Ауданымыздың төрінде, әсем таудың аңғарында Сұлутөр ауылдық округі
орналасқан. Қысы қарлы, жазы салқын самалды, жері құнарлы округтің
құрамына табиғаты тамаша Көктөбе ауылы да кіреді. Негізінен егіншілікті
кәсіп еткен халқының бірлігі жарасқан.
Өткен ғасырдың басында іргесі қаланған елді мекен Кеңес дәуірінде
қырманында астығы асып тасыған, мыңдаған малы бар дүрілдеген колхоз
болған. Красный октябрь атанған ұжымшарда түрлі ұлт өкілдері біте
қайнасып, бірлікте өмір сүрді. Жалпы округ бойынша 1295 адам тұрады.
1929 жылы Шаршаков Владимир Ильич Краснооктябрь колхозын құрып,
Вавульев И.В., Красников Г.П., Ниязкулов Р. Сарғасқаев С.С., Әден Б.М.,
Ниязалиев Е.Қ., Әден Е.М. сияқты тұлғалар басқарған. 2005 жылы Сұлутөр
ауылдық округі құрылды.
Округте 75 шағын кәсіпкерлік нысаны тіркелсе, 60 шаруа қожалығы бар.
Мемлекеттік қолдау арқасында шаруасын тіктеп, тіршілігін түзеген жандар
да баршылық.
