Жетісу облысында «Сапалы өнім» әлеуметтік сипаттағы жобаны іске асыру жоспарлануда. Бағдарлама ішкі нарықта азық-түлік қауіпсіздігін қамтамасыз етуге бағытталған. Жобаның нақты қалай жұмыс істейтіні туралы Өңірлік коммуникациялар қызметінің баспасөз конференциясында ҚР СИМ Жетісу облысы бойынша сауда және тұтынушылардың құқықтарын қорғау департаменті РММ басшысы Еділ Зайтбеков, Жетісу облысы бойынша техникалық реттеу және метрология комитеті департаментінің басшысы Бибігүл Омарова және Жетісу облысы санитарлық-эпидемиологиялық бақылау департаменті басшысының орынбасары Самат Ахметов айтып берді.
Жетісу облысында тұтынушылардың құқықтарын қорғау саласындағы өтініштер саны артып келеді. 2023 жылғы 1 қазанда 417 өтініш келіп түсті. Жетісу облысының сауда және тұтынушылардың құқықтарын қорғау Департаментінің көмегімен 167 өтініш оң шешілді. Нәтижесінде тұтынушыларға жалпы сомасы 9 706 000 теңге қайтарылды.