ҚМА мен БҰҰ Есірткі және қылмыс жөніндегі басқармасы АЖ/ТҚҚ саласындағы ынтымақтастықты дамытуды талқылады / 31.10.2024

БҰҰ-ның Ауғанстан, Орталық Азия, Иран және Пәкістан аумағындағы Есірткі және қылмыс жөніндегі басқармасының жаңадан тағайындалған өңірлік өкілі Оливер Штолпе Қаржылық мониторинг агенттігіне жұмыс сапарымен келді.

Екіжақты кездесу барысында ҚМА Төрағасының орынбасары Қайрат Бижанов кірістерді жылыстатуға және терроризмді қаржыландыруға қарсы іс-қимыл саласында БҰҰ ЕҚБ-мен өзара іс-қимылдың қалыптасқан жоғары деңгейін атап өтті.

Сондай-ақ ол еліміздің ұлттық «жылыстатуға қарсы» жүйесін жетілдіру мақсатында БҰҰ ЕҚБ көрсеткен техникалық және әдіснамалық қолдауы үшін алғысын білдірді.

Кездесу барысында Қ.Бижанов О. Штолпаны виртуалды активтерді құқыққа қарсы мақсаттарда пайдалануды анықтау, есірткінің заңсыз айналымынан ақшаны жылыстатуға қарсы күрес саласындағы Агенттік жүргізіп жатқан жұмыстармен таныстырды. Сонымен қатар, кірістерді жылыстатуға және терроризмді қаржыландыруға қарсы іс-қимылдың ұлттық жүйесін халықаралық стандарттарға сәйкес одан әрі дамыту жұмыстары жайлы айтты.

Қонаққа Қазақстанның «жылыстатуға қарсы» жүйесіне қатысушылардың кадрлық әлеуетін дамыту мәселелері және Агенттігінің AML академиясының қызметі таныстырылды.

Кездесу соңында тараптар жаһандық қаржылық қауіпсіздікті нығайту үшін өзара іс-қимылды одан әрі дамытуға екіжақты ұмтылыстарын атап өтті.

ҚР ҚМА Ресми өкілі

Әлібек Әбділов