Зерттеу қызметін жариялау үшін ұсынылатын басылымдар тізбесіне енгізу үшін басылымға қойылатын талаптар

Зерттеу қызметін жариялау үшін ұсынылатын басылымдар тізбесіне енгізу үшін басылымға қойылатын талаптар

 

1. Қазақстан Республикасы Мәдениет және ақпарат министрінің м.а. 2024 жылғы 17 қазандағы № 488-НҚ «Масс-медиа саласында мемлекеттік қызметтер көрсету қағидаларын бекіту туралы» бұйрығына сәйкес бұқаралық ақпарат құралдары саласындағы уәкілетті органда есепке қою не қайта есепке қою туралы куәліктің болуы.

2. Редакциялық алқаның (редакциялық кеңестің) құрамы: бас редактор, жауапты хатшы, техникалық редактор (қазақ, орыс және шет тілдерінің корректоры), педагогикалық білім беру саласында ғылыми дәрежесі (ғылым докторы, ғылым кандидаты немесе PhD) бар адамдар, «Үздік педагог» конкурсының жеңімпаздары, кемінде 10 жыл жұмыс өтілі бар педагог-шеберлер, әдістемелік орталықтардың/кабинеттердің әдіскерлері.

Редакция алқасы (мүшелері):

- мақалалардың журналдың тақырыптық бағытына сәйкестігін анықтайды;

- мақаланың жаңалығы мен зерттеу сипатын анықтайды;

- мақаланың практикалық маңыздылығы мен өзектілігін анықтайды;

- плагиатқа қарсы тексеру нәтижесін сақтай отырып, мақала авторларының этика нормаларын сақтауын бақылайды (мақала мазмұнында плагиаттың болмауы, мәтіннің түпнұсқалығы кемінде 60%);

- тезистердің логикалық сабақтастығын, мақалада тұжырымдар мен пайымдаулардың болуын, дереккөздерді пайдалануды және библиографиялық тізімді рәсімдеуді бақылайды; 

- мақаланың тілдік және стилистикалық сапасына баға береді.

Жариялау үшін келіп түскен барлық материалдар міндетті сараптамаға (тиісті облыс мамандарының рецензиясына) жатады.

Рецензиялау процесінен кейін редакциялық алқа (редакциялық кеңес) басылымда мақаланы жариялау немесе жарияламау туралы түпкілікті шешім қабылдайды.

3. Бас редактор, рецензенттер мен авторлар арасындағы жанжалдар мен мүдделер қақтығысын шешуге қатысады.

4. Басылымдарға қойылатын талаптар:

  • жариялау этикасын көрсететін журналдың баспа бекіткен редакциялық саясатының (мақсаты, тақырыптық бағыты, мерзімділігі, мақаланы рәсімдеу бойынша авторларға арналған нұсқаулық және қолжетімділік) болуы:
  • редакция алқасымен мақұлданған басылымның тақырыптық бағыты (тақырыптық айдарлары/бағыттары/салалары) болуы;
  • БАҚ саласындағы уәкілетті органмен келісілген басылымның шығу мерзімділігі (ай сайын, тоқсанына бір рет), келісілген мерзімділігі міндетті түрде сақталуы;
  • редакция алқасы әзірлеген және бекіткен мақаланы рәсімдеу бойынша авторларға арналған нұсқаулықтың (авторларға арналған ережелер) болуы;
  • авторлар үшін қолжетімділік/ашықтық – басылымның байланыс ақпаратының (байланыс телефоны, журналдың электрондық поштасы және басылым редакциясының мекенжайы) болуы;
  • фейк ақпараттың таралуына шектеу қою және қадағалау.
  • плагиатты тексерудің лицензиялық жүйесінің (плагиатқа қарсы тексеру бағдарламасы) болуы, оның ішінде халықаралық деректер базасы және жасанды интеллект бойынша тексеру жүйесін пайдалану (қажет болған жағдайда авторға және комиссияға антиплагиат анықтамасын ұсыну)
  • 5. Басылымның таралуы қағаз (баспа өнімі) және (немесе) электронды нұсқада болуы қажет.

ҚР Оқу-ағарту Министрлігі ұсынған басылымдар тізіміне кіргісі келетін басылымдар 2025 жылдың 10 ақпанына дейін Оқу-ағарту министрлігіне ұсынылуы керек:

1)ілеспе хат (қолы мен мөрі бар);

2)есепке қою (қайта есепке алу) туралы куәліктің көшірмесі;

3)растау құжаттары (дипломдардың, сертификаттардың, еңбек кітапшаларының көшірмелері) бар редакциялық алқаның бекітілген құрамы;

4)баспа бекіткен журналдың редакциялық саясаты;

5)плагиатты тексеру қызметтерін көрсетуге арналған шарттың/лицензияның көшірмесі.

6)журналдың соңғы шығарылымының көшірмесі (бар болған жағдайда қағаз немесе электронды форматта).

 

 

 

 

 

Дата публикации
03 февраля 2025