Меншік иелерінің бірлестігі дегеніміз не

Көппәтерлі тұрғын үйдегі пәтерлер мен тұрғын емес үй-жайлардың меншік иелері үйді басқаруды ұйымдастыру, ортақ мүлікті күтіп-ұстау және оның сақталуын қамтамасыз ету үшін кондоминиум объектісін басқару нысанын таңдауға міндетті.

Қазақстан Республикасының «Тұрғын үй қатынастары туралы» Заңына сәйкес кондоминиум объектісін басқарудың екі нысаны көзделген:

1. Тікелей бірлесіп басқару — пәтерлер мен тұрғын емес үй-жайлардың меншік иелерінің заңды тұлға құрмай кондоминиум объектісін басқаруы.

2. Мүлік иелерінің бірлестігі (МИБ) — пәтерлер мен тұрғын емес үй-жайлардың меншік иелері құратын және мемлекеттік тіркеуден өткеннен кейін заңды тұлға мәртебесіне ие болатын коммерциялық емес ұйым.

Пәтерлер мен тұрғын емес үй-жайлардың саны 36-дан аз көппәтерлі тұрғын үйде тікелей бірлесіп басқару кезінде ағымдағы және жинақ банктік шоттарын ашпай және кондоминиум объектісін басқару субъектісін тартпай басқаруды жүзеге асыруға жол беріледі.

Егер пәтерлер мен тұрғын емес үй-жайлардың саны 36-дан асса, меншік иелері жиналыстың шешімі негізінде басқару субъектісін тартуға міндетті.

Басқару нысанын таңдау, жиналыстар өткізу, МИБ-ті тіркеу, шығыстар сметасын бекіту және міндетті төлемдерді енгізу тәртібі Қазақстан Республикасының заңнамасымен айқындалады.