Айыппұлдың 50% төлеп оны қалай өтеуге болады

Айыппұл төлеген адам үшін міндеттемені орындау күні:

• қолма-қол ақшасыз төлемді жүзеге асыру кезінде – банкоматтар немесе электрондық терминалдар арқылы төлемді жүзеге асыру күні;
• оларды бюджетке қолма-қол төлеген жағдайда – тұлғаның банктерге немесе банк операцияларының жекелеген түрлерін жүзеге асыратын ұйымдарға ақша енгізген күні болып табылады.

Банктер және банк операцияларының жекелеген түрлерін жүзеге асыратын ұйымдар төлемдер сомасын:

• төлем карточкасын пайдалана отырып жүргізілетін жағдайларды қоспағанда, салық төлеуші оларға бастамашылық жасаған күні;
• төлем карточкасын пайдалана отырып жүргізілген жағдайда, салық төлеушінің банктік шотынан ақша есептен шығарылған күннен бастап бір операциялық күннен кешіктірмей;
• банктердің немесе банк операцияларының жекелеген түрлерін жүзеге асыратын ұйымдардың кассаларына қолма-қол ақша енгізілген не екінші деңгейдегі банктердің немесе банк операцияларының жекелеген түрлерін жүзеге асыратын ұйымдардың электрондық терминалдары арқылы қолма-қол ақша енгізілген күннен бастап операциялық күн ішінде, бірақ келесі операциялық күннен кешіктірмей бюджетке аударуға міндетті.

Жалпы соманың 50% мөлшерінде әкімшілік айыппұл төлеу құқығын ол тіркелген сәттен бастап 7 тәулік ішінде пайдалануға болады.

Айыппұлды жеңілдікпен төлеу әкімшілік құқық бұзушылық туралы іс бойынша қысқартылған іс жүргізу нысанында қаралады. Ол құқық бұзушылық жасаған адам мынадай шарттарды сақтаған кезде қолданылады:

• құқық бұзушылық жасау фактісін тану;
• айыппұлдың 50% мөлшерін төлеуге келісім;
• ұсынылған дәлелдемелерге шағым жасамау.

7 тәулікті есептеу кезінде мерекелік және демалыс күндері ескерілмейді.

Мысалы, 1 тамыз дүйсенбі күні хаттама берді. Санақ сейсенбі күні 2-ші күннен басталады және жеңілдік демалыс күндерін ескере отырып, 10 тамызға дейін (келесі аптаның сәрсенбісі) қолданылады.

Айыппұл сомасының 50%-ын төлеу мүмкіндігін пайдалану келесі жағдайларда мүмкін емес:

• ескертуден басқа, жазаның басқа түрлері көзделген болса;
• құқық бұзушылық жасаған адамның артықшылықтары мен иммунитеттері бар болса;
• әкімшілік құқық бұзушылық туралы істі мемлекеттік кіріс органдары мен ҚР Ұлттық Банкі қараса.

Құқық бұзушылық жасалған жерде

Құқық бұзушылық болған жерде белгіленген үлгідегі түбіртегі бар әкімшілік құқық бұзушылық туралы хаттаманың көшірмесі тапсырылады және 7 тәулік ішінде санкцияда көрсетілген айыппұл сомасының 50% мөлшерінде айыппұл төлеу құқығы түсіндіріледі.

Көрсетілген соманың 50% мөлшерінде айыппұл төленген жағдайда 7 тәулік ішінде іс мәні бойынша қаралған, шешім – заңды күшіне енген, ал адам әкімшілік жауапкершілікке тартылған болып саналады.

Камералармен және жылдамдық өлшегіштермен тіркелген бұзушылықтар кезінде

Сертификатталған арнайы бақылау-өлшеу техникалық құралдарымен және автоматты режимде жұмыс істейтін аспаптармен тіркелген бұзушылықтардың ресімдеудің ережелері басқа болады.

Қызметкер бейнеде бұзушылық бар екенін растайды және айыппұл төлеу қажеттігі туралы ұйғарым шығарады.

Ұйғарым – тәртіп бұзушыдан айыппұл төлеуді талап ететін құжат.  Ұйғарым түбіртекпен бірге жол бұзушылық тіркелген күннен бастап 10 тәулік ішінде көлік құралының меншік иесіне тапсырыс хатпен жіберіледі.

Сонымен қатар, ол qamqor.gov.kz сайтында жүктеу үшін қолжетімді болады.

Ұйғарымды тиісті түрде табыс ету күні негізгі кезең болып табылады, дәл осы күні айыппұлдың 50%-ын төлеуге болатын 7 тәулік үшін есептеу күні болып табылады.

СМС-хабарлама ұйғарымды тапсыру фактісі болып табылмайды, бұл ұйғарымның бар екендігі туралы хабарлама ғана.

Онлайн-қызмет арқылы айыппұлдың бар-жоғын тексеруге және төлеуге болады

– Әкімшілік айыппұлдар және жол қозғалысы ережелерін бұзғаны үшін айыппұлдарды іздеу және төлеу

Келесі сайттарда да айыппұлдарды тексеруге болады:

• Qamqor сайтында;
• Қазпошта сайтында;
• банк сайттарында және олардың мобильді қосымшаларында.

7 тәулік ішінде айыппұл мөлшері 50% мөлшерінде көрсетіетінін ескеру қажет. 8-ші күні айыппұл, егер ол өтелмеген болса, автоматты түрде толық мөлшерде қойылады.