АХАТ функциялары Мемлекеттік корпорацияға ауысқанымен қызмет көрсету тәртібі өзгерген жоқ
2023 жылғы 1 шілдеден бастап АХАТ функциялары Мемлекеттік корпорацияға берілді. Бұл ретте азаматтар үшін қызмет көрсету тәртібі өзгерген жоқ. Некені әлі де тіркеу органында қиюға болады.
АХАТ органдары тууды, некені қиюды және бұзуды тіркеуден басқа, акт жазбаларына өзгерістер, толықтырулар, түзетулер енгізуді, оның ішінде атын, әкесінің атын, тегін өзгертуді, әке болуды (ана болуды) анықтауды, бала асырап алуды жүзеге асыратынын атап өтеміз. Бұдан басқа, АХАТ арқылы азаматтық хал актілерінің жазбаларын қалпына келтіруге және жоюға, сондай-ақ, бастапқы және қайталама куәліктерді, анықтамаларды электронды немесе қағаз түрінде алуға өтінім беруге болады.
АХАТ функцияларының ауысуымен қызмет көрсету тәртібі, сондай-ақ, оларды қарау мерзімдері өзгермейді. Тууды, өлімді тіркеу сияқты тегін қызметтер үшін мемлекеттік қызмет көрсету тарифі де өзгеріссіз қалады. Ақылы қызметтерге қосымша құн салығы қосылады, өйткені Мемлекеттік корпорация ҚҚС төлеуші болып табылады. Мысалы, егер бұрын некені тіркеу тарифі 3 450 теңге болса, 1 шілдеден бастап ол 3 874 теңгеге дейін өсті.
АХАТ бөлімдерінің мекенжайлары да өзгеріссіз қалады. Өтініш берген кезде азаматтар салтанатты жағдайда некені тіркеуді таңдай алады.
Айта кетейік, тіркеуші органның қызметтерін АХАТ қызметкерлері ғана көрсетеді. ХҚКО операторларын қоса алғанда, Мемлекеттік корпорацияның басқа қызметкерлері базаға кіре алмайды.