Қарағанды облысында колледж студенттері үшін кәсіпкерлермен, жұмыс берушілермен және табысты мамандармен мотивациялық кездесулер ұйымдастырылуда. Мұндай іс-шаралардың басты мақсаты — жастарға өз бағытын табуға, мамандықты саналы түрде таңдауға көмектесу және жетістік білімге, еңбекке және жауапкершілікке негізделетінін көрсету.
Осындай кездесулердің бірін Қарағанды қаласының Жастар ресурстық орталығы «Дұрыс таңдау жаса» жобасы аясында тамақтандыру және сервис колледжінің студенттеріне арнап ұйымдастырды.
Кездесудің қонағы — кәсіпкер, Tatti Damdi kz кондитерлік бренді негізін қалаушы Арғын Нұрашев болды. Ол студенттерге бизнестегі жолы, алғашқы қиындықтары, жеке ісін дамыту туралы айтып, алға жылжуға көмектескен тәжірибесімен бөлісті.
Әңгіме ашық әрі шынайы форматта өтті. Студенттермен бірге тек мансап пен өзін-өзі жүзеге асыру мүмкіндіктері ғана емес, жастар жиі тап болатын қауіптер де талқыланды.
— Өмірлеріңізді бұзатын жолға түспеңіздер. Қазір мен есірткі, алкоголь, жаман орта және оңай ақша туралы айтып отырмын. Бұл — мықты адамдардың жолы емес, — деді кәсіпкер.
Студенттер өз сұрақтарын қойып, жеке іс бастау және қиындықтан қорықпау туралы практикалық кеңестер алды.
Мотивациялық кездесулерден бөлек, жастар үшін жұмыс берушілермен диалог алаңдары да ұйымдастырылуда. Мәселен, Қарағанды жоғары политехникалық колледжінде автомобиль көлігіне қызмет көрсету, жөндеу және пайдалану саласында білім алып жатқан болашақ мамандардың QazTehna компаниясы өкілдерімен кездесуі өтті.
Жұмыс берушілер студенттерге кәсіпорын жұмысы, еңбек жағдайлары, тәжірибеден өту мүмкіндіктері мен жұмысқа орналасу әлеуеті туралы айтып берді. Сонымен қатар мансаптық өсу мен техникалық мамандықтардың сұранысына ерекше назар аударылды.
Мұндай кездесулер студенттерге қазіргі еңбек нарығының талаптарын жақсырақ түсінуге, әлеуетті жұмыс берушілермен танысуға және кәсіби болашағын сенімді түрде құруға көмектеседі.
Қарағандыдағы IT және digital қауымдастығына арналған ең ірі іс-шаралардың бірі — «Бизнес және әзірлеме» неконференциясы «Террикон алқабы» IT-hub алаңында өтеді. Қатысушыларды «Әзірлеу» және «Бизнес» атты екі параллель бағыт, AI, аналитика, мобильді әзірлеу, маркетинг және digital-өнімдер саласындағы сарапшылардың баяндамалары, сондай-ақ нетворкинг пен еркін форматтағы пікір алмасу күтеді.
Бағдарламада:
* «Корпорациядағы кәсіби IT қауымдастықтар дегеніміз не» — Райффайзенбанк компаниясының Senior Data Engineer және Senior Community Lead маманы Владислав Заболоцкий;
* «Әзірлеуші AI-мен қалай жұмыс істеуі керек: жылдам емес, сапалы жазу үшін» — Bank CenterCredit компаниясының iOS Team Lead маманы Борис Дипнер;
* «Data/BI аналитигінің өміріндегі бір күн» — DataArt компаниясының Lead Data Analyst маманы Наурызбай Мусин;
* «Жасанды интеллект цифрландыру мен бизнесті қалай өзгертуде» — DevArt компаниясының CBDO маманы Сүлеймен Нұраев;
* «2026 жылы AI-өнімді қалай ілгерілетуге болады» — Goethe Institut маркетинг үйлестірушісі Геннадий Захаров;
* «Мейрамхана lifestyle-экожүйе ретінде» — Del Papa / ABR бренд-менеджері Дана Рамазан.
Неконференция әзірлеушілерге, аналитиктерге, кәсіпкерлерге, басшыларға, digital-мамандарға және заманауи технологиялар мен бизнестің дамуына қызығатын барлық адамға пайдалы болады.
Өтетін күні: 29 мамыр.
Уақыты: 18:30.
Форматы: офлайн және онлайн.
Өтетін орны: «Террикон алқабы» IT-hub, Алалыкин көшесі, 12.
Қатысу алдын ала тіркелу арқылы тегін: terricon.kz.
Неконференция Қарағанды облысының цифрлық технологиялар басқармасының қолдауымен ұйымдастырылады.
Теміртау балалар мен жасөспірімдер театры қайтадан театрлық оқылым форматына жүгінді. Жаңартылған жобаның алғашқы жұмысы қазақстандық автор Ольга Малышеваның «Айдл» пьесасы болды. Бұл — жасөспірімдер, жалғыздық, өзін іздеу және заманауи поп-мәдениеттің ықпалы туралы оқиға.
Оқылым классикалық спектакльден өзгеше. Мұнда үйреншікті декорациялар, күрделі костюмдер мен ауқымды сахналық шешімдер болмайды. Негізгі назар мәтінге, актер мен көрерменге аударылады, ал басты әрекет көрерменнің қиялында өрбиді. Осылайша, көрермен жай бақылаушы емес, сахнадағы оқиғаның тең авторына айналады.
— Оқылым форматы дегеніміз — актерлер рөлдерін жаттап алмай, пьесаны қағаздан оқиды. Атмосфераны ең алдымен дауыс, интонация және эмоция арқылы жеткізеді, ал қалғанын көрермен өз қиялымен толықтырады. Әрине, аздап музыка, кейбір сахналық шешімдер болады, бірақ мұндағы ең бастысы — мәтін мен көрерменнің қабылдауы, — дейді оқылымның қоюшы режиссері Наталья Снегирёва.
Дәл осы жанды қарым-қатынас оқылымның басты ерекшеліктерінің біріне айналған. Егер дәстүрлі спектакль шапалақпен аяқталса, мұнда қойылымнан кейін актерлер, режиссер және көрермен арасында ашық әңгіме басталады.
Бұған дейін мұндай форматтағы қойылымдар тұрақты түрде өткізіліп тұрған. Алғашқы жұмыс — Ярослав Пулиновичтің «Сол бір күн» пьесасының оқылымы — кейін театр репертуарына да енген. Алайда одан кейін ұзақ үзіліс болды. Жобаны қайта жаңғырту үшін театр жас қазақстандық драматург әрі театр сыншысы Ольга Малышеваның «Айдл» пьесасын таңдады. Автордың өзі Теміртаудан шыққан.
Оқиға желісінің ортасында — есейу кезеңіндегі қиындықтарға, отбасындағы түсініспеушілікке, жалғыздық пен алғашқы махаббат сезіміне тап болған үш жасөспірім. Кейіпкерлерді корей поп-мәдениетіне деген қызығушылық пен жоғалып кеткен кумирді іздеу біріктіреді. Бұл ізденіс біртіндеп олардың жақындарымен ортақ тіл табуына және жаңа достар табуына көмектеседі.
— Сырттай қарағанда қарапайым көрінгенімен, оқылым өте күрделі формат. Қолға мәтінді алып, жай ғана оқып шығу жеткілікті сияқты әсер қалдыруы мүмкін. Бірақ шын мәнінде қысқа уақыт ішінде толыққанды костюмдерсіз, арнайы эффектілерсіз және материалды терең талдаусыз автор айтқысы келген ойды көрерменге жеткізу қажет. Егер спектакльді бір жарым, кейде екі ай бойы дайындасақ, оқылымға әдетте екі-үш репетиция ғана беріледі. Сол уақыт ішінде көрерменге түсінікті болатын тұтас оқиға жасап шығу керек, — дейді қоюшы режиссер.
Қазақстандық авторды таңдау кездейсоқ емес. Театр ұжымы қазіргі отандық драматургия сахнада әлі де жеткілікті деңгейде ұсынылмай келеді деп есептейді. Дегенмен қазақстандық авторлардың арасында мықты әрі талантты драматургтер аз емес.
Сонымен қатар оқылым пьесаның автоматты түрде театр репертуарына енеді дегенді білдірмейді. Мұндай формат көрерменді жаңа материалмен таныстырып, оның аудиторияға қаншалықты әсер ететінін байқауға мүмкіндік береді.
Теміртауда металлургия бойынша халықаралық олимпиада өтті. Байқау Қазақстан, Өзбекстан, Қырғызстан және Ресейден келген 16 команданы біріктірді. Сайыс алаңдары ретінде Теміртау жоғары политехникалық колледжі мен Қарағанды индустриялық университеті белгіленді.
Олимпиаданың басты ерекшелігі — оның тәжірибелік форматта өтуі. Қатысушылар тек тест тапсырмаларын орындап қана қоймай, нақты өндірістік үдерістерге барынша жақын тапсырмаларды да атқарды: болат балқытып, оны құю, виброелек жұмысына талдау жасау, материалдардың фракциясын анықтау және минералдарды жасанды интеллект көмегімен зерттеу.
Жарыс екі кезеңнен тұрды. Бірінші — теориялық кезеңде студенттер балқыту пешінің 3D-атласымен және металлургиялық кәсіпорынның жұмысын модельдейтін арнайы тренажерлік бағдарламалармен жұмыс істеді.
Екінші кезеңде қатысушылар практикалық дағдыларын көрсетуі тиіс болды. Әр командаға үш бағыттың бірі және соған сәйкес тапсырмалар жиынтығы берілді.
Теміртау жоғары политехникалық колледжінің командасына минералогиялық үлгілермен жұмыс жасау тапсырмасы түсті. Студенттер минералды дайындап, цифрлық микроскопия жасап, суретті жасанды интеллект жүйесіне жүктеп, минералдың түрін анықтауы қажет болды.
Команда бұл тапсырманы сәтті орындап, Ресей Федерациясынан келген Магнитогорск мемлекеттік техникалық университеті жанындағы көпсалалы колледж студенттерімен бірге бірінші орынды иеленді.
Екінші орынды Қарағанды индустриялық университеті мен «Қазақмыс» корпорациясының политехникалық колледжі командалары алды. Үшінші орын Ташкент мемлекеттік техникалық университеті мен Қырғыз мемлекеттік техникалық университетінің өкілдеріне бұйырды.
Олимпиаданың басты сыйлығы — цифрлық металлургия саласындағы практикалық дағдыларды жетілдіруге арналған VR-тренажёр болды. Оны жарыстың бас демеушісі SIKE компаниясы ұсынды.
— Қырғызстан мен Өзбекстаннан келген қонақтар жабдықтарды және оқытудың тәжірибеге бағытталған тәсілін жоғары бағалады. Мұндай формат жоғары білікті мамандарды даярлауға мүмкіндік береді. Біздің студенттер үшін де олимпиадаға қатысу маңызды әрі пайдалы тәжірибе болды, — деді Теміртау жоғары политехникалық колледжінің қара металдар металлургия кафедрасының меңгерушісі Ерлан Қызылбаев.
Қарағанды облысында XI өңірлік WorldSkills Karaganda кәсіби шеберлік чемпионаты басталды. Байқауға өңірдегі 46 колледжден 376 студент қатысуда. Олар — ішкі іріктеулердің жеңімпаздары мен оқу орындарының үздік білім алушылары.
Чемпионат 17 жетекші колледждің базасында 58 құзырет (компетенция) бойынша өтуде. Бұл оқу орындары өңірдегі кәсіби құзыреттер орталықтары болып табылады.
Қатысушылар техникалық мамандықтардан бастап қызмет көрсету саласына дейінгі түрлі бағыттарда өз шеберліктерін көрсетуде.
Биылғы жылы қатысушылардың жұмыстарын 50 тәуелсіз сарапшы бағалауда. Олардың қатарында облыстың ірі кәсіпорындары мен ұйымдарының өкілдері бар.
Биыл чемпионатқа байқаудан тыс Моңғолиядан келген студенттер де қатысуда. Олар аспаздық іс, дәнекерлеу, жабдықтарды техникалық қызмет көрсету және жөндеу, сондай-ақ плитка қалау мен сантехникалық жұмыстар бойынша бақ сынауда.
Атап айтқанда, «ҚТЖ» ҰК» АҚ мамандары, мейрамхана бизнесінің өкілдері, өрт сөндіру бөлімдерінің қызметкерлері және басқа да әлеуметтік серіктестер. Бұл жарыстың ашықтығы мен әділдігін қамтамасыз етеді.
WorldSkills Karaganda чемпионатының басты мақсаты — жастардың кәсіби дағдыларын дамыту, талантты студенттерді қолдау және кадр даярлау сапасын халықаралық стандарттарға сай арттыру.
Байқау студенттерге өз білімдері мен тәжірибелік дағдыларын көрсетуге, жұмыс берушілермен танысуға және кәсіби жарыстарға қатысу тәжірибесін алуға мүмкіндік береді.
Сонымен қатар, WorldSkills колледждер мен өңір кәсіпорындары арасындағы ынтымақтастықты нығайтуға ықпал етеді.
Қарағанды облысы 2014 жылдан бері WorldSkills халықаралық қозғалысына қатысып келеді және жыл сайын жоғары нәтижелер көрсетуде.
2024 және 2025 жылдардағы ұлттық чемпионаттардың қорытындысы бойынша өңірлік құрама 20 аймақтың ішінде жалпы командалық есепте үшінші орынды иеленді.
22 мамыр күні Қарағандыдағы Нұркен Әбдіров атындағы Спорт сарайында облыстың туристік саласына арналған көрме өтеді. Алаңда өңірдегі туристік бағыттар, саяхат маршруттары мен демалыс мүмкіндіктері таныстырылады.
Келушілер туризм саласындағы жобалар мен бастамалармен танысып, өңірдің табиғи, мәдени және рекреациялық орындары туралы кеңірек ақпарат ала алады.
Бағдарламада концерттік қойылымдар, тақырыптық фото аймақтар, интерактивті алаңдар және облыстың туристік әлеуетіне арналған таныстырылымдар қарастырылған.
Көрме туристік сала өкілдерін, белсенді демалыс ұйымдастырушыларын, мәдени жобалар авторларын және қала қонақтарын біріктіреді. Іс-шара Бұқар жырау даңғылы, 53 мекенжайындағы Нұркен Әбдіров атындағы Спорт сарайында өтеді.
Басталуы – сағат 17:00-де.
Қарағандыда алғаш рет «Абай» операсы концерттік форматта орындалады. Бұл — Музыкалық комедия театры мен Құрманғазы атындағы Қазақ ұлттық консерваториясының бірлескен жобасы. Өткен жылы екі ұжым достық және ынтымақтастық туралы меморандумға қол қойған болатын. Жаңа қойылым шығармашылық серіктестіктің нәтижесіне айналды: консерватория түлектері Қарағанды театрының сахнасында өздерінің дипломдық жұмысын ұсынады.
Көрермендер премьераны 29 мамыр күні сағат 18:30-да Кеншілер мәдениет сарайында тамашалай алады.
Театр өкілдерінің айтуынша, қойылымның басты ерекшелігі — оның концерттік форматта ұсынылуында. Көрермендер музыка мен орындаушылардың дауысын терең сезініп, қазақ музыкалық мәдениетінің ең ірі туындыларының бірінің эмоциялық қуатын толықтай қабылдай алады.
Ахмет Жұбанов пен Латиф Хамиди 1944 жылы жазған «Абай» операсы қазақтың халықтық әуендерін еуропалық музыкалық дәстүрлермен үйлестірген шығарма саналады. Консерватория түлектерінің, ҚАТМК хоры мен оркестрінің орындауында опера түпнұсқа тілінде шырқалып, көрермендерге ерекше музыкалық әсер сыйлайды.
Талдықорғанда ауыр атлетикадан Қазақстан чемпионаты аяқталды. Қарағандылық спортшы Артём Антропов 110 келіге дейінгі салмақ дәрежесінде өнер көрсетіп, алтын медаль жеңіп алды және елдің үш бірдей рекордын жаңартты — жұлқа көтеруде, серпе көтеруде және қос сайыс қорытындысы бойынша.
Жұлқып көтеруде Артём Антропов 175 келіні еңсерсе, серпе көтеруде 230 келіні бағындырды. Екі жаттығудың қорытындысы бойынша оның жалпы нәтижесі 405 келіні құрады.
Еске салсақ, 2024 жылы Артём Антропов 102 келіге дейінгі салмақ дәрежесінде әлем чемпионы атанған болатын.
Спортшының жаттықтырушысы – Иван Снегуров.
Қарағанды облысының дене шынықтыру және спорт басқармасының ақпараты бойынша
Қарағанды облысында биыл 1–10 сынып оқушыларының 90 пайызын жазғы демалыспен, бос уақытпен және жұмыспен қамту жоспарланған. Оларды мектеп жанындағы және қала сыртындағы лагерьлер, этностық алаңдар, спорттық жобалар, экологиялық акциялар және түрлі жас пен қызығушылыққа арналған ондаған бағдарламалар күтіп тұр.
Негізгі назар мектеп жанындағы демалыс нысандарына аударылады. Мектеп жанындағы 281 лагерь 31 мыңнан астам баланы қабылдамақ. Мұнда күндізгі бағдарламаларды ойындар, экскурсиялар, спорттық және шығармашылық іс-шаралар ұйымдастырылады. Бұдан басқа, тамақтанбайтын 568 бейінді мектеп жанындағы алаң жұмыс істейді, олар 116 мыңнан астам баланы қамтиды.
Әсіресе, қолдауға мұқтаж балаларға ерекше көңіл бөлінеді.
– Биыл әлеуметтік осал санаттағы 1191 бала толыққанды сауықтыру демалысы үшін қала сыртындағы лагерьлерге барады. Тегін жолдамаларды бөлу атаулы сипатта және ең алдымен демалуға және сауықтыруға мұқтаж балаларды қолдауға бағытталған, – деп атап өтті білім басқармасының тәрбие жұмысы және қосымша білім беру бөлімінің басшысы Индира Ысқақова.
«Жаздық жолдама» жобасы да жалғасады. «Қазақстан халқына» қорының қолдауы арқасында ауыл оқушылары еліміздің сауықтыру орталықтарында демалыс өткізуге мүмкіндік алады. Өткен жылы ауылдық аудандардан келген 970 бала Алматы облысының «Таужанашар» және «Бақсы» орталықтарында демалды. Биылғы маусымда бастаманы жалғастырып, кеңейтуге ниетті.
Тегін жолдамаларды оқу озаттары, олимпиадалардың, шығармашылық байқаулар мен спорттық жарыстардың жеңімпаздары мен жүлдегерлері алады.
Биыл жазда аймақта 12 қала сыртындағы сауықтыру лагері жұмыс істейтін болады. Жаңа бағыттардың ішінде – ұлттық колоритті демалыс. Қарқаралы және Нұра аудандарындағы киіз үйлердегі Қарқаралы Go және Nomad Nura Next этномәдениеттерінде оқушылар дәстүрлі ойындар – асық ату және тоғызқұмалақпен таныса алады, өздерін қолөнерде сынап көреді, ұлттық тағам элементтерін зерделейді және көшпелі дала мәдениеті туралы біледі.
Осы жазда таныс жобалар да өз жұмысын жалғастырады. Олардың бірі – «Спорт әр аулаға». Аула алаңдарының санын ұлғайтып, балалар футбол, волейбол, стритбол және ұлттық ойындармен айналысуы үшін жаттықтырушылар мен ерікті студенттерді көбірек тарту жоспарлануда.
Жаңа бағдарламалар да пайда болады. «Жасыл аймақ» экожобасы аясында оқушылар үшін экологиялық квесттер, демалыс күндері көрікті жерлерге саяхаттар және көгалдандыру бойынша акциялар ұйымдастырылады. Ал «Кітап оқитын ұрпақ» зияткерлік челлендж жазғы оқудың заманауи форматын – парктер мен скверлерде буккроссингті ашады, онда әдеби пикниктер, қызықты адамдармен кездесулер және шеберлік сыныптары өтеді.
Пайдалы демалысты ұйымдастыруда аула клубтары ерекше орын алады.
– Біз кешенді бағдарлама әзірледік, онда әркімнің ұнайтын кәсібі болады. Оған би флешмобтары, музыкалық батл, асфальттағы сурет байқаулары, қолданбалы шеберлік сыныптары кіреді. Біздің басты мақсатымыз – аула клубтарын балалардың нағыз демалыс орындарына айналдыру, сол арқылы оларды смартфоннан алыстатып, денсаулықтарын нығайту және жазғы демалыстарын мазмұнды өткізу, – дейді Индира Ысқақова.
Қарағанды облысында жаңа дәрілер шығарылады - Қарағанды фармацевтикалық кешені базасында заманауи өндірістік желі пайда болады. Кәсіпорынды кеңейту жөніндегі ауқымды жобаны Қазақстан үкіметі қолдады.
Кәсіпорында дәрілік заттардың 74 атауын шығару жоспарлануда. Оның ішінде онкологиялық, аутоиммунды және орфандық ауруларды емдеуге арналған инновациялық препараттар да бар.
Дамуға инвестициялар 42,5 млрд теңгені құрайды. Жаңа қуаттарды іске қосудың арқасында өңірде 70-ке жуық жұмыс орны құрылады. Жоба импортты алмастыру және елдің дәрілік қауіпсіздігін қамтамасыз ету жөніндегі мемлекеттік саясаттың бір бөлігі болады.
Инвестициялар туралы тиісті келісімді ҚР Денсаулық сақтау министрлігі мен «Қарағанды фармацевтикалық кешені» ЖШС жасасты.
Үкіметте атап өткендей, бұл Қазақстанның фармацевтика саласындағы ірі инвестициялық бастамалардың бірі.
"Инвестициялық жоба ҚБК өндірістік қуаттылығын жаңғыртуды және ғимараттың орнында жаңа өндірісті құруды қарастырады. Жобаны іске асыру мерзімі алты жылды құрайды", – делінген хабарламада.