Қыс мезгіліндегі қиын метеорологиялық жағдайларда өзіңізді қалай қорғауға болады

Қыс мезгілінде қатты аяз, боран, қардың қалың жаууы, көктайғақ және көру мүмкіндігінің шектелуі автомобиль жолдарында жүруге қауіпті жағдайлар туғызуы мүмкін.

Жолға шығар алдында ауа райы болжамын, дауылды ескертулердің бар-жоғын және автомобиль жолдарының жай-күйі туралы ақпаратты тексеру қажет. Қолайсыз ауа райы жағдайында мүмкіндігінше алыс сапарлардан бас тарту ұсынылады.

Сапарға дайындық

Жолға шығар алдында мыналар ұсынылады:

1. Автомобильдің техникалық жай-күйін, тежегіш жүйесінің, аккумулятордың, жылыту жүйесінің, жарықтандыру құралдарының және әйнек тазалағыштардың жарамдылығын тексеру.

2. Жанармайдың жеткілікті мөлшерде болуын қамтамасыз ету және маусымға әрі автомобиль өндірушісінің талаптарына сәйкес келетін жанармайды пайдалану.

3. Қысқы шиналардың жай-күйін тексеру.

4. Өзіңізбен бірге қосымша жылы киім, көрпе, ауызсу, ұзақ сақталатын азық-түлік және қажетті дәрі-дәрмектер алу.

5. Алғашқы медициналық көмек қобдишасын, қолшамды, күректі, сүйреу арқанын, авариялық тоқтау белгісін және жарық шағылыстыратын кеудешені дайындау.

6. Ұялы телефонды толық зарядтау және мүмкіндігінше портативті қуаттау құрылғысын алу.

7. Туыстарыңызға немесе жақын адамдарыңызға сапар бағытын және болжамды келу уақытын хабарлау.

Ауа райы мен автомобиль жолдарының жай-күйін қайдан тексеруге болады?

Өзекті ақпарат алу үшін ресми дереккөздерді пайдалану ұсынылады:

• «Қазгидромет» РМК — kazhydromet.kz. Ауа райы болжамдары мен дауылды ескертулер.

• «ҚазАвтоЖол» ҰК» АҚ — qaj.kz. Республикалық маңызы бар автомобиль жолдарының жай-күйі, жол учаскелерінің жабылуы және қозғалысқа қойылған шектеулер туралы ақпарат.

• 1403 байланыс орталығы — республикалық маңызы бар автомобиль жолдарының жай-күйі туралы анықтамалық ақпарат.

Жол қозғалысына ресми шектеулер енгізілген жағдайда белгіленген талаптарды сақтау және жабық жол учаскелеріне шықпау қажет.

Егер жолда боран немесе қатты аяз басталса, не істеу керек?

Ауа райы жағдайлары күрт нашарлаған жағдайда:

1. Жылдамдықты төмендетіңіз, қауіпсіз арақашықтықты сақтаңыз және күрт маневр жасаудан аулақ болыңыз.

2. Қажет болған жағдайда қауіпсіз жерде, мүмкіндігінше жолдың жүріс бөлігінен алыс жерде тоқтаңыз.

3. Авариялық жарық сигналын қосыңыз және қауіпсіз болған жағдайда тоқтаған жерді жол жүрісі қағидаларына сәйкес белгілеңіз.

4. Егер автомобиль бұзылса немесе әрі қарай жүру мүмкін болмаса, жағдай туралы шұғыл қызметтерге хабарлаңыз.

5. Тікелей қауіп болмаған жағдайда автомобиль ішінде қалып, көмекті күтіңіз.

6. Қатты боран кезінде, әсіресе көру мүмкіндігі нашар болған жағдайда, елді мекенді өз бетіңізше іздеу үшін автомобильден шықпаңыз.

7. Ұялы телефонның қуатын үнемдеп пайдаланыңыз және құтқару қызметтерімен байланыста болыңыз.

Маңызды! Егер автомобильді қар басып қалса, иіс газынан улану қаупін ескеру қажет. Пайдаланылған газ шығатын түтік қармен бітеліп қалған жағдайда қозғалтқышты іске қоспаңыз. Автомобиль ішінде ашық отты, дәнекерлеу шамдарын және жану өнімдерін бөлетін басқа да құрылғыларды пайдаланбаңыз.

Қозғалтқышты қосып жылыну қажет болған жағдайда пайдаланылған газ шығатын түтіктің қардан тазартылғанына көз жеткізіңіз, таза ауаның келуін қамтамасыз етіңіз және құтқарушылардың нұсқауларын орындаңыз. Жұмыс істеп тұрған қозғалтқышты бақылаусыз қалдырмаңыз.

Көмек алу үшін қайда жүгінуге болады?

112 — бірыңғай кезекшілік-диспетчерлік қызмет

Төтенше жағдай туындағанда, өмір мен денсаулыққа қауіп төнгенде немесе құтқарушылардың көмегі қажет болғанда 112 нөміріне қоңырау шалыңыз.

Диспетчерге мыналарды хабарлаңыз:

• орналасқан жеріңізді, координаттарыңызды немесе жақын маңдағы бағдарларды;

• оқиғаның мән-жайларын;

• автомобильдегі адамдардың санын;

• балалар мен зардап шеккендердің бар-жоғын;

• автомобильдің жай-күйін және медициналық көмекке қажеттілікті.

103 — жедел медициналық жәрдем

Қатты тоңу, үсік шалу белгілері байқалғанда, есінен тану немесе денсаулық жағдайы күрт нашарлаған кезде 103 нөмірі бойынша жедел медициналық жәрдем шақырыңыз.

1403 — «ҚазАвтоЖол» ҰК» АҚ байланыс орталығы

1403 нөмірі арқылы республикалық маңызы бар автомобиль жолдарының жай-күйі, жол учаскелерінің жабылуы және қозғалысқа қойылған шектеулер туралы ақпарат алуға болады.

Есіңізде болсын: өмір мен денсаулыққа тікелей қауіп төнген жағдайда тек жол жағдайы туралы анықтамалық ақпарат алумен шектелмей, 112 нөміріне хабарласу қажет.