ҚР АШМ Жер ресурстарын басқару комитетінің Атырау облысы бойынша жер ресурстарын басқару департаменті ауыл шаруашылығы тауарын өндірушіге қатысты жоспардан тыс тексеру жүргізді.
Тексеру барысында Қызылқоға ауданында орналасқан, шаруа қожалығын жүргізу үшін берілген жалпы алаңы 500 гектар ауыл шаруашылығы мақсатындағы жер телімінің нысаналы мақсатқа сай пайдаланылмағаны анықталды.
Заң бұзушылықтарды жою мақсатында жер пайдаланушыға тиісті нұсқама берілді. Алайда нұсқама орындалмағандықтан, аталған департамент Атырау облысының мамандандырылған ауданаралық экономикалық сотына талап арыз берді.
Сот талқылауының қорытындысы бойынша департамент талабы толық қанағаттандырылды. Нәтижесінде жер телімі мемлекет меншігіне қайтарылды.
Ауыл шаруашылығы мақсатындағы пайдаланылмай жатқан немесе нысаналы мақсатқа сай пайдаланылмаған жерлерді анықтау және мемлекет меншігіне қайтару жұмыстары жалғасуда.
Қазақстан өңірлерінде жемшөп дайындау науқаны жалғасуда. Облыстар әкімдіктерінің жедел мәліметтеріне сәйкес, ауыл шаруашылығы тауарын өндірушілер алдағы қысқы мал қыстату кезеңіне жоспарланған көлемнің 67%-ын құрайтын барлық түрдегі 27,9 млн тонна жемшөп дайындады.
Оның ішінде 22,8 млн тонна шөп, немесе жоспардың 89%-ы, 2,1 млн тонна пішендеме (90%), 1 млн тонна құрама жем, 446,2 мың тонна сүрлем және 1,5 млн тонна сабан дайындалды.
Қысқы мал қыстату кезеңін тұрақты өткізу және сақтандыру қорын қалыптастыру мақсатында «Азық-түлік келісімшарт корпорациясы» акционерлік қоғамы 201,3 мың тонна астық көлемінде жемшөп қорын қалыптастырды. Қажет болған жағдайда бұл резерв ауыл шаруашылығы тауарын өндірушілерді жемшөп ресурстарымен қамтамасыз етуге пайдаланылады.
Еліміздің барлық өңірлерінде науқан қарқынды жалғасуда.
Ауыл шаруашылығы министрлігі өңірлер әкімдіктерімен бірлесіп, жемшөп дайындау науқанының барысын бақылауда. Жүргізіліп жатқан мониторинг және резервтерді уақтылы қалыптастыру мал шаруашылығы қожалықтарын қажетті жемшөп қорымен қамтамасыз етуге және алдағы қысқы мал қыстату кезеңін тиянақты өткізуге бағытталған.
Қазақстанда мал шаруашылығын дамытудың Кешенді жоспарын іске асыру жалғасуда.
«Жыл басынан бері отандық мал шаруашылығы тауарын өндірушілер 30 мыңнан астам асыл тұқымды ірі қара сатып алды. Оның 3,5 мыңнан астамы алыс шетелдерден әкелінді. Жұмыс жалғасуда», – деді ҚР Ауыл шаруашылығы министрлігі Мал шаруашылығы департаментінің директоры Бағлан Аймурзаев.
21 тамызда Германиядан жоғары өнімді ірі қараның кезекті легі жеткізілді. Голштин тұқымының қашарлары Қостанай облысындағы «ДК Мақсат KZ» сеоіктестігінің жаңа сүт-тауарлы фермасының мал басын толықтыруға арналған.
Ветеринариялық және кедендік бақылаудан өткеннен кейін мал арнайы көлікпен Владимир ауылына жеткізіліп, міндетті карантиннен өткізіледі.
«ДК Мақсат KZ» серіктестігі жобасы 400 сауын сиырға арналған сүт-тауарлы фермасын құрмаш. Жобаның жалпы құны – 3,2 млрд теңге.
Инвестициялық жоба Солтүстік Қазақстан облысының тәжірибесін тарату бағдарламасы аясында іске асырылуда.
Ферма заманауи автоматтандырылған жабдықтармен жарақтандырылуда. Сауын блогы бір мезгілде 40 басты саууға есептелген және «Параллель» типті жүйемен жабдықталған.
Табынды басқару және малдың жай-күйін бақылау үшін Afimilk жүйесі қолданылады. Жүйе мал басын автоматты түрде есепке алуға, жеке қадамөлшегіштердің көмегімен малдың белсенділігін бақылауға, сондай-ақ өндірістік көрсеткіштерді қадағалауға мүмкіндік береді.
2026 жылдың соңына дейін кәсіпорын қалған мал басын кезең-кезеңімен әкеліп, ферманы 400 басқа дейін толықтыруды мақсат етіп отыр.
Айта кетейік, Қостанай облысында 2023–2026 жылдары сүт-тауарлы фермаларын салу және дамыту бойынша жалпы қаржыландыру көлемі 39,2 млрд теңгені құрайтын 13 инвестициялық жоба іске асырылады.
Жылына 46 мың тонна сүт өндіретін 7 заманауи ферма пайдалануға берілді.
Жалпы, Қазақстан бойынша бағдарлама аясында сүт-тауарлы фермаларын салу және жаңғырту бойынша 97 жоба қаржыландырылды. Олардың жиынтық жобалық қуаты жылына 559,6 мың тонна сүтті құрайды.
Оның ішінде 71-і пайдалануға берілді. Тағы 26 жоба іске асырылу сатысында.
Асыл тұқымды мал импортының және ел ішінде асыл тұқымды мал сатып алудың артуы отандық мал шаруашылығының генетикалық әлеуетін арттырудың және сүтті мал табынының өнімділігін жоғарылатудың маңызды құралдарының бірі болып табылады.
Осындай инвестициялық жобаларды іске асыру, асыл тұқымды ірі қара мал басын көбейту және заманауи технологияларды енгізу мал шаруашылығының тиімділігін арттыруға, отандық сүт өндірісін ұлғайтуға және елдің азық-түлік қауіпсіздігін нығайтуға бағытталған.
Жетісу облысында өсімдік шаруашылығын әртараптандыру аясында майлы дақылдардың егіс алқабы едәуір ұлғайтылды.
Аграршылар мемлекеттік қолдау шараларын белсенді пайдаланып келеді. Негізгі тетіктерінің бірі – КДжЕЖ бағдарламасы бойынша жеңілдікті қаржыландыру. Сонымен қатар шаруашылықтар ауыл шаруашылығы техникасын жеңілдетілген шарттармен сатып алып, тұқым мен тыңайтқыш алу үшін мемлекеттік субсидияға жүгіне алады.
Биыл өңірде майлы дақылдар 106,6 мың гектар алқапқа егілді. Оның 34,6 мың гектарын күнбағыс алқабы құрайды.
Оның жарқын дәлелі Кербұлақ ауданындағы «Абыхан» шаруа қожалығының тәжірибесі. Бір жылдың ішінде шаруашылық күнбағыс егілетін алқап көлемін төрт есеге – 100 гектардан 400 гектарға дейін ұлғайтты.
Күнбағыс тәлімі «Суматра» және «Пионер» будандарын пайдалану арқылы өсіріледі. Өткен жылы бұл дақылды өсіру бойынша алғашқы тәжірибе жүргізіліп, гектарынан 2 тонна өнім алынды.
«Абыхан» шаруа қожалығы «Жеңілдікті лизинг» бағдарламасына белсенді қатысады.
«Жеңілдікті лизингтің арқасында қажетті техниканы алып жатырмыз. Әр жылдары КАМАЗ көліктерін, комбайндар мен МТЗ тракторларын алдық. Жақында К-700 тракторларын сатып алдық. Бүгінде шаруашылықта 115 бірлік ауыл шаруашылығы техникасы бар. Сонымен қатар тұқым мен тыңайтқыш сатып алуға субсидия аламыз. Жалпы, мемлекеттік қолдаудың жүйелі түрде көрсетілуі бізге перспективалы дақылдарды игеріп, өндірістік әлеуетімізді кезең-кезеңімен арттыруға мүмкіндік береді», – деді шаруа қожалықтың басшысы Серік Абыханов.
Сонымен қатар облыста ауыл шаруашылығы өнімдерін өңдеу саласы да дамып келеді. Майлы дақылдар өндірісінің ұлғаюы отандық кәсіпорындар үшін қосымша шикізат базасын қалыптастырып, ауыл шаруашылығы дақылдарын өсіруден бастап, оларды өңдеу және қосылған құны жоғары өнім шығаруға дейінгі толық өндірістік циклді дамытуға жол ашады.
Облыста күнбағыс жинау науқанын қазан айында бастау жоспарланып отыр.
Жиналған өнімді отандық өңдеу кәсіпорындарына, оның ішінде Талдықорған қаласындағы «Агрокомплекс «Жетысу Мажико» серіктестігіне жіберу жоспарлануда.
Ираннан және Ресейден Қазақстанға әкелінген салат, арпа және қызанақ өнімдері партиясынан қауіпті карантиндік нысандар анықталды. Фитосанитариялық бақылау нәтижесінде залалданған өнімдерді ел аумағына өткізуге жол берілмеді.
ҚР АШМ АӨК-дегі мемлекеттік инспекция комитетінің инспекторлары мемлекеттік шекарада фитосанитариялық бақылау жүргізу барысында бірқатар заң бұзушылықтарды анықтады.
Атап айтқанда, Маңғыстау облысындағы «Темір-Баба» автомобиль өткізу бекетінде Ираннан жеткізілген салмағы 9,9 тонна «Айсберг» салаты партиясынан батыс гүл трипсі (Frankliniella occidentalis) анықталды.
Аталған қауіпті карантиндік зиянкес Ақтөбе облысындағы «Жайсаң» бақылау бекетінде де анықталды. Ресейдің Орынбор облысынан жеткізілген 0,7 тонна «Айсберг» салаты өінмдерінен батыс гүл трипсі табылған.
Сондай-ақ аталған елден әкелінген, жалпы көлемі 100 тоннаны құрайтын азық-түлікке арналған арпа өнімдерінен ауыл шаруашылығы алқаптарына қауіп төндіретін карантиндік арамшөп – жатаған кекіре (Acroptilon repens) анықталды.
Сонымен қатар Ақтөбе облысында салмағы 3 тонна қызанақ партиясын тексеру кезінде мамандар бірден екі карантиндік нысанды анықтады. Олар – оңтүстікамерикалық қызанақ күйесі (Tuta absoluta) және қызанақ жемісінің қоңыр әжімділік вирусы (Tomato brown rugose fruit virus).
Олардың барлығы «Фитосанитария» мекемесінің тіркелген зертханаларында жүргізілген фитосанитариялық сараптама нәтижелерімен расталды.
Анықталған фактілер бойынша әкімшілік құқық бұзушылық туралы хаттамалар толтырылып, материалдар сотқа жолданып, айыппұл салынды.
ҚР АШМ АӨК-дегі мемлекеттік инспекция комитеті карантинге жатқызылған өнімдердің әкелінуіне қатысты күшейтілген фитосанитариялық бақылауды жалғастыруда. Негізгі міндет – ауыл шаруашылығы дақылдарына зиян келтіруі мүмкін қауіпті карантиндік нысандардың ел аумағына енуі мен таралуына жол бермеу және отандық агроөнеркәсіптік кешенді қорғауды қамтамасыз ету.
Ауыл шаруашылығы министрлігінің және Біріккен Ұлттар Ұйымының Азық-түлік және ауыл шаруашылығы ұйымының (ФАО) өкілдері онлайн кездесу арқылы агроөнеркәсіптік кешенді цифрландыру саласында ынтымақтастықты күшейтудің басым бағыттарын талқылады.
Онда ауыл шаруашылығы саласындағы үдерістерді заманауи құралдар арқылы мониторингтеу, сондай-ақ ұшқышсыз ұшу аппараттары көмегімен алынатын деректерді цифрлық платформалар мен ақпараттық жүйелерге біріктіру мәселелеріне ерекше назар аударылды.
Тараптар деректерді автоматты түрде жинау, өңдеу, жүйелеу және көрнекі түрде ұсынуға мүмкіндік беретін цифрлық шешімдерді қолдану жолдарын қарастырды. Мұндай технологиялар ауыл шаруашылығы алқаптарының жай-күйі туралы ақпаратты жедел алуға, деректерді талдау мүмкіндіктерін кеңейтуге және болжам жасау сапасын арттыруға жол ашады.
Сондай-ақ кездесуде цифрлық құралдарды одан әрі жетілдіру және олардың агроөнеркәсіптік кешенде қолданыстағы ақпараттық жүйелермен тиімді өзара ықпалдастығын қамтамасыз ету мәселелеріне көңіл бөлінді.
Тараптар цифрлық технологиялардың ауыл шаруашылығы саласындағы мемлекеттік мониторинг пен басқарудың тиімділігін арттыруға айтарлықтай ықпал ететінін атап өтті. Осы ретте заманауи шешімдерді енгізу, цифрлық инфрақұрылымды дамыту және аграрлық секторда инновациялық технологияларды қолдану тәжірибесімен алмасу бағытындағы бірлескен жұмысты жалғастырудың маңыздылығы айтылды.
ҚР Ауыл шаруашылығы министрлігі мен ФАО арасындағы ынтымақтастық цифрлық құралдарды одан әрі жетілдіруге, деректердің сапасы мен қолжетімділігін арттыруға, сондай-ақ агроөнеркәсіптік кешенде тиімді әрі уақтылы шешімдер қабылдауға қажетті жағдайлар жасауға бағытталған.
Ауыл шаруашылығы вице-министрі Аманғали Бердалин Қостанай облысына жұмыс сапары барысында агроөнеркәсіптік кешендегі инвестициялық жобалар барысымен және өңірдегі ветеринариялық инфрақұрылым жағдайымен танысты.
Вице-министр Тобыл кентінде вице-министр «Қостанай бекіре» серіктестігіне барып, балық өсіру және қайта өңдеу кешенінің құрылыс барысын көрді. Жоба форель өсіру фермасын, қайта өңдеу цехын және тоңазытқыш қоймасын қамтиды.
Жобаға 965 млн теңге инвестиция салынады. Кәсіпорын жобалық қуатына шыққаннан кейін жылына 50 тоннаға дейін форель және өсімдікқоректі балық түрлерінің 2 млн-ға дейін біржаздық шабағын өсіреді. Қайта өңдеу цехының өндірістік қуаты тәулігіне 1 тонна балық өнімін құрайды.
Нысанды 2027 жылы пайдалануға беру жоспарланған.
Заречное ауылында тағы бір ірі жоба жүзеге асырылуда. Мұнда «Халық Агро KST» серіктестігіне сыйымдылығы 5,2 мың тонна көкөніс қоймасын салуда. Жобаның құны 1,2 млрд теңгені құрайды.
Жаңа нысан өңірдің ауыл шаруашылығы өнімдерін сақтау мүмкіндігін арттырып, өнім шығынын азайтуға және оны жыл бойы өткізуге мүмкіндік береді. Қазіргі уақытта құрылыс алаңында металл конструкцияларын монтаждау, ғимараттың қаңқасын тұрғызу және бетон құюға арналған негіздерді дайындау жұмыстары жүргізілуде.
Жұмыс сапарының маңызды бағыттарының бірі өңірдегі ветеринариялық инфрақұрылымның жай-күйімен танысу болды.
Аманғали Бердалин Үлкен Чураковка ауылында ветеринариялық іс-шараларды жүргізуге және ауыл шаруашылығы тауарын өндірушілерге ветеринариялық қызмет көрсетуге қажетті жабдықтармен жарақтандырылған жаңа ветеринариялық пунктке барды.
Мал шаруашылығы субъектілерінің өкілдерімен кездесуде саланың өзекті мәселелері, оның ішінде мал шаруашылығын дамыту және асыл тұқымды базаны нығайту жөніндегі Кешенді жоспарды іске асыру мәселелері талқыланды.
Осы іс-шаралар аясында өңірдегі сала өкілдерінің Ирландияға сапарын ұйымдастыру жоспарланып отыр. Сапарға қатысушылар озық шаруашылықтардың жұмысын ұйымдастыру тәжірибесімен танысып, қолданылатын технологияларды зерделейді және ауыл шаруашылығы жануарларын іріктеу жұмыстарын жүргізеді.
Нысандарды аралау барысында Аманғали Бердалин заманауи өндірістік және ветеринариялық инфрақұрылымды дамыту агроөнеркәсіптік кешеннің бәсекеге қабілеттілігін арттырудың негізгі шарттарының бірі болып қала беретінін атап өтті.
«Инвестициялық жобаларды жүйелі түрде сүйемелдеуге, жаңа өндірістік қуаттарды уақтылы іске қосуға және ауыл шаруашылығы өндірісін одан әрі дамытуға қажетті жағдай жасау өте маңызды. Сонымен қатар ветеринариялық қызметті күшейтіп, асыл тұқымды базаны нығайту қажет. Өйткені дәл осы бағыттар мал шаруашылығының тұрақты дамуы мен тиімділігіне тікелей әсер етеді», – деді вице-министр.
ҚР Ауыл шаруашылығы министрлігі Жер ресурстарын басқару комитеті төрағасының орынбасары Марат Қаженов Моңғолияның Ұлан-Батыр қаласында өткен БҰҰ-ның Шөлейттенуге қарсы күрес жөніндегі конвенциясы Тараптары конференциясының 17-сессиясы (UNCCD COP17) аясында ұйымдастырылған арнайы іс-шараға қатысты.
Халықаралық талқылаудың негізгі тақырыбы – шөлейттену, жердің тозуы және құрғақшылық мәселелерін шешудегі су ресурстарын басқарудың жаһандық тетіктерін жетілдіру. Қатысушылар су мен жер ресурстарының өзара байланысын, сондай-ақ оларды орнықты пайдаланудың кешенді тәсілдерін әзірлеу қажеттігін талқылады.
Іс-шара барысында Қазақстан орнықты табиғат пайдалану қағидаттарына, ғылыми негізделген шешімдерге және халықаралық ынтымақтастыққа сүйенетін жер және су ресурстарын басқару саласындағы ұлттық тәжірибесін таныстырды.
Өз сөзінде Марат Қаженов жер және су ресурстарының ажырамас байланысын атап өтіп, олардың жай-күйі азық-түлік, экологиялық және экономикалық қауіпсіздікке тікелей әсер ететінін айта келіп:
«Су ресурстары тапшылығының күшеюі, климаттың өзгеруі және жердің тозу үдерістерінің өршуі жағдайында оларды ұтымды пайдалану мәселелері ұлттық және халықаралық деңгейде келісілген шешімдерді талап етеді», – деді.
Мемлекет басшысының Халықаралық су ұйымын құру жөніндегі бастамасына ерекше назар аударылды. Қазақстан бұл бастаманы мемлекеттердің күш-жігерін үйлестіруге, озық тәжірибемен алмасуға және жаһандық су проблемалары бойынша ортақ шешімдер әзірлеуге мүмкіндік беретін тиімді халықаралық алаң қалыптастыру жолындағы маңызды қадам деп санайды.
Қазақстанның таныстырылымында 2026 жылы қабылданған «Топырақты қорғау туралы» Қазақстан Республикасының Заңына да айпықша көңіл бөлінді. Бұл құжат топырақ жамылғысын жүйелі түрде сақтау, оның тозу үдерістерінің алдын алу және топырақты қорғау саласындағы мемлекеттік реттеуді жетілдіру үшін құқықтық негіз қалыптастырады.
Қазақстан тарапы жерді орнықты пайдалану үшін заманауи топырақ қорғау технологияларын енгізу, ғылыми зерттеулер мен цифрлық мониторинг құралдарын дамыту, сондай-ақ білім мен практикалық тәжірибе алмасуды халықаралық деңгейде кеңейту қажет екенін атап өтті.
«Жерді сақтауды су қауіпсіздігі мәселесінен бөлек қарастыруға болмайды. Топырақтың тозуы, құрғақшылық және су тапшылығы – кешенді әрі үйлестірілген шешімдерді талап ететін өзара байланысты сын-қатерлер», – деді Марат Қаженов.
Қазақстанның маңызды іс-шараға қатысуы халықаралық қоғамдастыққа жер ресурстарын қорғау саласындағы ұлттық тәсілдері мен заңнамалық шешімдерін таныстыруға, сондай-ақ табиғи ресурстарды орнықты басқару мәселелері бойынша халықаралық ынтымақтастықты одан әрі дамытудағы ел басымдықтарын айқындауға мүмкіндік берді.
Іс-шара соңында қатысушылар жердің тозуының алдын алу және құрғақшылықпен күресу жолындағы тәжірибелерімен алмасып, жер және су ресурстарын тиімді басқару үшін ғылыми әлеуетті, мемлекеттік тетіктерді және халықаралық әріптестікті біріктірудің маңыздылығына тоқталды.
Қазақстанда қосылған құны жоғары өнім өндіру жүйелі түрде дамып, шикізат базасы нығайтылып, отандық ауыл шаруашылығы шикізатын терең өңдеу ауқымы кеңейіп келеді. Оған жарқын мысалдың бірі жылдар бойы өндірістің толық циклін қалыптастырған, елімізге белгілі «Бижан» компаниясы. Онда жеке шикізат базасы, өңдеу, дайын өнім өндіру және қаптама шығару бағыттары толықтай қамтылған.
1998 жылы ашылған кәсіпорын бүгінде ет өнімдерін өндірудің негізгі кезеңдері – ірі қара малды бордақылау және шикізат дайындаудан бастап, етті өңдеу, қаптау және дайын өнім шығаруға дейін қолға алған.
Бір мезгілде 5 мың басқа дейін ірі қара малды бордақылауға арналған алаң бар. Жеке шикізат базасының арқасында өндірісті отандық шикізатпен қамтамасыз етумен қатар, оның сапасын бастапқы кезеңнен бақылауға мүмкіндік береді.
Өндірістік тізбектің тағы бір маңызды буыны – 2011 жылы құрылым қатарын толықтырған Көкшетау қаласындағы кешен. Мұнда шикізат дайындалады және консервіленген өнім өндіріледі.
Өндірістік инфрақұрылымның негізгі нысаны – Алматының индустриялық аймағында орналасқан, 2020 жылы іске қосылған заманауи ет өңдеу зауыты. Кәсіпорын неміс технологиялары негізінде салынған және еуропалық өндірістің заманауи жабдықтарымен, оның ішінде шикілей ысталған шұжықтарды дайындауға арналған ыстау және кептіру бағытындағы MAURER – ATMOS климаттық камераларымен жабдықталған.
Зауытта шұжық өнімдері мен таңдаулы ет өнімдері, жеңіл тіскебасар және жартылай дайын өнімдер шығарылады. Былтыр өндіріс көлемі 2 600 тоннадан асты. Мұнда шұжық өнімдері мен деликатестердің 80-нен астам түрі және жартылай дайын өнімдердің 50-ден астам түрі бар.
Сонымен қатар «Бижан» консервіленген өнімдер шығарып, өзінде дайындалған жаңа ет өнімдерін ұсынады.
2026 жылы компания «BiPack» кәсіпорнын құрып, өндірісті жергіліктендіру бағытында тағы бір қадам жасады.
Жаңа кәсіпорын консерві құтыларын өндіретін құралдармен жабдықталған.
Осылайша, компаниялар тобының құрамында шикізат базасын, ет дайындау және өңдеу, дайын өнім шығару және қаптама өндіру кезеңдерін қамтитын тұтас өндірістік тізбек қалыптасып келеді. Бұл өндірісті жергіліктендіру деңгейін арттыруға, әр кезеңдегі өнім сапасын бақылауға және өндірістік үдерістердің тұрақтылығын қамтамасыз етуге жол ашады.
Компанияны дамытуға салынған инвестициялардың жалпы көлемі 5,4 млрд теңге. Іске асырылған жобалар аясында 250 жұмыс орны құрылды, оның ішінде 104 жұмыс орны тікелей өндірісте ашылған.
Мұнда дәстүрлі қазақстандық өнім дайындау технологиялары мен азық-түлік өнімдерінің сапасына, қауіпсіздігіне қойылатын заманауи талаптар үйлесім тапқан.
Кәсіпорын ISO 9001, ISO 22000 стандарттары және «Халал» стандарты бойынша сертификатталған.
Өндірістік үдерістер тәуекелдерді талдау және бақылаудың сындарлы нүктелері жүйесінің (HACCP) қағидаттары ескеріле отырып бақыланады.
Компания өнімдерінің сапасы мемлекеттік деңгейде де мойындалған. Өткен жылы «Бижан» «Қазақстанның үздік тауары» өңірлік байқауында «Үздік азық-түлік тауарлары» аталымы бойынша жеңімпаз атанды. Ал 2018 жылы компания Қазақстан Республикасы Президентінің «Алтын сапа» сыйлығына ие болды.
«Бижан» өнімдері Астана, Алматы, Шымкент қалаларында және Қазақстанның басқа да өңірлерінде ұсынылған. Компания дамудың келесі кезеңінде фирмалық дүкендер желісін кеңейтуді және жақын шетел нарықтарына шығуды жоспарлап отыр.
Жеке шикізат базасын, заманауи өңдеу өндірістерін және қаптама өндірісін дамыту компанияға өнімді өңдеу тереңдігін және жергіліктендірілген операциялардың үлесін кезең-кезеңімен арттыруға мүмкіндік береді. Мұндай жобалар отандық тамақ өнеркәсібі үшін ел ішінде қосымша құн қалыптастырып, жұмыс орындарын кеңейтеді және қазақстандық өндірістің одан әрі нығаюы мен сыртқы нарықтарға шығуына берік негіз қалайды.
Ауыл шаруашылығы вице-министрі Аманғали Бердалин жұмыс сапарымен Ақмола облысына барып, өңірдегі егін жинау науқаны барысымен, техникалық және инфрақұрылымдық дайындық, мал шаруашылығын дамыту, ірі инвестициялық жобаларды іске асыру және агроөнеркәсіптік кешенге цифрлық технологияларды енгізу жұмыстарымен танысты.
Биыл өңірде ауыл шаруашылығы дақылдары 5,6 млн гектар алқапқа егілді.
Оның 4,5 млн гектарын дәнді және дәнді-бұршақты дақылдар құрайды. Өндірісті кезең-кезеңімен әртараптандыру аясында майлы дақылдардың егіс алқабы 838 мың гектарға дейін ұлғайтылды.
Бүгінгі таңда дәнді дақылдар 800 мың гектардан астам алқаптан жиналды.
Осы ретте астықтың сапасына және оның экспорттық әлеуетін арттыруға ерекше назар аударылуда.
Өңірдегі өнімнің 40%-ы ақуызы мен дән маңызы жоғары бидайға қойылатын Hi-Pro стандартына сәйкес келеді.
Жекелеген аудандарда дән маңызы мөлшері 40%-ға дейін жетеді.
Бұл астықтың жоғары сапалы екенін және өнімнің бәсекеге қабілеттілігін көрсетеді.
Жаңа өнімді қабылдауға 67 астық қабылдау кәсіпорны мен жалпы сыйымдылығы 7,3 млн тоннаны құрайтын 1,5 мыңға жуық қойма дайын тұр.
Саланы дамытудың негізгі бағыттарының бірі – цифрлық трансформация.
Қазірдің өзінде облыста 5,6 млн гектар жер цифрландырылды, 49 смарт-ферма жұмыс істейді, ал 120-дан астам ауыл шаруашылығы кәсіпорны заманауи IT-шешімдерді енгізуде.
Бүгінде цифрландыру аграрлық өндірісті күнделікті басқару жүйесінің ажырамас бөлігіне айналып келеді. Бұл жер ресурстарын бақылау мен егістіктердің жай-күйін мониторингтеуден бастап, ауыл шаруашылығы техникасын, мал басын және өндірістік процестерді басқаруға дейінгі жұмыстарды қамтиды.
Вице-министр «Журавлевка-1» серіктестігінің өндірістік үдерістерді ұйымдастыру жұмысымен танысты.
Өңірдегі көпсалалы шаруашылықта өндірістік процестердің едәуір бөлігі заманауи цифрлық технологияларға көшірілген. GPS-навигация, агродрондар, спутниктік мониторинг және басқа да шешімдер жер және материалдық ресурстарды тиімді пайдалануға, егістіктердің жай-күйін бақылауға және еңбек өнімділігін арттыруға жол ашады.
Сондай-ақ Аманғали Бердалин «Еңбек» серіктестігінің 300 басқа арналған смарт-фермасына барды.
Мұнда сауу процестері толық автоматтандырылған.
3D камералар және жоғары дәлдіктегі сенсорлармен жабдықталған робот-сауыншылар адамның барынша аз қатысуымен мал сауу жұмысын жүзеге асырып, бір мезгілде сауу процесінің өлшемдері мен малдың жай-күйін бақылауға мүмкіндік береді.
Кәсіпорында малға қолайлы микроклимат қалыптасқан.
Цифрлық технологиялар органикалық егіншілікті дамыту бағыттарымен ұштастырыла қолданылуда.
Вице-министр «Burabay Milk» серіктестігінің жобаларымен де танысты. Баянбай ауылында компания 1 440 жемшөптік мал басына арналған сүт-тауарлы фермасын салу жобасын жүзеге асыруда. Бүгінде Германиядан голштин тұқымды 330 бас сиыр әкелінді.
Щучинск қаласында компания тәулігіне 50 тонна өнім өндіретін заманауи сүт зауытын салуда. Құрылыс-монтаждау жұмыстары былтыр қараша айында басталды.
Технологиялық жабдықтарды жеткізу бойынша Shugao және Fibosa компанияларымен келісімшарттар жасалды.
Бұл жобаларды іске асыру сүттен бастап оны терең өңдеуге және дайын өнім шығаруға дейінгі толық өндірістік тізбекті қалыптастырады.
Сондай-ақ вице-министр Ақмола облысының 200-ден астам ауыл шаруашылығы тауарын өндірушілер жиналған арнайы кеңеске қатысты.
Кездесудің негізгі тақырыбы агроөнеркәсіптік кешенде «Заң және тәртіп» қағидатын іске асыру мәселелеріне қатысты болды.
Іс-шара барысында заңнама талаптарын сақтау, мемлекеттік қолдау шараларының ашықтығын қамтамасыз ету, жер ресурстарын пайдаланудың тиімділігін арттыру, нарыққа қатысушылардың жауапкершілігі және аграрлық өндірісті одан әрі дамыту мәселелері талқыланды.