Қазақстанда Ұлттық бірыңғай тестілеудің негізгі кезеңінің қорытындысы шығарылды. Қарағанды облысында ҰБТ-2026 сынағына шамамен 10,5 мың талапкер қатысты. Қатысушылардың жартысынан астамы тестілеуді қазақ тілінде тапсырса, 46%-ы орыс тілін таңдаған, ал тағы 10 талапкер ағылшын тілінде тест тапсырды.
2026 жылы ҰБТ форматы өзгеріссіз қалды: талапкерлер үш міндетті және екі бейіндік пәннен сынақ тапсырды.
Тестілеу қорытындысы бойынша шекті балдан шамамен 8 мың қатысушы өтті. Бұл жалпы тест тапсырғандардың 77%-ын құрайды. Өңір бойынша бес пәннің орташа нәтижесі 68 балл, ең жоғары көрсеткіш 137 балл болды.
Тестілеуге ерекше білім беру қажеттіліктері бар 38 талапкер қатысты. Олар үшін ҰБТ-ны жайлы әрі кедергісіз тапсыруға мүмкіндік беретін арнайы жағдайлар жасалды.
ҚР Ғылым және жоғары білім министрлігі Ұлттық тестілеу орталығының мәліметінше, Қарағанды облысында ҰБТ өткізу барысында 33 заң бұзушылық тіркелді. Оның ішінде 22 талапкер аудиторияға смартфон, шпаргалка және басқа да тыйым салынған заттарды алып кіруге әрекет жасағаны үшін тестілеуге жіберілмеді. Тағы 11 адам емтихан кезінде ереже бұзғаны үшін шығарылып, олардың нәтижелері жойылды. Қатысушылардан смарт-сағаттар, микроқұлаққаптар, смартфондар және басқа да тыйым салынған құрылғылар тәркіленді. Тестілеуге бөгде адамдардың қатысу деректері анықталған жоқ.
31 қазанға дейін тестілеу пункттеріндегі бейнежазбаларға талдау жүргізіледі. Егер тыйым салынған заттарды пайдалану немесе басқа да ереже бұзу фактілері анықталса, ҰБТ нәтижелері де жойылады.
Қазіргі уақытта мемлекеттік білім беру гранттарын тағайындау конкурсына қатысу үшін құжат қабылдау жалғасуда. Өтініштерді 20 шілдені қоса алғандағы мерзімге дейін жоғары оқу орындарының қабылдау комиссиялары, оның ішінде виртуалды комиссиялар арқылы, сондай-ақ eGov.kz порталы арқылы беруге болады.
Конкурсқа қатысу үшін жеке куәлік, ҰБТ сертификаты, білім туралы құжат, фотосурет, сондай-ақ болған жағдайда жеңілдіктерге құқық беретін құжаттар ұсынылуы қажет.
Мемлекеттік білім беру гранты иегерлерінің тізімі 10 тамызға дейін жарияланады.
Қарағанды облысының Балқаш қаласы үшін Металлург күні – ең маңызды кәсіби мерекелердің бірі. Бүгінде бұл салада қаланың алты мыңнан астам тұрғыны еңбек етеді, олардың көпшілігі отбасылық еңбек дәстүрін жалғастырып келеді.
Жыл басынан бері Балқаш мыс балқыту зауытында шамамен 100 мың тонна катодты мыс өндірілді. Кәсіби мереке құрметіне металлургтер салтанатты жағдайда ұлықталып, үздік қызметкерлерге салалық марапаттар табысталды.
– Мемлекет басшысы Қасым-Жомарт Тоқаев «Еңбек адамы қоғамда ерекше құрметке ие болуы тиіс» екенін бірнеше мәрте атап өтті. Бұл сөздер ең алдымен сіздерге арналған. Сіздердің қажырлы еңбектеріңіздің арқасында Қарағанды облысының металлургиясы Қазақстан экономикасының басты тіректерінің бірі болып қала беруде. Өткен жылы өңірдің өнеркәсіптік өндіріс көлемі 5,3 триллион теңгеден асты. Оның ішінде шамамен 3,8 триллион теңгесі өңдеу өнеркәсібіне тиесілі, – деп металлургтерді кәсіби мерекесімен облыс әкімі Ермағанбет Бөлекпаев құттықтады. – Бүгінде сала кәсіпорындары болашаққа нық сеніммен қадам басып келеді. Заманауи технологиялар енгізіліп, экологиялық стандарттар жетілдірілуде, жаңа өндірістік жобалар жүзеге асырылып жатыр. Дегенмен ең басты құндылық – бұрынғыдай адам. Алға жылжуға мүмкіндік беретін де – сіздердің білімдеріңіз, кәсібиліктеріңіз бен жауапкершіліктеріңіз.
Өңір басшысы металлургия саласындағы жиынтық еңбек өтілі жүз жылдан асқан Ақбергеновтер әулетін үлгі ретінде атап өтті.
Ермағанбет Бөлекпаев үздік металлургтерге «Еңбек Даңқы», «Құрметті металлург» төсбелгілері мен «Еңбек ардагері» медалін табыстады.
Корпорация басқармасының төрағасы Руслан Өскенәли 2026 жыл компанияда Қауіпсіздік жылы деп жарияланғанын айтты.
– Жылдың алғашқы алты айында Балқаш мыс балқыту зауыты 96 мың тоннадан астам катодты мыс өндірді. Бұл көрсеткіштің артында сіздердің күнделікті еңбектеріңіз бен жоғары кәсібиліктеріңіз тұр. Біз өндірістік инфрақұрылымды кезең-кезеңімен жаңартып, жабдықтарды жаңғыртып, еңбек жағдайларын жақсартып, медициналық және әлеуметтік бағдарламаларды дамытып келеміз. Биыл Балқаш мыс балқыту зауытында ауқымды күрделі жөндеу бағдарламасы жүзеге асырылуда. ПВ-1 және ПВ-2 балқыту агрегаттарына күрделі жөндеу жүргізіліп, ғимараттардың шатырлары жаңартылып, нөсерлі кәріз жүйесі ауыстырылуда. Бұл өндірістік нысандардың сенімділігін арттырып, олардың қауіпсіз пайдаланылуын қамтамасыз етеді, – деді ол.
Салтанатты рәсімге «Қазақмыс» компаниясы директорлар кеңесінің төрағасы Нұрмұхамбет Әбдібеков те қатысты. Ол компания өндірісті жаңғыртуға ғана емес, өзі жұмыс істейтін қалалардағы тұрғындардың өмір сапасын жақсартуға да қомақты қаржы салып отырғанын атап өтті.
– Компанияның әлеуметтік және инфрақұрылымдық жобалар портфелі шамамен 45 миллиард теңгені құрайды. Бұл қаражат білім беру, денсаулық сақтау, спорт, мәдениет және қалалық инфрақұрылымды дамытуға бағытталған. Балқашта жаңа әлеуметтік жобаларды іске асыру басталады. Алдағы жылдары заманауи балабақша мен спортпен шұғылдануға, белсенді демалысқа және туристік әлеуетті дамытуға арналған спорттық-туристік база салынады. Бұл – қызметкерлеріміз бен олардың отбасыларының өмір сапасына салынған инвестиция әрі қаланың болашағына қосылған үлес, – деді Нұрмұхамбет Әбдібеков.
Мерекеде өндіріс ардагерлеріне де ерекше құрмет көрсетілді. Қабдырахман Есембеков металлургия саласына 40 жылдан астам өмірін арнаған. Оның әкесі де металлург болған, бүгінде бұл еңбек жолын балалары жалғастырып келеді.
– Мен балқытушы болып еңбек еттім. Аффинаж және мырыш зауыттары сияқты ірі өндірістік жобалардың іске қосылуына қатыстым. Металлургияның қарқынды дамып, заманауи технологиялардың енгізіліп, көптеген үдерістердің автоматтандырылып жатқаны қуантады. Барша металлургтерді кәсіби мерекемен құттықтап, зор денсаулық пен бақ-береке тілеймін! – деді өндіріс ардагері.
40 жылдық еңбек өтілі бар металлург Дүйсенғали Байғуатов қарапайым жұмысшыдан басшылық қызметке дейінгі жолдан өтті. Ол ұзақ жылдар бойы Балқаш мыс балқыту зауытын басқарған.
– Металлургия – жігерлі әрі қайсар жандардың мамандығы. Әр тонна мыстың артында мыңдаған жұмысшының тәжірибесі, жауапкершілігі мен күнделікті қажырлы еңбегі жатыр. Сондықтан Металлург күні Балқаш үшін әрдайым айрықша мереке болып қала береді, – деді Дүйсенғали Байғуатов.
Балқашта Металлург күні кең көлемде аталып өтеді.
Кәсіби мерекеге орай отбасылық ойын-сауық бағдарламалары, спорттық жарыстар және танымал өнерпаздардың қатысуымен концерт ұйымдастырылады.
Мерекелік шара соңында отшашу болады.
Қарағандыда ECO FEST – «Заң мен тәртіп» экологиялық фестивалі өтті. Іс-шара қоршаған ортаны қорғау идеясы төңірегіне әртүрлі жастағы қала тұрғындарын біріктірді.
Экофестиваль аясындағы негізгі іс-шаралардың бірі пластик бөтелкелерді жинау акциясы болды.
Қала тұрғындары бастаманы белсенді қолдап, пластик ыдыстарды қайта өңдеуге тапсырды.
Алғыс ретінде қатысушылар тапсырған бөтелкелерінің санына қарай балмұздақ, хайуанаттар бағына, балалар теміржолына және киноға билеттер алды.
Барлығы 8 мыңнан астам балмұздақ пен кинотеатрға, хайуанаттар бағына және Орталық саябақтағы балалар теміржолына 1000 билет таратылды.
Фестиваль қонақтары үшін сондай-ақ «Қаладағы заң мен тәртіп» атты тақырыптық квест ұйымдастырылды. Оның басты кейіпкері жаңа Конституцияны бейнелейтін символдық кейіпкер – Парасат үкісі болды. Қатысушылар ойын форматында экология, азаматтық жауапкершілік және заң талаптарын сақтау тақырыптарына арналған тапсырмаларды орындады.
Экофестиваль Қарағанды қаласы әкімдігінің қолдауымен «Заң мен тәртіп» идеологиясы және «Таза Қазақстан» республикалық экологиялық акциясы аясында Қарағанды қаласының Жастар ресурстық орталығының ұйымдастыруымен өтті.
— Экофестиваль — жай ғана экологиялық акция емес, бұл жастарға қалаға деген жанашырлықтың әр адамның жеке жауапкершілігінен басталатынын көрсететін алаң. «Таза Қазақстан» және «Заң мен тәртіп» бастамалары аясында біз адамдарды тазалық, қоршаған ортаға құрметпен қарау және белсенді азаматтық ұстаным сияқты қарапайым, бірақ аса маңызды құндылықтар төңірегіне біріктіріп келеміз. Жиналған әрбір қап қоқыс, қайта өңдеуге тапсырылған әрбір пластик бөтелке және егілген әрбір ағаш – Қарағандының болашағына қосылған нақты үлес. Таза қала – бәрімізге ортақ іс, – деді Қарағанды қаласының Жастар ресурстық орталығы жетекшісінің м. а. Заңғар Серіков.
Фестиваль экологиялық бастамаларды насихаттайтын маңызды алаңға айналды. Оның басты мақсаты – экологиялық мәдениетті қалыптастыру, қоршаған ортаға ұқыпты қарауды дәріптеу, экологиялық жауапкершілікті дамыту және тұрғындарды қалдықтарды бөлек жинауға тарту.
Қарағанды облысында ауылдық елді мекендерді дамыту жұмыстары жалғасуда. Тіпті шағын әрі шалғай ауылдардың өзінде тұрғындардың тұрмысын жайлы етуге бағытталған заманауи инфрақұрылым қалыптастырылып жатыр.
Соның бір мысалы – Бұқар жырау ауданындағы Ақжар ауылы. «Ауыл – Ел бесігі» бағдарламасы аясында мұнда инженерлік және әлеуметтік инфрақұрылымды дамытуға бағытталған бірқатар жоба жүзеге асырылды.
Ең маңызды жаңалықтың бірі – ауылдың орталықтандырылған ауызсу жүйесіне қосылуы. Осы мақсатта ұзындығы жеті шақырым су құбыры желісі тартылып, су мұнарасы салынды, су тарту құрылыстарының алаңы жабдықталып, екі ұңғыма бұрғыланды.
Бүгінде ауылдағы 345 тұрғын тұратын 52 үйдің барлығы орталықтандырылған ауызсумен қамтамасыз етілген.
Сонымен қатар ауылға кіреберіс бес шақырым жол жөнделді. Мамандар жол бойын тегістеп, жол төсемінің негізін дайындады, су өткізгіш құбырлар орнатты, асфальтбетон жабынын төсеп, жол белгілерін салды.
Атқарылған жұмыстардың сапасы Ұлттық жол активтері сапасы орталығының зертханалық сынақтарымен расталды. Тексеру нәтижесінде асфальтбетон жабынының қолданыстағы нормативтік талаптарға толық сәйкес келетіні анықталды.
Бұдан бөлек, Ақжар ауылында жаңа көше жарығы орнатылып, тұрғындардың түнгі уақытта қауіпсіздігі мен жайлылығы артты.
Балалар үшін заманауи ойын алаңы жабдықталды.
Ал жергілікті мал өсірушілер үшін мал ұстайтын арнайы мал тоғыту алаңы салынды.
Шахтинск қаласы мен оған іргелес кенттерді сапалы әрі тұрақты ауыз сумен қамтамасыз етуге бағытталған сумен жабдықтау жүйесін жаңғыртудың үшінші кезеңі жүзеге асырылып жатыр.
Биыл жалпы ұзындығы 49,4 шақырымды құрайтын үшінші кезеңдегі су құбыры желілерін реконструкциялау жұмыстары аяқталады. Жалпы алғанда, 2023–2025 жылдар аралығында Шахтинскіде 100 шақырымнан астам су құбыры желісі жаңартылып, қайта тартылды.
Жобаны іске асыру инженерлік инфрақұрылымның тозу деңгейін едәуір төмендетуге мүмкіндік береді. Егер 2022 жылы су құбыры желілерінің тозуы 78 пайызды құраса, 2026 жылға қарай бұл көрсеткішті 28 пайызға дейін қысқарту жоспарланып отыр. Соның нәтижесінде апатты жағдайлар саны азайып, сумен жабдықтау жүйесінің сенімділігі арта түседі.
Кенттердегі инженерлік желілерді жаңарту жұмыстары да қатар жүргізілуде. Новодолинский кентінде жоспарланған 50,3 шақырым желінің бүгінгі күні 8 шақырымы тартылды. Жобаны толық аяқтау 2027–2028 жылдарға жоспарланған.
Долинка кентінде жоба аясында қарастырылған 5,3 шақырым су құбыры желісінің 5,2 шақырымы салынды. Құрылыс жұмыстарын осы жылдың соңына дейін толық аяқтау көзделген.
Фото: Шахтинск қаласы әкімьігінің баспасөз қызметінен
Қазақстанда отандық өндірушілер жаңа жабдық сатып алуға жұмсаған шығындарының жартысына дейінгі бөлігін мемлекеттен қайтара алады. Қарағанды облысында мемлекеттік қолдаудың бұл тетігін шұжық өнімдерін шығаратын кәсіпорындардың бірі пайдаланды.
Өнеркәсіп және құрылыс министрлігінің мәліметінше, «Тай» компаниясы 65 млн теңгеге шұжық өнімдерін қаптауға арналған заманауи жабдық сатып алған. Соның нәтижесінде өндірістің бір кезеңі автоматтандырылып, өнім шығару көлемі шамамен үштен бірге артқан.
Жабдық сатып алынғаннан кейін мемлекет кәсіпорынға 25,9 млн теңге көлемінде шығынның бір бөлігін өтеп берді.
— Бұл біз үшін елеулі қолдау. Қайтарылған қаражат өндірісті одан әрі жаңғыртуға, жабдықтарды жаңартуға және өнім түрлерін кеңейтуге мүмкіндік береді, — деді «Тай» ЖШС техникалық директоры Серік Жұртыбаев.
Министрліктің түсіндіруінше, өнеркәсіпті мемлекеттік ынталандыру шараларының операторы – QazIndustry Қазақстандық индустрия және экспорт орталығы. Орталық шығындардың бір бөлігін екі бағыт бойынша өтейді: еңбек өнімділігін арттыру және өнімді ішкі нарыққа ілгерілету.
Атап айтқанда, кәсіпорындар технологиялық жабдық сатып алуға, цифрлық шешімдерді енгізуге, қызметкерлердің біліктілігін арттыруға және өндірістің бәсекеге қабілеттілігін күшейтуге бағытталған өзге де жобаларды іске асыруға жұмсалған шығындардың 40–50%-ын өтей алады.
Индонезияда өткен жасөспірімдер (U19) мен жастар (U23) арасындағы Азия чемпионатында Қазақстан әйелдер құрамасы сапында өнер көрсеткен Қарағанды облысының спортшылары алты медаль жеңіп алды. Оның төртеуі – алтын.
Азия чемпионаты Қазақстан әйелдер құрамасы үшін табысты болды. Жарыс қорытындысы бойынша ұлттық құрама 14 жүлдеге қол жеткізді: алты алтын, үш күміс және бес қола медаль иеленді. Бұл нәтиже қазақстандықтарға жалпыкомандалық медаль есебінде Өзбекстан құрамасынан кейінгі екінші орынды иеленуге мүмкіндік берді. Үздік үштікті Үндістан құрамасы түйіндеді.
Ұлттық құраманың жүлде қоржынына Қарағанды облысының былғары қолғап шеберлері қомақты үлес қосты. Олардың еншісінде төрт алтын, бір күміс және бір қола медаль бар.
U19 жас санатында 70 келіге дейінгі салмақ дәрежесінде Камила Оспанова Азия чемпионы атанды. Финалда ол әлем чемпионы, өзбекстандық Мафтуна Янгиеваны 3:2 есебімен жігерлі тартыста жеңді.
U19 санатындағы тағы бір алтын медальді 80 келіге дейінгі салмақта Айдана Убайдуллақызы жеңіп алды. Ол шешуші жекпе-жекте үндістандық Мегу Шеокандтан 3:2 есебімен басым түсті.
23 жасқа дейінгі спортшылар арасында 48 келіге дейінгі салмақ дәрежесінде Гүлназ Бөрібаева финалда моңғолиялық қарсыласын 5:0 есебімен сенімді жеңіп, Азия чемпионы атанды.
70 келіге дейінгі салмақта Азиза Исина да алтын жүлдеге қол жеткізді. Ол тартысты өткен финалда өзбекстандық Хуморабону Мамажонованы 3:2 есебімен жеңіп, жеңіс тұғырының ең биік сатысына көтерілді.
51 келіге дейінгі салмақ дәрежесінде Анита Адишева күміс медаль жеңіп алса, 60 келіге дейінгі салмақта Ермек Аяжан қола жүлдеге ие болды.
Қарағанды облысының дене шынықтыру және спорт басқармасының ақпараты бойынша
Қарағанды облысының өртке қарсы қызметі материалдық-техникалық базасын нығайтуды жалғастыруда. Өрт сөндірушілердің қарауына биіктігі 55 метр болатын екі жаңа автосаты берілді. Олар 18-қабат деңгейіне дейінгі биіктікте құтқару жұмыстарын жүргізуге және өртті сөндіруге мүмкіндік береді.
Бұл туралы облыстық Төтенше жағдайлар департаменті хабарлады.
Ведомствоның мәліметінше, заманауи техникалар жоғары маневрлілігімен және сенімділігімен ерекшеленеді. Бұл әсіресе тығыз салынған қалалық аумақтарда аса маңызды. Арнайы техникалар паркін жаңарту төтенше жағдайларға жедел ден қоюға мүмкіндік беріп, өңір тұрғындарының қауіпсіздік деңгейін арттыра түседі.
Жаңа автосатылар жоғарғы қабаттарға жедел жетуді қамтамасыз етеді, адамдарды қауіпсіз эвакуациялауға және авариялық-құтқару жұмыстарын барынша тиімді жүргізуге мүмкіндік береді.
Дәрігер дерматоскоп арқылы терідегі түзілісті мұқият зерттеп отыр. Экранда ондаған сызық, сан алуан реңк пен көзге әрең шалынатын ұсақ бөлшектер көрінеді. Тәжірибелі маман үшін мұның бәрі диагноз қоюға жол ашатын маңызды белгілер болса, тәжірибесі аз дәрігер үшін елеусіз көрінетін қауіп-қатер белгілерін байқамай қалу қаупі жоғары күрделі міндетке айналуы мүмкін.
Осы мәселені шешу мақсатында қарағандылықтар Тимур Бекеев, Дмитрий Гнейдин және Павел Ильин дерматоскопиялық кескіндерді талдауда дәрігерлерге көмек көрсететін жасанды интеллект негізіндегі TeriAI жүйесін әзірледі.
Жобаның бастауында не тұрды
Жобаны әзірлеуге түрткі болған – өмірден алынған қарапайым жағдай. 1990-жылдары Қарағанды мемлекеттік медицина академиясында «Медициналық кибернетика» мамандығы бойынша білім алған Тимур Бекеев жұбайы – дәрігер-дерматологтың дерматоскопты күнделікті тәжірибеде сирек қолданатынын байқайды. Мұның себебі де түсінікті еді: мұндай кескіндерді мол тәжірибесіз дәл әрі дұрыс интерпретациялау оңай емес.
— Диагноз қою барысында дәрігерлер көбіне тері ауруларының түрлі-түсті фотосуреттері жинақталған баспа атласын пайдаланып, ондағы суреттерді науқастың терісіндегі өзгерістермен салыстырады. Немесе мұндай түзілістерді бағалау дағдыларын меңгеру үшін қымбат оқыту курстарынан өтеді, – дейді Тимур Бекеев.
Осылайша оның бойында кескіндерді бастапқы талдау жұмысын жасанды интеллектке жүктеу идеясы туады.
— Біздің мақсатымыз дәрігерді алмастыратын жүйе жасау емес еді. Біз маманның шешім қабылдауына қолдау көрсететін сенімді көмекші құрал әзірлеуді көздедік, – дейді жоба авторы.
Кейін жобаға Тимурдың бұрынғы курстастары Дмитрий Гнейдин мен Павел Ильин қосылды. Нарықты зерттеген команда Қазақстанда мұндай технологиялық шешімдердің жоқтың қасы екенін, ал шетелдік аналогтардың көпшілік клиника үшін тым қымбатқа түсетінін анықтады. Осылайша TeriAI жобасы дүниеге келді.
Жүйе қалай жұмыс істейді
Жүйенің жұмысы кәдімгі дерматоскопиялық кескіннен басталады. Дәрігер смартфон камерасына жалғанған дерматоскоптың көмегімен терідегі жаңа түзілістің суретін түсіріп, оны қосымшаға жүктейді.
Одан кейін талдауды жасанды интеллект жүргізеді. Алгоритмдер түзілістің пішінін, түсін, құрылымын, шекарасын және басқа да ерекшеліктерін саралап, клиникалық тұрғыдан маңызды болуы ықтимал белгілерді анықтайды әрі тиісті ұсынымдар қалыптастырады. Жүйе динамикалық бақылауды, қосымша тексеруден өтуді немесе бейінді маманның кеңесіне жүгінуді ұсынуы мүмкін. Дегенмен түпкілікті шешім қабылдау құқығы әрдайым дәрігердің өзінде қалады.
Команда жобаға 10 миллион теңгеден астам қаржы салды
Тимур Бекеев өнімді әзірлеу бағытына жетекшілік етеді және Денсаулық сақтау министрлігі жүйесінде ақпараттық қауіпсіздік мәселелерімен айналысады.
Дмитрий Гнейдин жобаға инвестиция құйып, жеке бизнесін дамытып келеді. Ал Павел Ильин маркетингке жауап береді әрі «Олимп» зертханалар желісінің бизнес-серіктесі саналады.
Команда құрамына бұдан бөлек Астанадан фулстек-әзірлеуші және Қарағандыдан бағдарламалау мамандығында білім алып жүрген екі студент енді.
Жобаны әзірлеу кезеңінде оның негізін қалаушылар өз қаражаты есебінен 10 миллион теңгеден астам инвестиция салған.
— Бұл қаражат мамандардың еңбекақысын төлеуге, техникалық инфрақұрылымды қамтамасыз етуге және дерматоскоптарды медициналық техника тізіліміне тіркеуге жұмсалып жатыр, – дейді Павел Ильин.
Өнім дайын болғаннан кейін команда Terricon Valley акселерациялық бағдарламасынан өтіп, нарыққа шығудың түрлі модельдерін сынақтан өткізіп, әлеуетті клиенттермен жұмыс істеу тетіктерін қалыптастырды.
Пилоттық жобадан коммерциялық пайдалануға дейін
Бүгінде TeriAI Қарағанды мен Астанадағы үш клиникада пилоттық режимде енгізіліп жатыр. Жоба авторларының айтуынша, бірқатар медициналық ұйымдар сервисті сынақтан өткізу кезеңінен коммерциялық пайдалануға көше бастаған.
Қызмет көрсету моделі қарапайым: ай сайынғы жазылым құны – 5000 теңге. Бұл пакетке өңделген кескіндер бойынша он медициналық қорытынды кіреді. Ал әрбір келесі зерттеу үшін 500 теңге төленеді.
Келесі қадам
Қазіргі таңда команда медициналық университетпен бірлесіп, жүйенің нақты клиникалық тәжірибедегі тиімділігін бағалауға мүмкіндік беретін ғылыми зерттеу жүргізуге дайындық үстінде.
Зерттеу нәтижелерін әзірлеушілер Қазақстан Республикасының Денсаулық сақтау министрлігіне ұсынуды жоспарлап отыр. Егер TeriAI жүйесінің тиімділігі ғылыми тұрғыда дәлелденсе, бұл цифрлық көмекші еліміздің мемлекеттік медициналық ұйымдарында да кеңінен қолданылуы мүмкін.
«Террикон алқабының» ақпараты бойынша
Қарағанды облысында мал иелеріне жарық шағылыстыратын таспалар тегін үлестірілді. Бұл қарапайым құралдар түнгі уақытта үй жануарларының жол бойында анық көрінуін қамтамасыз етіп, көлік апаттарының алдын алуға мүмкіндік береді.
Аталған шараны «ҚазАвтоЖол» ҰК» АҚ Қарағанды облыстық филиалы КОФ «ҚАЖсервис» ұйымымен бірлесіп ұйымдастырды.
Жануарлар көбіне Қарағанды – Қарқаралы, Қарағанды – Жезқазған, Қарағанды – Павлодар және Ботақара – Керней – Үміткер бағыттарындағы автомобиль жолдарына шығады.
Қараңғы уақытта немесе ауа райы қолайсыз болған жағдайда жарық шағылыстыратын таспалар көлік фараларының жарығын кері қайтарады. Нәтижесінде жүргізушілер жануарларды алдын ала байқап, жылдамдықты төмендетуге мүмкіндік алады.
«ҚазАвтоЖол» компаниясы өкілдерінің айтуынша, осындай қарапайым әрі тиімді шаралар жол-көлік оқиғаларының қаупін айтарлықтай төмендетуге көмектеседі.
Акция аясында мал иелеріне 225 жарық шағылыстыратын таспа таратылып, жануарларды қауіпсіз жаю талаптары түсіндірілді. Мұндай таспаларды кез келген адам өз қаражатына сатып ала алады — олар тігін бұйымдары мен фурнитура сататын дүкендерде бар.
Ауыл шаруашылығы жануарларын қараусыз, бақылаусыз жаю үшін қолданыстағы заңнамаға сәйкес әкімшілік жауапкершілік қарастырылған. Айыппұл көлемі 3-тен 10 АЕК-ке дейін (12 975-тен 43 250 теңгеге дейін).