Халықты әлеуметтік қорғау саласындағы реттеу және бақылау комитетінің Медициналық-әлеуметтік сараптама басқармасы құрылымдық бөлімшесі ретінде (бұдан әрі – Басқарма)  өз қызметінде Қазақстан Республикасы Еңбек және халықты әлеуметтік қорғау министрлігінің Қазақстан Республикасының Конституциясын, Қазақстан Республикасының Әлеуметтік кодексін, Қазақстан Республикасының Әкімшілік рәсімдік-процестік кодексін, Қазақстан Республикасы мемлекеттік қызметшілерінің Әдеп кодексін, Қазақстан Республикасының «Мемлекеттік көрсетілетін қызметтер туралы», «Сыбайлас жемқорлыққа қарсы іс-қимыл туралы», «Қазақстан Республикасындағы тіл туралы», «Ақпаратқа қол жеткізу туралы», «Қазақстан Республикасының мемлекеттік қызметі туралы», «Құқықтық актілер туралы» заңдарын, Қазақстан Республикасы Премьер-Министрінің орынбасары – Еңбек және халықты әлеуметтік қорғау министрінің 2023 жылғы 29 маусымдағы № 260 «Медициналық-әлеуметтік сараптама жүргізу қағидаларын бекіту туралы» бұйрығын және Қазақстан Республикасының өзге де нормативтік құқықтық актілерін басшылыққа алады.

Басқарма өз құзыреті шегінде:

1) «Мүгедектікті және/немесе еңбек ету қабілетінен айырылу дәрежесін белгілеу және/немесе қажетті әлеуметтік қорғау шараларын айқындау» мемлекеттік қызметін көрсетуді ұйымдастырады және үйлестіреді;

2) медициналық-әлеуметтік сараптаманы куәландырылатын адамның қатысуымен немесе сырттай жүргізу арқылы шығарылған сараптамалық қорытындының негізділігі мен дұрыстығына, мүгедектіктің және еңбек ету қабілетінен айырылу дәрежесінің белгіленуіне, олардың себептерінің, мерзімдерінің, басталу уақытының, қосымша көмек түрлері мен күтімге қажеттіліктің айқындалуына, сондай-ақ мүгедектігі бар адамдарды абилитациялау мен оңалтудың жеке бағдарламаларының әлеуметтік бөлігінің әзірленуіне мониторинг және бақылау жүргізеді;

3) Қазақстан Республикасында медициналық-әлеуметтік сараптама жүргізу және мүгедектігі бар адамдарды әлеуметтік қорғау туралы заңнаманың сақталу жай-күйін сипаттайтын көрсеткіштерді жүйелейді және талдайды, халық арасында түсіндіру және консультациялық жұмыстар жүргізеді, мүгедектігі бар адамдарды әлеуметтік қорғау саласындағы нормативтік құқықтық актілерді жетілдіру жөнінде ұсыныстар енгізеді.

Жүктелген міндеттерге сәйкес заңнамада белгіленген тәртіппен мынадай функцияларды жүзеге асырады:

1) медициналық-әлеуметтік сараптаманы куәландырылатын адамның қатысуымен немесе сырттай жүргізу арқылы мүгедектігі бар адамдарға «Мүгедектікті және/немесе еңбек ету қабілетінен айырылу дәрежесін белгілеу және/немесе қажетті әлеуметтік қорғау шараларын айқындау» мемлекеттік қызметін көрсету бөлігінде Комитеттің аумақтық бөлімшелерінің жұмысын үйлестіру және ұйымдастыру;

2) медициналық-әлеуметтік сараптаманы сырттай жүргізу арқылы мүгедектігі бар адамдарға «Мүгедектікті және/немесе еңбек ету қабілетінен айырылу дәрежесін белгілеу және/немесе қажетті әлеуметтік қорғау шараларын айқындау» мемлекеттік қызметін көрсету бөлігінде сарапшы дәрігерлердің (тәуелсіз сарапшылардың) жұмысын үйлестіру, мониторингтеу және ұйымдастыру;

3) медициналық-әлеуметтік сараптаманы куәландырылатын адамның қатысуымен немесе сырттай жүргізу арқылы шығарылған сараптамалық қорытындының негізділігі мен дұрыстығына, мүгедектіктің және еңбек ету қабілетінен айырылу дәрежесінің белгіленуіне, олардың себептерінің, мерзімдерінің, басталу уақытының, қосымша көмек түрлері мен күтімге қажеттіліктің айқындалуына, сондай-ақ мүгедектігі бар адамдарды абилитациялау мен оңалтудың жеке бағдарламаларының әлеуметтік бөлігінің әзірленуіне бақылау жүргізу;

4) мүгедектікті, еңбек ету қабілетінен айырылуды белгілеудің және мүгедектігі бар адамдарға әлеуметтік қорғау шараларын көрсетудің негізгі көрсеткіштеріне мониторинг жүргізу (тоқсандық және жылдық есептер, талдау);

5) медициналық-әлеуметтік сараптама және мүгедектігі бар адамдарды әлеуметтік қорғау мәселелері бойынша қолданыстағы заңнамаға өзгерістер енгізу жөніндегі аумақтық департаменттердің ұсыныстарына талдау жүргізу және оларды Министрлікке енгізу;

6) мүгедектікті белгілеудің дұрыстығына талдау жүргізу;

7) жеке және заңды тұлғалардың медициналық-әлеуметтік сараптама және мүгедектігі бар адамдарды оңалту мәселелері жөніндегі өтініштерін қарау;

8) Қазақстан Республикасының Әкімшілік рәсімдік-процестік кодексіне сәйкес тыңдауға қатысу;

9) сот процестеріне қатысу (Қазақстан Республикасы Еңбек және халықты әлеуметтік қорғау министрлігі / аумақтық департаменттер). Аумақтық департаменттердің сот процестеріне қатысуы үшін жоғары тұрған орган атынан уәжді ұстанымдар мен пікірлер дайындау;

10) сарапшы дәрігерлерді (тәуелсіз сарапшыларды) «Мүгедектікті және/немесе еңбек ету қабілетінен айырылу дәрежесін белгілеу және/немесе әлеуметтік қорғау шараларын айқындау» мемлекеттік қызметін проактивті түрде сырттай көрсетуге тарту жөніндегі пилоттық жобаны іске асыру, оның ішінде тәуелсіз сарапшылардың тізілімін қалыптастыру және олардың қызметін бағалау жөніндегі іс-шараларды жүргізу;

11) мемлекеттік қызмет көрсету сапасын бақылау жөніндегі бекітілген іс-шаралар жоспарына сәйкес өңірлерге шығу;

12) Қазақстан Республикасы Президенті Әкімшілігінің Азаматтарды қабылдау орталығында / Қазақстан Республикасы Еңбек және халықты әлеуметтік қорғау министрлігінің қоғамдық қабылдау бөлмесінде азаматтарды қабылдауға қатысу;

13) медициналық-әлеуметтік сараптама мәселелері бойынша бұқаралық ақпарат құралдарында сөз сөйлеу, сұхбат беру, баспасөз релиздерін орналастыру. Комитеттің сайтын жиі қойылатын сұрақтар және медициналық-әлеуметтік сараптама бойынша жаңа нормативтік құқықтық актілер туралы өзекті ақпаратпен толықтыру;

14) денсаулық сақтау саласының сарапшыларын тарта отырып, медициналық-әлеуметтік сараптама қызметінің мамандары үшін оқыту семинарларын өткізу (сырттай-проактивті куәландыруға жататын нозологиялық нысандар бойынша медициналық-әлеуметтік сараптама мамандарына арналған онлайн оқыту семинарлары);

15) аумақтық департаменттердің медициналық-әлеуметтік сараптама мамандарының медициналық университеттер базасында біліктілігін арттыруын ұйымдастыру;

16) халық арасында түсіндіру және консультациялық жұмыстар жүргізу;

17) медициналық-әлеуметтік сараптама мәселелері бойынша кеңестер мен алқа отырыстарын өткізу;

18) Қазақстан Республикасының заңдарында, Президенті мен Үкіметінің актілерінде көзделген өзге де функцияларды жүзеге асыру.