Қазанда тұрғын үйді алып-сату бойынша 41 мың мәміле жасалды

2025 жылғы қазан айында тұрғын үйді сатып алу-сату бойынша 41 259 мәміле тіркелген, оның ішінде жеке үйлер бойынша – 8 717 және көппәтерлі үйлердегі пәтерлер бойынша – 32 542 мәміле жасалды. 2025 жылғы қыркүйекпен салыстырғанда (41 313) тұрғын үйді сатып алу-сату мәмілелерінің саны 0,1%-ға азайды. Мәмілелер саны бойынша Астана (8 945 – 21,7%) және Алматы (7 868 – 19,1%) қалалары, сонымен қатар, Қарағанды облысы (2 982 – 7,2%) көш бастап тұр. Мәмілелер саны Ұлытау облысында ең аз – 327 мәміле (0,8%).

2025 жылдың қыркүйегімен салыстырғанда қазанда мәмілелер санының ең көп өсімі Қостанай облысында (+15,8%), Шымкент қаласында (+7,7%) және Алматы облысында (+7,4%) байқалды. Ал бір айдағы ең көп төмендеу Қызылорда облысында (-28,4%), Алматы қаласында (-11,2%) және Ақтөбе облысында (-5,2%) орын алды.

Көппәтерлі үйлердегі тұрғын үй мәмілелер саны бір айда 0,3%-ға (110 мәмілеге) азайған. 2025 жылдың қазан айында пәтерлер бойынша барлығы 32 542 мәміле жасалды, бұл мәмілелердің жалпы санының 78,9%-ы. Көппәтерлі үйлердегі тұрғын үй саудасының негізгі үлесі Астана (27%), Алматы (22,2%) қалаларына және Қарағанды облысына (7,8%) тиесілі. Бөлмелер саны бойынша

2 бөлмелі пәтерлер сатылымы басым болды, 2025 жылдың қазан айында олар бойынша 12 399 мәміле ресімделген.

2025 жылдың қыркүйек айымен салыстырғанда қазанда жеке тұрғын үйлер бойынша мәмілелер саны 0,6%-ға (56 мәмілеге) өсті. Қазанда барлығы 8 717 мәміле тіркелген. Жеке тұрғын үйлер бойынша мәмілелер санының ең көп өсімі Қостанай (+18,4%), Шығыс Қазақстан (+16,5%) және Батыс Қазақстан (+11%) облыстарында байқалды. Ал бір айдағы ең көп төмендеу Ұлытау  (-15,9%), Қызылорда (-10,7%) және Қарағанды (-8,3%) облыстарында орын алды.

Былтырғы тиісті айымен салыстырғанда мәміле саны 5,4%-ға өскен (2024 ж. Қазан - 39 143). Мәмілелер санының ең жоғарғы өсімі Астана қаласында (27,9%) байқалды, ең үлкен төмендеу – Ұлытау облысында (-38%). 2025 жылдың қаңтар-қазан айларындағы мәмілелер санын 2024 жылғы қаңтар-қазан айларындағы мәмілелер санымен салыстырғанда 3,5%-ға өскен.

Бір айдың ішінде (2025 жылғы қазан 2025 жылғы қыркүйекке)  жаңа тұрғын үйді сату – 1%, пәтерлерді қайта сату бағасы 0,9% өсті. Абаттандырылған тұрғын үйді жалға алу төлемі 1,2% қымбаттады.

ҚР СЖжРА Ұлттық статистика бюросы тұрғын үй бағасы бойынша ай сайын мониторинг жүргізеді. Баға индекстері облыс орталықтары мен Астана, Алматы, Шымкент қалалары бойынша іріктелген байқау деректері негізінде қалыптастырылады. Жаңа тұрғын үйлер бойынша ақпарат сату бойынша операциялар жүргізетін құрылыс компанияларынан жиналады, бұл ретте пәтердің бастапқы және алдын ала таза әрленгендегі бағасы ескеріледі. Пәтерлерді қайта сату және жалға алу бойынша деректер интернетте, бұқаралық ақпарат құралдарында орналастырылатын хабарландырулар негізінде жиналады. Бағаларды есептеу кезінде бір, екі, үш бөлмелі пәтерлер бойынша ұсыныстар есепке алынады.