Қазақстан Республикасының Чех Республикасындағы Елшілігі

Құрметті отандастар, студенттер, чех ресми, іскерлік және қоғамдық топтарының өкілдері!

Сіздерді Қазақстан Республикасының Чех Республикасындағы Елшілігінің ресми сайтында құттықтауға қуаныштымын.

Бүгінде біздің дипломатиялық өкілдігіміз тек мемлекетаралық диалог алаңы ғана емес, сонымен қатар қазақстандық-чехиялық қарым-қатынасқа шынайы қызығушылық танытатын Қазақстан, Чехия және басқа елдердің азаматтарымен байланыс жасаудың ашық арнасы болып табылады. Дәл осы себепті біз өз сайтымызды Елшіліктің қызметі, өзара тиімді қазақстандық-чехиялық ынтымақтастықтағы негізгі оқиғалар, консулдық мәселелер, сондай-ақ бизнес, білім, ғылым, мәдениет пен туризм саласындағы өзара іс-қимыл мүмкіндіктері туралы өзекті ақпараттың қолайлы әрі сенімді көзіне айналдыруға ұмтыламыз.

Қазақстан мен Чехияны саяси деңгейдегі өзара құрмет, сенім және өзара тиімді ынтымақтастыққа ұмтылысқа негізделген серпінді әрі сындарлы диалог ерекшелендіреді. Сауда-экономикалық, инвестициялық, ғылыми-білім беру және мәдени салалардағы байланыстар үздіксіз кеңейіп келеді. Елшілік мемлекеттік институттар, іскерлік қоғамдастық, академиялық орта және елдеріміздің қоғамдық ұйымдары арасындағы тікелей байланыстарды нығайтуға ерекше мән береді, себебі дәл осындай арналар ұзақ мерзімді әріптестіктің берік негізін қалыптастырады.

Қазақстан Республикасы азаматтарының құқықтары мен заңды мүдделерін қорғау біздің жұмысымыздың сөзсіз басымдығы болып қала береді. Біз Чех Республикасында тұратын немесе уақытша жүрген қазақстандық студенттерге, отандық кәсіпкерлер мен отандастарға қажетті консулдық көмек пен туындайтын мәселелерді шешуге жәрдем көрсетуге ерекше көңіл бөлеміз. Сонымен қатар Елшілік Чех Республикасы мен басқа мемлекеттердің азаматтарына Қазақстан Республикасына кіру және онда болу мәселелері бойынша қажетті жәрдем көрсетуге дайын.

Қазіргі Қазақстан ауқымды ішкі өзгерістерді жүзеге асыра отырып, теңгерімді әрі сындарлы сыртқы саясат арқылы өзінің халықаралық рөлін нығайтып, өз елі мен Орталық Азияның тұрақты әлеуметтік-экономикалық дамуына жаңа мүмкіндіктер аша отырып, сенімді түрде алға қарай дамып
келеді. Өз кезегінде, дос Чех Республикасының жетістіктері даусыз. Бүгінде Қазақстан мен Чехия әрқайсысы өз аймағында тұрақтылық, қауіпсіздік және болжамдылықтың тірегі бола отырып, диалог, өзара құрмет пен сындарлы ынтымақтастықты жүйелі түрде қолдап келеді. Дәл осы ортақтық біздің елдеріміздің одан әрі жақындасуына ықпал етіп, халық, бизнес және қоғамдық бастамалар үшін жаңа перспективалар ашады.

Осы сайттың сіздер үшін қажетті ақпарат алудың сенімді көмекшісіне және Елшілікпен әрі қазақстандық дипломаттармен қарым-қатынас жасаудың тиімді құралына айналатынына үміттенемін. Сіздерді Қазақстан мен Чехия үшін өзара қызығушылық тудыратын маңызды оқиғалар, бірлескен жобалар мен іс-шаралар туралы үнемі баяндайтын Facebook, X (Twitter) және Instagram желілеріндегі ресми беттерімізде көргенімізге қуаныштымыз.

Сіздерге амандық, барлық бастамаларыңызда табыс және зор жеке бақыт тілеймін. Қайда жүрсеңіздер де, Қазақстанмен байланысыңыз әрқашан берік болып, бірлескен жетістіктерге жаңа көкжиектер ашсын.

Құрметпен,
Қайрат Әбдірахманов
Қазақстан Республикасының Чех Республикасындағы
Төтенше және Өкілетті Елшісі