Жақын арада "Отбасы банкі" ұлттық даму және қолдау институтына айналады. Бұл, біріншіден, банк функцияларының кеңеюіне, екіншіден, барлық көрсетілетін қызметтердің тереңдетілген онлайн көрсетілуіне және біз жүргізетін барлық операциялар ашықтығының одан да жоғары стандарттарына байланысты үлкен өзгерістер болмақ.
Отбасы банкі тұрғын үйді есепке алуды, қоюды және бөлуді орталықтандырып жүзеге асыратын толыққанды даму және қолдау институты болады.
Қойылған міндеттерді іске асыру үшін қолданыстағы кезектілік жүйесін әкімдіктерден Отбасы банкіне беру, сондай-ақ банк базасында «тұрғын үймен қамтамасыз ету орталығын» құру жоспарлануда, ол тұрғын үйге мұқтаж барлық азаматтар үшін «бір терезе» қағидаты бойынша жұмыс істейтін болады.
Бұл жағдайда азаматтар өздерінің «тұрғын үйге мұқтаж» мәртебесін растау, кезекке тұру, содан кейін несие алу үшін банкке жүгіну үшін бірнеше инстанцияға жүгінудің қажеті жоқ. Банктің дамыған инфрақұрылымы, ақпараттық және технологиялық ресурстары азаматтарды, бірінші кезекте халықтың әлеуметтік осал топтарынан тұрғын үймен қамтамасыз ету процесін жеделдетеді, кезектілікті басқару мүмкіндігін кеңейтеді, тұрғын үйге мұқтаж азаматтардың тұрғын үй алу рәсімін оңтайландырады.
Бұл ретте Банк өзінің негізгі қызметін тұрғын үй құрылыс жинақтары жүйесі шеңберінде жалғастырады.
Естеріңізге сала кетейік, Отбасы банк ұзақ жылдар бойы көптеген мемлекеттік бағдарламалардың, мысалы, «Нұрлы Жер» тұрғын үй құрылысы бағдарламасының, «Нұрлы жол» инфрақұрылымды дамыту мемлекеттік бағдарламасының, «Алматы қаласының жастарын қолдаудың Жол картасының», «Бақытты отбасы» бағдарламасының қатысушы және негізгі операторы болып табылады.