Аймақтың символы – өрік: Алматылық Apricot Fest фестивалінің басталуы
Алматы облысының Ұйғыр ауданында алғашқы аймақтық өрік фестивалі — Apricot Fest өтті. Бұл шараға фермерлер, қолөнершілер, өңдеу өнеркәсібінің өкілдері, туристер және инвесторлар жиналды. Іс-шара аймақтың жазғы туристік күнтізбесінде елеулі оқиғаға айналды. Фестивальге Алматы облыстық мәслихатының төрағасы Қуат Байғоджаев қатысты.
Өткізу орны таңдалуы кездейсоқ емес — Ұйғыр ауданы Қазақстандағы өріктің астанасы саналады. Жалпы 4 095 гектар бақтың 3 100 гектардан астамын өрік алқаптары құрайды. Жыл сайын 22 мың тоннаға дейін өнім жиналады, оның шамамен 4 мың тоннаны Ресей, Қырғызстан және Өзбекстанға экспортталады. Қалғаны ішкі нарықта сатылып, килограммы 250-300 теңге аралығында бағаланады.
Фестивальдің ашылу рәсіміне жергілікті билік, бизнес және қоғамдық ұйымдардың өкілдері қатысты. Облыстық мәслихат төрағасы Қуат Байғоджаев Apricot Fest-тің экотуризмді дамыту және жергілікті экономиканы қолдаудың сәтті үлгісі екенін атап өтті: «Біз экотуризмнен табиғат, жергілікті өнім және мәдени дәстүрлерді біріктіретін перспектива көреміз. Бұл жоба шетелдік кәсіпкерлердің қызығушылығын тудырды — фестиваль барысында Қырғызстан мен Өзбекстан бизнесмендерімен келісімшарттар жасалды».
Ұйғыр ауданының әкімі Бота Елеусізова өз сөзінде өріктің өңір үшін символдық маңыздылығын атап өтті: «Өрік – жай ғана ауыл шаруашылығы дақылы емес, ол ауданымыздың, экономикамыздың және мәдени мұрамыздың символы. Біз Apricot Fest-ті жыл сайын өткізіліп, жаңа туристік тартымдылық нүктесіне айналдыруды жоспарлап отырмыз».
Фестиваль бағдарламасына гастрономиялық аймақтар, жергілікті өнімдер жәрмеңкесі, этно-шоулар және шеберлік сыныптары кірді. Ерекше назар фермерлік өнімдерді насихаттау мен агротуризмді дамытуға аударылды. Алғаш рет өрік баулары ауылшаруашылық алқаптары ретінде ғана емес, сонымен қатар іс-шара туризмі нысандары ретінде қарастырылды.
Жергілікті тұрғындар фестиваль ауылға жаңа тыныс берді дейді. «Ауыл қайта жанданды, адамдар келіп, қызығып, өнімді дәмін татып жатыр – бұған біз көптен зәру едік», — деді ауыл тұрғыны Равиль Анадулаев.
Алматы облысының туризм басқармасы басшысы Қуанышбек Мирамбекұлының айтуынша, 2026 жылдан бастап Apricot Fest фестивалі өрік гүлдеген кезең — сәуір айында өткізілуі жоспарланып отыр. «Көктем – өңіріміз үшін ерекше мезгіл, гүлдеген бақтар тамаша әсер қалдырады. Сәуір айындағы формат фестивальге одан да көп туристерді тартады деп сенеміз», — деді ол.
Алғашқы Apricot Fest – бұл тек өнімнің мерекесі ғана емес, сонымен қатар туризм мен инвестицияның жаңа бағытының бастауы болды. Өрік енді тек экспорттық өнім емес, өңірдің мүмкіндіктері мен қонақжайлығының символына айналды.