ҰЛЫТАУ ОБЛЫСЫНДА МЕДИЦИНАЛЫҚ ҰЙЫМДАРДЫ ЖАҢҒЫРТУ БОЙЫНША РЕСПУБЛИКАЛЫҚ ЖОБА ЖҮЗЕГЕ АСЫРЫЛУДА

Бейнелер саны: 1

Жарияланған күні: 28 тамыз 2026

 Ұлытау облысында өңірдің басты медициналық орталығы – Жезқазған қаласының Облыстық көпбейінді ауруханасында медициналық ұйымдарды жаңғырту бойынша республикалық жоба жүзеге асырылуда.

2025 жылы мұнда жалпы ауданы 24 мың ш.м-ден асатын 9 қабатты ғимаратқа күрделі жөндеу жұмыстары басталды. Үй-жайлар, инженерлік желілер, операциялық блоктар мен палаталар жаңартылуда. Жұмыстарды 2027 жылы аяқтау жоспарланған. Қазіргі уақытта 6, 7, 8 және 9-шы қабаттар жөндеуден өткізілді. 5-ші қабаттағы жұмыстар аяқталу сатысында. Сондай-ақ, іргелес аумақ абаттандырылатын болады. Жобаның жалпы құны 4,2 млрд теңгені құрайды.

Бұдан бөлек, құны шамамен 2,7 млрд теңге болатын 47 дана заманауи медициналық жабдық сатып алынып, орнатылды. Олардың қатарында томографтар, ангиограф, эндоскопиялық және роботтандырылған жүйелер бар. Онкологиялық қызметті кеңейту мақсатында 100 төсек-орынға арналған жаңа корпус салу жоспарлануда.  Ауруханада медициналық персоналды жоғары технологиялық манекендер, виртуалды модельдер және стандартталған пациенттерді (актерлерді) пайдалана отырып оқытуға арналған заманауи симуляциялық орталық жұмыс істейтін болады. Жаңа құзыреттер орталықтары озық клиникалық тәсілдерді енгізу алаңына айналады. Қазірдің өзінде пульмонология, кардиология және госпитальдық фармация бөлімшелері ашылды. Алдағы уақытта гастроэнтерология және ревматология бөлімшелері өз жұмысын бастайды.

Кадрлық әлеуетті дамытуға ерекше көңіл бөлінуде. Соңғы үш жылда ауруханаға 36 тәжірибелі және жас маман тартылды.

Жаңғырту жұмыстарының нәтижесінде облыстық аурухана жоғары деңгейдегі заманауи медициналық орталыққа айналады. Бұл облыс тұрғындарына өңірден тыс жерлерге шықпай-ақ, жоғары технологиялық және сапалы медициналық көмекті өз жерінде алуға мүмкіндік береді.