тұстар анықталды. Атап айтқанда, клиенттердің инвестициялық профилін бағалау рәсімдерін жетілдіру қажеттігі, нарықтық манипуляция белгілерін анықтайтын талдауды күшейту және директорлар кеңестерінің тәуекелдерді басқару мен ішкі бақылауға қатысуын арттыру мәселелері атап өтілді.
Жоба Агенттіктің қаржы нарығында қадағалауды жаңғырту жөніндегі ауқымды жұмысының жалғасы болып табылады. Пилоттық кезең нәтижесінде жаңа модельге сәйкес ішкі қадағалау нұсқаулығы әзірленді.
Алдағы кезеңде бұл тәсіл ірі брокерлерге, дилерлерге және инвестициялық портфельді басқарушыларға қолданылады. Жаңа модель Бағалы қағаздар нарығын дамытудың 2030 жылға дейінгі бағдарламасы мен жаңа заңнамалық бастамалармен ұштастырылып, нарықтың ашықтығын, тұрақтылығын және инвесторлар құқықтарын қорғауды күшейтуге ықпал етеді.
Дереккөз: Inbusiness.kz