Өскемен қаласының базарларында салық заңнамасын сақтау бойынша ауқымды түсіндіру жұмыстары жүргізілуде

17 сәуірде Өскемен қаласында ірі базарларда мемлекеттік органдар мен құқық қорғау органдарының қатысуымен түсіндіру іс-шаралары басталды. Іс-шараға ШҚО бойынша Мемлекеттік кірістер департаменті, Сауда және тұтынушылардың құқықтарын қорғау департаменті, ШҚО кәсіпкерлік және индустриялық-инновациялық даму басқармасы, Өскемен қаласының кәсіпкерлік бөлімі, ҚР АШМ Агроөнеркәсіптік кешендегі мемлекеттік инспекция комитетінің ШҚО аумақтық инспекциясы, Техникалық реттеу және метрология комитетінің ШҚО бойынша департаментінің қызметкерлері қатысуда.

Іс-шаралардың негізгі мақсаты – кәсіпкерлерге қолданыстағы заңнама талаптарын түсіндіру. Түсіндіру жұмысы барысында ведомство өкілдері ақпараттық материалдар таратып, бизнес субъектілеріне кеңес беріп, заң бұзушылықтар үшін жауапкершілік көзделгені туралы еске салуда.

Шараның алғашқы күні жұмыс тобы «Дина» көтерме базарына барып, кәсіпкерлермен түсіндіру жұмыстарын жүргізді, өзекті сұрақтарға жауап беріп, ақпараттық буклеттер таратты.

Салықтық әкімшілендіру мәселелеріне ерекше назар аударылды. Мемлекеттік кірістер органдары кәсіпкерлік қызметті ресми тіркеу, бақылау-кассалық машиналарды есепке қою, фискалдық чектерді міндетті түрде ұсыну, қолма-қол ақшасыз төлемдерді, оның ішінде төлем карталары арқылы төлем қабылдауды қамтамасыз ету қажеттігін атап өтті. Сонымен қатар, 2026 жылғы 1 қаңтардан бастап күшіне енген жаңа Салық кодексінің негізгі ережелері, арнайы салық режимдері мен өтпелі нормалар түсіндірілді.

Өскемен қаласы бойынша МКБ-ның Жеке кәсіпкерлерді әкімшілендіру бөлімінің басшысы Шыңғыс Сайрамқан атап өткендей, 2% мөлшерлемемен оңайлатылған декларация негізіндегі жаңа арнайы салық режимінің енгізілуі бизнесті заңдастыруға және көлеңкелі айналымды азайтуға ықпал етуде.

ШҚО бойынша Мемлекеттік кірістер департаментінің Камералдық мониторинг бөлімінің басшысы Бақытжан Жұмаділов түсіндіру іс-шаралары тұрақты негізде өткізілетінін атап өтті.