«АФМ Online 2025: XXI ғасырдың қаржылық триггерлері» атты ауқымды форум

Мемлекет басшысының «Заң мен тәртіп» тұжырымдамасы аясында Қаржылық мониторинг агенттігі «АФМ Online 2025: XXI ғасырдың қаржылық триггерлері» атты ауқымды форум өткізді, оған еліміз бойынша 15 мыңнан астам азамат қамтылды. Астанада өткен іс-шараға 2300 қатысушы, оның ішінде елорданың бірқатар ұйымдары қызметкерлері мен жастар жиналды. Форум TEDx форматында өтіп, онда Агенттік қызметкерлері нақты өмірден алынған мысалдармен бөлісіп, алаяқтардың арбауына түспеудің жолдары мен лайфхактары туралы айтып берді. Қаржы пирамидалары, интернет-алаяқтық, дропперлер және басқа да қаржылық құқық бұзушылықтар форумның негізгі тақырыптары болды. Іс-шараға 15 танымал миллиондық аудиториясы бар блогерлер қатысып, өздерінің алаяқтармен қалай бетпе-бет келгендері туралы жеке тәжірибелерімен бөлісті. Кең аудиторияны қамту үшін «Патруль» және «Копы» фильмдерінің актерлерінің қатысуымен скетчтер, сондай-ақ YouTube-тағы танымал ПТК арнасы дайындаған қаржы пирамидалары туралы әзіл-сықақ видеосы ұсынылды. Форум YouTube арнасында онлайн көрсетіліп, аудиторияны одан әрі кеңейтуге мүмкіндік берді. Аталған игі шара жылда жалғасын таба бермек.