ТЖМ басшысы генерал-лейтенант Шыңғыс Әрінов Алматы облысы Қарасай ауданындағы Жібек жолы ауылында жаңа өрт сөндіру депосын ашты. Бұған дейін ауылда жеке өрт сөндіру бөлімшесі болған жоқ. Енді жаңа депо Қарасай ауданындағы 83 мыңнан астам адам тұратын 14 елді мекенге жедел ден қоюды және өртке қарсы қорғауды қамтамасыз етеді.
Салтанатты ашылу рәсімінде сөз сөйлеген министр Мемлекет басшысының тапсырмасы бойынша азаматтық қорғау жүйесін нығайту, заманауи өрт сөндіру және құтқару инфрақұрылымын дамыту, халықтың қауіпсіздік деңгейін арттыру басым бағыттардың бірі болып қала беретінін атап өтті.
Өрт сөндіру депосы жергілікті бюджет қаражаты есебінен салынып, заманауи талаптарға толық сәйкес келеді. Ғимаратта заманауи байланыс құралдарымен жабдықталған диспетчерлік бөлме, өрт сөндіру техникасына арналған гараж бокстары, әкімшілік-тұрмыстық үй-жайлар, газ-түтіннен қорғау қызметінің бекеті және тәулік бойы кезекшілік атқаруға қажетті барлық инженерлік коммуникациялар қарастырылған. Жеке құрамның дене даярлығын жетілдіру мақсатында заманауи спорттық жаттығу құралдарымен жабдықталған Batyr Team жаттығу залы да жасақталған. Депо аумағында қызметкерлердің спортпен шұғылданып, дене дайындығын қалыпта ұстауы үшін футбол алаңы да жабдықталған.
Іс-шара соңында Шыңғыс Әрінов бөлімшеге жаңа өрт сөндіру депосының және жаңа өрт сөндіру автоцистернасының кілттерін табыстады. Сонымен қатар адал қызметі мен азаматтық қорғау жүйесін дамытуға қосқан үлесі үшін азаматтық қорғау органдарының қызметкерлері, жергілікті атқарушы органдардың өкілдері және өзге де ұйымдардың қызметкерлері ТЖМ-нің ведомстволық наградаларымен және Алматы облысы әкімінің марапаттарымен марапатталды.
Төтенше жағдайлар министрі, генерал-лейтенант Шыңғыс Әрінов Алматы облысы Қонаев қаласына қарасты Шеңгелді ауылында жаңа өрт сөндіру бекетінің салтанатты ашылу рәсіміне қатысты. Жаңа өрт сөндіру бекеті жалпы саны 8 мыңнан астам тұрғыны бар бес елді мекеннің өрт қауіпсіздігін қамтамасыз етеді.
Шара барысында сөз сөйлеген Шыңғыс Әрінов азаматтық қорғау бөлімшелерінің материалдық-техникалық базасын нығайту мен өрт сөндіру-құтқару инфрақұрылымын дамыту халықтың қауіпсіздігін қамтамасыз етудегі басым бағыттардың бірі екенін атап өтті.
Жаңа өрт сөндіру бекеті тәулік бойы қызмет атқаруға қажетті барлық құрал-жабдықтармен толық қамтамасыз етілген. Мұнда өрт сөндіру техникасына арналған жылы бокс, кезекші ауысымға арналған бөлмелер, байланыс, демалыс және тамақтану орындары, санитарлық-тұрмыстық бөлмелер, сондай-ақ газ-түтіннен қорғау қызметінің бекеті қарастырылған. Бұдан бөлек, жеке құрамның дене даярлығына арналған «Batyr Team» жаттығу залы жабдықталған.
Нысан облыстық мәслихатының депутаты, «Халық үшін» қоғамдық қорының директоры Сергей Горяной демеушінің қаражаты есебінен салынды.
Салтанатты рәсім барысында ведомство басшысы жаңа өрт сөндіру бекетінің кілтін табыстап, бөлімшеге жаңа өрт сөндіру автоцистернасы мен катердің кілттерін тапсырды. Сонымен қатар іс-шара аясында ТЖМ-нің ведомстволық наградаларымен және облыс әкімінің марапаттарымен құтқарушылар, жергілікті атқарушы органдардың өкілдері мен ұйым қызметкерлері марапатталды.
Жазғы демалыс су жағасында тек жағымды естеліктер сыйлауы тиіс. Өкінішке қарай, әрбір шомылу маусымы алдын алуға болатын қайғылы оқиғалармен қатар жүреді.
Дүниежүзілік суға батудың алдын алу күніне орай Қазақстан Республикасы ТЖМ #СоңғыЖүзу ақпараттық акциясын бастайды. Акцияның басты мақсаты – судағы қауіпсіздік ережелерін елемеу адам өміріне қауіп төндіретінін әрбір азаматтың есіне салу.
Шомылу маусымы басталғалы бері ТЖМ құтқарушылары 177 адамды, оның ішінде 62 баланы құтқарды. Соған қарамастан, су айдындарында 93 адам, оның ішінде 30 бала қаза тапты.
Қайғылы оқиғалардың басым бөлігі шомылуға арналмаған және жабдықталмаған орындарда орын алады. Әрбір статистиканың артында адам өмірі, өз жақынын күткен отбасы мен туған-туыстарының қайғысы тұр.
Қазақстан Республикасы ТЖМ қарапайым қауіпсіздік ережелерін сақтауға шақырады:
- тек рұқсат етілген және жабдықталған орындарда шомылыңыз.
- шомылуға тыйым салынған жерлерге суға түспеңіз.
- су жағасында демалу кезінде алкогольдік ішімдіктерді тұтынбаңыз.
- белгіленген қалқыма белгілерден асып жүзбеңіз.
- көпірлерден, жарқабақтардан және басқа да қауіпті орындардан суға секірмеңіз.
- су көліктерінен қауіпсіз қашықтықты сақтаңыз.
- балаларды су жағасында ешқашан қараусыз қалдырмаңыз.
#СоңғыЖүзу акциясына қосылыңыз. Осы үндеуді жақындарыңызбен және достарыңызбен бөлісіңіз. Мүмкін, дәл сіздің ескертуіңіз біреуге дұрыс шешім қабылдауға және адам өмірін сақтап қалуға көмектесер.
Өзіңізді және жақындарыңызды сақтаңыз. Су немқұрайлылықты кешірмейді.
Қостанай облысы Қарасу ауданының Жамбыл ауылында 219-шы «Ауыл құтқарушылары» ерікті өртке қарсы құралымы ашылды. Жамбыл ауылы аудан орталығы – Қарасу ауылынан 65 шақырым қашықтықта орналасқан. Жаңа өрт сөндіру бекеті шамамен 800 тұрғыны бар Жамбыл және Павловское елді мекендерін өрттен қорғауды қамтамасыз етеді.
Жобаны іске асыру және өрт сөндіру бекетін салу жергілікті серіктестік пен шаруа қожалықтарының қолдауының арқасында мүмкін болды. Мұнда еріктілердің қызмет атқаруы үшін барлық қажетті жағдай жасалған. Өрт сөндіру бекетіне Төтенше жағдайлар министрлігі тарапынан өрт сөндіру автоцистернасы, өрт-техникалық жарақтар, өрт сөндірушілердің жауынгерлік киім жиынтықтары және байланыс құралдары берілді.
Бүгінде «Ауыл құтқарушылары» өрт сөндіру бекеттері ауылдық елді мекендердің өрт қауіпсіздігін қамтамасыз етуде маңызды рөл атқарады. Олар өрттер мен басқа да төтенше жағдайларға ден қою уақытын қысқартуға ықпал етіп, Қостанай облысы тұрғындарын қорғауға елеулі үлес қосып келеді.
Қазақстан Республикасы Төтенше жағдайлар министрінің бұйрығымен полковник Тілеуберді Серікбайұлы Мәдиев Шымкент қаласы Төтенше жағдайлар департаментінің бастығы болып тағайындалды. Бұған дейін ол осы Департамент бастығының бірінші орынбасары қызметін атқарған.
2009 жылы Қазақстан Республикасы ТЖМ Көкшетау техникалық институтын, 2022 жылы Ресей ТЖМ Азаматтық қорғау академиясын бітірген.
Азаматтық қорғау органдарында 2005 жылғы тамыздан бастап қызмет атқарып келеді. Қызмет өткерген жылдарында қарауыл бастығынан аумақтық бөлімше басшысына дейінгі еңбек жолынан өтті. Аумақтық және орталық деңгейлерде айтарлықтай практикалық жұмыс тәжірибесі бар. Шығыс Қазақстан облысы, Алматы қаласы Төтенше жағдайлар департаменттерінде, Мәлік Ғабдуллин атындағы Азаматтық қорғау академиясында, ТЖМ орталық аппаратында қызмет атқарды.
Ақмола облысы Бұланды ауданының Никольское ауылында 218-ші «Ауыл құтқарушылары» ерікті өртке қарсы құралымы ашылды. Бекет ең жақын мамандандырылған өрт сөндіру бөлімінен 58 шақырым қашықтықта орналасқан және жалпы саны шамамен 2 мың адам тұратын 3 елді мекеннің өрт қауіпсіздігін қамтамасыз етеді.
Бүгінде бекет тиісті даярлықтан өткен және тәулік бойы кезекшілік атқаруға дайын толықтай жеке құраммен жасақталған. Жедел ден қою мақсатында ТЖМ бөлімшесі ерікті құралымға өрт сөндіру автоцистернасын, қажетті жабдықтарды, арнайы киім-кешек пен байланыс құралдарын табыстады.
Еріктілерді даярлауды ТЖД мамандары ұйымдастырды. Олар өрт сөндіру техникасы мен жабдықтарын пайдалану, өрт-техникалық жарақты және байланыс құралдарын қолдану, өртті сөндіру тактикасы, сондай-ақ төтенше жағдайларды жою кезіндегі іс-қимылдар бойынша арнайы оқытудан өтті. Дайындықтан өткен еріктілер оқиға орнына жедел жетіп, өртті бастапқы кезеңінде оқшаулап, мемлекеттік өртке қарсы қызмет бөлімшелері келгенге дейін қажетті көмек көрсете алады.
Мұндай жобаларды іске асыру шалғай елді мекендердегі төтенше жағдайларға ден қою уақытын қысқартуға ықпал етеді және ТЖМ-нің ауылдық өрт сөндіру бекеттері желісін дамытуға бағытталған ведомстволық бағдарламасының міндеттеріне сәйкес келеді.
Апаттар медицинасы орталығы ағымдағы жылдың бірінші жартыжылдығындағы қызметінің қорытындысын шығарды. Төтенше жағдайлар министрлігі жүйесінің мамандандырылған ұйымы ретінде Орталық тәулік бойы төтенше жағдайлар, жол-көлік оқиғалары және басқа да шұғыл жағдайлар кезінде зардап шеккендерге жедел медициналық көмек көрсетуге тұрақты дайындықты қамтамасыз етеді.
Апаттар медицинасы орталығының құрылымында еліміздің барлық аумағында жедел ден қоюды қамтамасыз ететін 20 филиал жұмыс істейді. Биылғы жылдың бірінші жартыжылдығында Орталық бөлімшелері 4 942 рет шақыртуға шықты, оның ішінде 538-і жол-көлік оқиғаларына қатысты болды. Есепті кезеңде 1 836 зардап шегушіге шұғыл медициналық көмек көрсетіліп, 782 адам әрі қарай ем алу үшін медициналық ұйымдарға жеткізілді.
Шұғыл ден қою жүйесінде трассалық медициналық-құтқару бекеттері маңызды рөл атқарады. Алты ай ішінде олар 849 рет шақыртуға шығып, 1 199 зардап шегушіге көмек көрсетті.
Апаттар медицинасы орталығы шұғыл медициналық ден қою жүйесін одан әрі жетілдіру жұмыстарын жалғастыруда. Дамудың басым бағыттарының қатарында филиалдар мен трассалық медициналық-құтқару бекеттерінің материалдық-техникалық базасын нығайту, бөлімшелерді заманауи медициналық техникамен, санитариялық автокөлікпен және байланыс құралдарымен жарақтандыру, ден қою жеделдігін және іс-қимылдарды үйлестіруді арттыру үшін заманауи цифрлық технологияларды енгізу, медицина қызметкерлері мен құтқарушылардың біліктілігін арттыру, бірлескен оқу-жаттығулар мен жаттығулар өткізу, мемлекеттік органдармен және шұғыл әрекет ету қызметтерімен өзара іс-қимылды жетілдіру көзделген. Осы бағыттарды дәйекті түрде іске асыру шұғыл медициналық көмектің тиімділігін арттырып, халықтың қауіпсіздік деңгейін одан әрі жоғарылатуға мүмкіндік береді.
Апаттар медицинасы орталығы қызметкерлерінің күнделікті еңбегі азаматтардың өмірі мен денсаулығын сақтауға бағытталған. Мамандардың жоғары кәсібилігінің, 20 филиалдан тұратын желінің тиімді жұмысының және ден қою жүйесінің үздіксіз жетілдірілуінің арқасында Орталық өзінің ең маңызды міндеттерінің бірі – төтенше жағдайға тап болған әрбір азаматқа дер кезінде көмек көрсетуді табысты орындауды жалғастырып келеді.
Жетісу облысы Панфилов ауданының Айдарлы ауылында 217-ші «Ауыл құтқарушылары» ерікті өртке қарсы құралымының ашылу салтанаты өтті. Жаңа өрт сөндіру пункті Айдарлы, Дарбазақұм және Сарпылдақ ауылдарының өрт қауіпсіздігін қамтамасыз етеді. Аталған елді мекендерде жалпы саны 2500-ге жуық адам тұрады.
Іс-шараға Жетісу облысы Төтенше жағдайлар департаменті бастығының бірінші орынбасары Адамбек Оразалинов, Панфилов ауданының әкімінің орынбасары Төлеухан Керімбеков және ауыл тұрғындары қатысты.
Өрт сөндіру пункті жергілікті атқарушы органдардың қолдауымен ашылды. Мұнда диспетчерлік бөлме, жеке құрамның демалыс және тұру бөлмелері, тұрмыстық үй-жайлар, сондай-ақ арнайы техникаларға арналған бокс қарастырылған. Қазақстан Республикасы Төтенше жағдайлар министрлігі тарапынан өрт сөндіру техникасы, байланыс құралдары мен жабдықтар берілді. Жетісу облысы ТЖД қызметкерлері еріктілерді оқытып, олардың практикалық дағдылары мен төтенше жағдайлар кезінде әрекет ету дайындығын жетілдіретін болады.
Бөлімше қажетті жеке құраммен толық жасақталған, бұл төтенше жағдайларға жедел ден қоюға мүмкіндік береді. Сонымен қатар өрт сөндіру пунктінің аумағында абаттандыру және көгалдандыру жұмыстары жүргізіліп, жасыл желектер отырғызылды. Салтанатты ашылу рәсімі барысында Жетісу облысы ТЖД мен аудан әкімдігі тарапынан жобаның жүзеге асуына үлес қосқан қызметкерлер мен қатысушылар марапатталды.
Қазақстанда сел қаупінің алдын алу және сел жүру қаупі бар кезеңде халықтың қауіпсіздігін қамтамасыз ету бойынша жұмыстар жалғасуда.
Бүгінгі таңда елімізде Алматы және Шымкент қалаларында, Алматы, Шығыс Қазақстан, Жамбыл, Түркістан, сондай-ақ Жетісу және Абай облыстарында орналасқан 496 сел қаупі бар учаске есепке алынған.
Төтенше жағдайларға жедел ден қою мақсатында ТЖМ «Қазселденқорғау» ММ құрамында жалпы саны 117 адамнан тұратын 11 авариялық-механикаландырылған бригада құрылып, 61 бірлік арнайы техника жұмылдырылды.
Гидрометеорологиялық жағдайға тәулік бойы мониторинг жүргізуді «Қазселденқорғаудың» 30 диспетчерлік пункті мен жыл бойы жұмыс істейтін 79 бақылау бекеті қамтамасыз етеді. Сел қаупі кезеңінде қосымша 38 маусымдық бекет ашылды. Ықтимал қауіпті учаскелерде 133 ескерту тақтайшасы орнатылды.
Профилактикалық жұмыстар аясында «Қазселденқорғау» мамандары ТЖМ аумақтық бөлімшелерімен бірлесіп, сел қаупі бар учаскелерге 541 жерүсті және 16 әуеден визуалды тексеру жүргізді.
Қазіргі уақытта Алматы қаласында, Алматы және Жетісу облыстарында орналасқан 15 мұздақ көлде алдын алу жұмыстар жүргізу жоспарланған. Іс-шаралар кешені сел қаупін уақтылы анықтауға, төтенше жағдайлардың алдын алуға және халық пен инфрақұрылым нысандарының қауіпсіздігін қамтамасыз етуге бағытталған.
Қазақстан ТЖМ сел қаупі бар барлық өңірлерде сел жағдайын жүйелі түрде мониторинг жүргізу және алдын алу шараларын іске асыру бойынша жұмыстарын жалғастыруда.
ҚР ТЖМ Стратегиялық жоспарлау және жедел басқару орталығында «Өрт қауіпті кезеңнің өтуі туралы» тақырыбында брифинг өтті. Спикерлер: ТЖМ Өртке қарсы қызмет комитетінің төрағасы Төрегелдиев Ерлан Аблайұлы, сондай-ақ ҚР ЭТРМ Мемлекеттік бақылау, орманды қорғау және сақтау басқармасының басшысы Нияз Жолбарыс Арыстанұлылі.
Ерлан Төрегелдиев хабарлағандай, биылғы өрт қауіпті кезең күрделі ауа райында өтуде. Еліміздің бірқатар жерлерінде ауа температурасының жоғары болуы, қатты жел мен ауаның төмен ылғалдылығы табиғи және дала өрттерінің тез таралуына әсер етуде. Жағдай Төтенше жағдайлар министрлігінің тұрақты бақылауында. Барлық бөлімшелер күшейтілген режимде жұмыс істеуде. Тәулік бойы мониторинг жасалуда, күштер мен құралдар жедел әрекет етуге дайын. Қазіргі уақытта табиғи және дала өрттерінің басым бөлігі бастапқы кезеңде сөндірілуде. Бұл ірі төтенше жағдайлардың болуына жол бермей, халықтың қауіпсіздігін қамтамасыз етуге мүмкіндік береді.
Елімізде өрт қауіпті кезең басталғаннан бері 451 орман өрті, 8 дала өрті және 1328 құрғақ шөптің жану жағдайы тіркелді.
Оған «Семей орманы» резерваты аумағындағы орман өртін сөндіру жұмыстары нақты мысал бола алады. Өрт анықталған сәттен бастап/ күштер мен құралдар жедел ұйымдастырылып, жедел штаб құрылды. Барлық мемлекеттік органдардың бірлескен жұмысы ұйымдастырылды. Өртті сөндіруге Төтенше жағдайлар министрлігі, Экология және табиғи ресурстар министрлігі, Ішкі істер министрлігі, Қорғаныс министрлігі, Ұлттық қауіпсіздік комитеті шекара қызметі, жергілікті атқарушы органдар және орман шаруашылығы қызметтерінің бөлімшелері қатысты. Жалпы саны 800-ден астам жеке құрам, 204 техника және 8 әуе кемесі жұмылдырылды. Авиацияның рөлі ерекше болды. 380 рет су төгіліп, өрт ошақтарына 900 тоннадан астам су жеткізілді. Қабылданған жедел шешімдер мен барлық қызметтердің бірлескен жұмысының арқасында өрттің әрі қарай таралуына жол берілмеді.
Ең бастысы – өрттің елді мекендерге таралуына жол берілмей, азаматтардың қауіпсіздігі қамтамасыз етілді. Қазіргі уақытта аумақта қайта тұтанудың алдын алу жұмыстары жалғасуда.
Айта кету керек, бүгінгі нәтижеге азаматтық қорғау жүйесін күшейту бағытында жүргізілген жұмыстардың арқасында қол жеткіздік. Мемлекет басшысының тапсырмасына сәйкес соңғы жылдары Төтенше жағдайлар министрлігінің материалдық-техникалық базасы күшейтілді.
Өрт сөндіру және арнайы техникалар жаңартылып, авиацияның мүмкіндіктері кеңейтілуде. Заманауи байланыс құралдары мен цифрлық технологиялар енгізілуде. Сонымен қатар, ұшқышсыз ұшу аппараттары мен ғарыштық мониторинг жүйелері белсенді қолданылып келеді. Бұл өрт ошақтарын дер кезінде анықтап, жедел шешім қабылдауға мүмкіндік береді.
Бүгінде Төтенше жағдайлар министрлігінің бөлімшелері табиғи өрттерге бұрынғыдан әлдеқайда жылдам әрекет етеді. Мұны биылғы өрт қауіпті кезеңнің нәтижелері де айқын көрсетіп отыр.
Біздің басты міндетіміз – азаматтардың қауіпсіздігін қамтамасыз ету, орман қорын сақтау және елді мекендерді өрттен қорғау. Мемлекеттік органдардың, еріктілердің және жергілікті тұрғындардың бірлескен жұмысы табиғи өрттердің алдын алуға және оларды жедел сөндіруге көмектесіп келеді.
Алда жаз мезгілінің ең күрделі кезеңі тұр. Осыған байланысты Төтенше жағдайлар министрлігінің күштері мен құралдары жоғары дайындық режимінде қызмет атқаруда. Өрт қауіпті аумақтарға мониторинг күшейтіліп, қосымша патрульдеу ұйымдастырылды. Авиация мен техника кез келген жағдайға дайын тұр.
Азаматтардың қауіпсіздігін қамтамасыз ету, орман қорын сақтау және елді мекендерді қорғау – Төтенше жағдайлар министрлігінің басты міндеттерінің бірі.
ТЖМ өрт қауіпсіздігінің қарапайым ережелерін сақтауға шақырады:
- орман алқаптары мен ашық аумақтарда от жақпаңыз;
- жанған сіріңке мен сөндірілмеген темекі тұқылын тастамаңыз;
- табиғат аясында шыны ыдыстарды қалдырмаңыз, себебі күн сәулесі шыны арқылы өтіп, құрғақ шөптің тұтануына себеп болуы мүмкін;
- өрт болған жағдайда 101 немесе 112 нөміріне дереу хабарлаңыз.