Ұшу кезінде багажда қиындықтар туындаса не істеу керек?

Залалды өтеу тәртібі бұзушылықтың сипатына, тасымалдау маршрутына және қолданылатын заңнамаға байланысты.

1. Егер багаж кешіктірілсе

Егер багаж уақытында келмесе, PIR актісін ресімдеп, тасымалдаушыға жүгіну қажет.

Багаждың кешіктірілуіне байланысты қажетті шығындар туындаған жағдайда, шығындарды растайтын чектер мен басқа да құжаттарды сақтаңыз.

Монреаль конвенциясымен реттелетін халықаралық тасымалдау кезінде багаждың кешіктірілуіне байланысты жазбаша наразылық багаж жолаушыға берілген күннен бастап 21 күннен кешіктірілмей тасымалдаушыға жолдануы тиіс.

2. Егер багаж бүлінсе

Тіркелген багаждың бүлінгені анықталған жағдайда, бұл туралы авиакомпанияға дереу хабарлап, тиісті актіні ресімдеу қажет.

Бүлінген жерлерді суретке түсіріп, багаждың құнын және келтірілген залал мөлшерін растайтын құжаттарды сақтау ұсынылады.

Монреаль конвенциясымен реттелетін халықаралық тасымалдау кезінде тіркелген багаждың бүлінуіне қатысты жазбаша наразылық оны алған күннен бастап 7 күннен кешіктірілмей тасымалдаушыға жолдануы тиіс.

3. Егер багаж жоғалса

Монреаль конвенциясымен реттелетін халықаралық тасымалдау кезінде, егер тасымалдаушы тіркелген багаждың жоғалғанын мойындаса немесе багаж келуге тиіс күннен кейін 21 күн ішінде келмесе, жолаушы багаждың жоғалуына байланысты талаптар қоюға құқылы.

Өтемақы мөлшері қолданылатын халықаралық шарттарды, заңнаманы және тасымалдау мән-жайларын ескере отырып айқындалады.

Өтемақы алу үшін қажетті құжаттар

Мынадай құжаттарды дайындау ұсынылады:

• жазбаша өтініш (наразылық);

• рейс туралы мәліметтер және отырғызу талоны;

• багаж биркасы;

• PIR актісі, егер ол ресімделген болса;

• жоғалған немесе бүлінген заттардың тізбесі;

• мүліктің құнын және жұмсалған шығындарды растайтын құжаттар, бар болған жағдайда.

Наразылықты авиакомпанияға қолданылатын тасымалдау қағидаларында көзделген тәртіппен жолдау қажет.

Маңызды: ішкі және халықаралық тасымалдау кезінде наразылық беру мерзімдері әртүрлі болуы мүмкін. Халықаралық тасымалдау кезінде нақты маршрутқа қандай халықаралық шарт қолданылатынын ескеру қажет.