Қазақстан Республикасының Нидерланд Корольдігіндегі Елшілігі

Қазақстан Республикасының Нидерланд Корольдігіндегі Елшілігінің ресми сайтына қош келдіңіздер!

Бұл ресурс – қарқынды дамып келе жатқан, өзара тиімді қазақстандық-нидерландтық қатынастар әлеміне жол көрсетушіңіз. Мұнда идеялар ортақ бастамаларға айналып, серіктестік нақты экономикалық және гуманитарлық жобаларға ұласады, ал сенім – халықтарымыздың бейбіт және тұрақты болашағының берік негізі болып табылады.

Елшілік – Қазақстан Республикасы Сыртқы істер министрлігінің жүйесіне кіретін мекеме болып табылады және Қазақстан Республикасы мен Нидерланд Корольдігі арасындағы екіжақты деңгейде, сондай-ақ халықаралық ұйымдар аясында ынтымақтастық пен өзара түсіністікті нығайту жөніндегі негізгі сыртқы саяси миссияны орындайды. Біздің жұмысымыздың өзегінде – Қазақстан Республикасы азаматтарының, мемлекеттің және қазақстандық бизнестің мүдделері, сондай-ақ өзара тиімді іс-қимыл мен нәтижелі бірлескен жұмыс арқылы қол жеткізілетін ортақ қауіпсіз және бейбіт болашақ жатыр.

Елшіліктің негізгі қызмет бағыттары:

– Қазақстан Республикасының ұлттық мүдделерін Нидерланд Корольдігі аумағында ұсыну және қорғау;

– Қазақстан Республикасы азаматтары мен заңды тұлғаларын қолдау, олардың құқықтары мен заңды мүдделерін қамтамасыз ету;

– Саясат, экономика, мәдениет, ғылым және білім беру салаларында Нидерланд Корольдігімен екіжақты ынтымақтастықты дамыту және нығайту;

– Қазақстан Республикасы мен Нидерланд Корольдігі кәсіпкерлері арасындағы іскерлік байланыстарды орнатуға және инвестициялық бастамаларды ілгерілетуге жәрдемдесу;

– Халықаралық келісімдерді әзірлеуге, келісілуіне және жүзеге асырылуына қатысу;

– Консулдық функцияларды орындау және өзекті анықтамалық және құқықтық ақпараттарды ұсыну;

– Нидерланд Корольдігінде тұратын қазақстандықтармен өзара іс-қимыл жасау және оларды қолдау;

– Екі елдің университеттері мен ғылыми-зерттеу орталықтары арасында академиялық және ғылыми алмасуды дамыту, байланыстарды кеңейтуге жәрдемдесу;

– Гаагада орналасқан халықаралық ұйымдардың іс-шараларына қатысу және көпжақты алаңдарда Қазақстан Республикасының сыртқы саяси бастамаларын ілгерілету;

– Туристік ынтымақтастықты дамытуға жәрдемдесу және Қазақстан Республикасын Нидерланд азаматтары үшін ашық әрі қонақжай, заманауи және саналуан бағыт ретінде таныстыру.

Бұл сайт ең кең аудиторияға арналған – Нидерланд Корольдігінде тұратын отандастарымызға да, Қазақстанға қызығушылық танытқан, сапар, іскерлік кездесулер жоспарлап жүрген немесе сенімді серіктестік байланыстар орнатқысы келетіндерге де.

Біз әрдайым ынтымақтастыққа ашықпыз, қажетті ақпаратты ұсынуға, сіздің бастамаларыңызды қолдауға және елімізбен ашық әрі нәтижелі өзара іс-қимыл жолында сенімді серіктес болуға дайынбыз. Сенім, диалог пен жаңа мүмкіндіктер кеңістігіне қош келдіңіздер!