Егер адам өзінің жеке басын куәландыратын құжаттарының жоқ екендігі туралы мәлімдеген болса, ол туралы мәліметтер оның сөздерімен жазылады және онымен бір жұмыс күні ішінде әңгімелесу жүргізіледі.
Өтінішхат он сегіз жасқа толған адамның отбасының әрбір мүшесінен қабылданады.
Өтінішті қарау рәсімі мыналарды қамтиды:
- пана іздеген адам жүгінген күні электрондық іс басталады;
- 3 күнтізбелік күн ішінде тұлғаға сауалнама жүргізіледі;
- 5 күнтізбелік күн ішінде ҚР Ішкі істер органдарының барлық есептері бойынша, сондай-ақ Бас прокуратураның Құқықтық статистика және арнайы есепке алу жөніндегі комитетінің есептері бойынша тексеру жүргізілуде;
- тексеруді жүзеге асырғаннан кейін 15 күнтізбелік күн ішінде өтініш берушімен сауалнама парағын ресімдей отырып, жеке әңгімелесу жүргізіледі, сондай-ақ міндетті медициналық куәландыруға жолдама беріледі;
- сұхбат жүргізу аяқталғаннан кейін бір күндік мерзімде Ұлттық қауіпсіздік органдарына есепке алу карточкасының ксерокөшірмесін қоса бере отырып, сұрау салу жіберіледі, Ұлттық қауіпсіздік органдары күнтізбелік 30 күн ішінде жауап жібереді;
- жауапты орындаушы жауапты алғаннан кейін 10 күнтізбелік күн ішінде іс материалдарын, фактілерді, алынған мәліметтердің дұрыстығын тексереді, қажет болған жағдайда ҚР мемлекеттік органдарына сұрау салулар жібереді;
- өтінішті зерделеу және ақпарат жинау аяқталғаннан кейін күнтізбелік 10 күн ішінде жауапты орындаушы босқын мәртебесін беру, ұзарту, тоқтату және айыру рәсімін жүзеге асыру жөніндегі комиссияның (бұдан әрі – Комиссия) отырысында қарау үшін материалдар дайындайды.
Өтінішхатты қарау мерзімін ұзарту үшін негіздер болған кезде МЖМБ бастығы комиссияның ұсынымы бойынша тиісті шешім қабылдайды, ол туралы пана іздеген адамға 2 жұмыс күні ішінде хабарланады.
Комиссияның өтінішхатты қарау нәтижелері бойынша МЖМБ бастығы күнтізбелік 1 күн ішінде өтінішхат бойынша шешім қабылдайды.
Қабылданған шешім туралы адам 5 жұмыс күні ішінде босқын куәлігін беру немесе дәлелді бас тарту арқылы хабардар етіледі.
Босқын мәртебесі бір жыл мерзімге беріледі.
Егер оған босқын мәртебесін беруге негіз болған бұрынғы мән-жайлар босқынның шыққан елінде қалса, босқын мәртебесін беру мерзімін бір жылға және одан кейінгі әрбір жылға облыстың, қаланың жергілікті атқарушы органы ұзартады.