Достық ауылдық округі 1986 жылы құрылған. Облыс орталығы Семей қаласына дейінгі қашықтық 25 км. Жердің жалпы алаңы 39564 га. Округ құрамына Шақаман және Достық ауылдары кіреді. Округ бойынша аулалардың жалпы саны 392. Халықтың жалпы саны 1446.
Шақаман: Чекоман) ауылы — Достық ауылдық округінің орталығы. Ауыл Семей қаласынан оңтүстік-шығысқа қарай орналасқан.
Шақаман ауылының тарихы кеңестік кезеңмен тығыз байланысты. 1980-жылдары ауылда жаңа тұрғын үйлер салынып, ел оны «жаңа жақ» деп атай бастады. Осы уақытта ауылдағы негізгі өндіріс ошағы — шошқа кешені (свинокомплекс) болды. Көптеген ауыл тұрғындары сол жерде жұмыс істеді. Сол кезеңде шошқа кешенін сумен қамту мақсатында су құбыры тартылды.
Соңғы жылдары ауылда инфрақұрылымды дамыту жұмыстары қолға алынды. 2025 жылы «Ауыл – Ел бесігі» бағдарламасы аясында ауылдағы Қ. Ахметов көшесіне ұзындығы 1600 метр болатын көше жарығы орнатылды.
Сонымен қатар, ауылда ет өнімдерін терең өңдейтін зауыттың құрылысы басталды. Бұл жобаны «Eurasia Agro Semey» ЖШС жүзеге асырып жатыр. Кешен тәулігіне 35 тонна ет өңдей алады, 1000-нан астам жұмыс орны ашылады деп жоспарланған.
Ауылда 2005 жылдан бері тіркелген мәдениет үйі (клуб) жұмыс істейді. Ол ауыл тұрғындарының бос уақытын ұйымдастырумен және мәдени іс-шаралар өткізумен айналысады.
Шақаман ауылы өзінің кеңестік дәуірден бастау алатын тарихымен ерекшеленеді. Бүгінде ауыл жаңарып, жаңа жобалар мен инфрақұрылымдар арқылы дамып келеді. Халқы еңбекқор, болашағына сеніммен қарайтын елді мекен.