«Ауыл құтқарушылары» ведомстволық бағдарламасын іске асыру аясында еліміздің өңірлерінде ауылдық жерлердегі өрт қауіпсіздігі жүйесін нығайтуға бағытталған жүйелі жұмыс жалғасуда. Ерікті өртке қарсы құралымдары өрт сөндіру пункттері желісінің кеңеюі төтенше жағдайларға жедел ден қою уақытын едәуір қысқартып, ауыл тұрғындарының өмірі мен мүлкінің қорғалу деңгейін арттыруға мүмкіндік береді.
Бүгін Ақтөбе облысы Қобда ауданының Терісаққан ауылында жаңа өрт сөндіру пунктінің салтанатты ашылуы өтті. Іс-шараға ТЖМ Өртке қарсы қызмет комитеті төрағасы Ерлан Төрегелдиев, Ақтөбе облысы әкімінің орынбасары Ғалымжан Елеуов, облыстық ТЖД басшылығы, жергілікті атқарушы органдардың өкілдері және ауыл тұрғындары қатысты. Аталған өрт сөндіру пунктінің құрылысы ауыл тұрғыны, шаруа қожалығының басшысы Ерлан Қаспақовтың тікелей қолдауымен жүзеге асқанын атап өткен жөн. Жаңа пункт өңірдің өртке қарсы қорғау жүйесіне енгізіліп, жалпы саны 1 815 адамды құрайтын үш елді мекеннің қауіпсіздігін қамтамасыз етеді.
Атырау облысы Махамбет ауданының Ақжайық ауылында қайта жаңғыртудан кейін өрт сөндіру бекеті пайдалануға берілді. Ол халқы 1 197 адамды құрайтын елді мекеннің өрт қауіпсіздігін қамтамасыз етеді. Нысан тәулік бойы қызмет атқаруға арналған барлық қажетті қызметтік-тұрмыстық бөлмелермен жабдықталған. Материалдық-техникалық жарақтандыру құрамына өрт сөндіру және құтқару құралдары, байланыс құралдары мен жеке құрамның арнайы киімдері кіреді.
Қарағанды облысы Осакаров ауданының Жұлдыз ауылында «Звёздное» ЖШС шаруа қожалығының базасында өрт сөндіру пункті өз жұмысын бастады. Аталған пункт жалпы саны 3 700 халқы бар бес елді мекеннің өрт қауіпсіздігін қамтамасыз етеді. Пункт жыл бойы жұмыс істейді, барлық қажетті қызметтік-тұрмыстық жағдайлармен жарақталған. Оның иелігінде өрт сөндіру автоцистернасы бар, жеке құрам толықтай жауынгерлік киіммен және қажетті жарақтармен қамтамасыз етілген.
Абай облысы Жаңасемей ауданы Қараөлең ауылдық округінің Қайнар ауылында жаңғыртылған өрт сөндіру пунктінің салтанатты ашылуы өтті. Іс-шараға Абай облысы ТЖД бастығының орынбасары Алексей Штыкель, аудандық ТЖ бөлімінің қызметкерлері, жергілікті атқарушы органдар мен ауыл тұрғындары қатысты. Пункт Қайнар ауылына, Қараөлең ауылдық округіне және 30-дан астам қыстаққа қызмет көрсетіп, 350 үй мен 1 398 тұрғынды қамтиды. Нысан заманауи инфрақұрылыммен және үш бірлік өрт сөндіру техникасымен жабдықталған.
Өрт сөндіру пункттерін салу және дамыту жұмыстары жергілікті атқарушы органдардың, бизнес өкілдерінің және бейжай қарамайтын азаматтардың белсенді қолдауымен жүзеге асырылуда.
«Ауыл құтқарушылары» бағдарламасын іске асыру ауылдық жерлердегі қауіпсіздік деңгейін арттырып, шалғай елді мекендер тұрғындарының өмірі мен мүлкін қорғауда маңызды рөл атқарады.
2025 жылы азаматтық қорғау органдарында сыбайлас жемқорлыққа қарсы іс-қимыл саласында оң динамика байқалды: тіркелген сыбайлас жемқорлық қылмыстарының саны екі есе қысқарды.
Мұндай нәтижеге Мемлекет басшысының тапсырмаларына және Қазақстан Республикасының 2022–2026 жылдарға арналған сыбайлас жемқорлыққа қарсы саясат тұжырымдамасына сәйкес жүргізілген жүйелі жұмыстың арқасында қол жеткізілді.
Кешенді профилактикалық жұмыс сыбайлас жемқорлыққа қарсы комплаенс-қызметтердің жұмыс істеуін, корпоративтік этика кодекстерін, ережелер мен нұсқаулықтарды енгізуді, сондай-ақ мүдделер қақтығысын реттеу жөніндегі шараларды қамтиды. Сыбайлас жемқорлық тәуекелдеріне ішкі талдау барлық ведомстволарда және бағынысты ұйымдарда жүргізіледі.
Процедуралардың ашықтығын арттыру мақсатында өрт және өндірістік қауіпсіздік саласындағы бақылау функцияларын атқаратын қызметкерлер бейне тіркегіш құрылғыларымен қамтамасыз етілген. Жүйелі түрде ақпараттық-талдамалық шолулар, оқу іс-шаралары және «AMANAT» партиясының өңірлік филиалдары мен құқық қорғау органдарымен бірлескен бастамалар өткізіледі.
2025 жылы 278 жедел кеңес, 126 оқу семинары мен дәріс, 139 бірлескен бастама және сыбайлас жемқорлық пен басқа құқық бұзушылықтар үшін сотталған тұлғалардың ұстау жағдайымен танысу үшін 17 шығу ұйымдастырылды.
Сонымен қатар, ТЖМ мен Төтенше жағдайлар департаменттерінде құқық бұзушылықтарды алдын алу және анықтау бойынша өкілеттіктерге ие өзіндік қауіпсіздік бөлімшелері құрылды.
Бұл іс-шаралардың кешенділігі мен кезеңділігі сыбайлас жемқорлық тәуекелдерінің айтарлықтай төмендеуін қамтамасыз етіп, қоғамның азаматтық қорғау органдарына деген сенімін нығайтты. Жылдың оң нәтижелері таңдалған тәсілдің тиімділігін растайды және сыбайлас жемқорлыққа қарсы жұмысты әрі қарай жетілдірудің негізін құрайды.
«Мұз» насихаттау-профилактикалық акциясы аясында қысқы кезеңде су айдындарында азаматтардың қауіпсіздігін қамтамасыз етуге бағытталған кешенді іс-шаралар өткізілуде. Бүгінгі күнге дейін 10,5 мыңнан астам рейд мен патрульдеу ұйымдастырылып, 57 мыңнан астам азаматпен алдын алу әңгіме жүргізілді, 15 мың балықшыға нұсқаулық берілді. Құтқару бөлімшелерінің үйлесімді жұмысының арқасында 11 адам, оның ішінде 7 бала құтқарылды.
Төтенше жағдайлар департаменттерінің қызметкерлері полиция мен волонтерлермен бірге күнделікті рейдтік іс-шаралар мен түсіндіру жұмыстарын жүргізеді.
Астана қаласында қалалық құтқарушылар жағалау аймақтары мен жұқа мұз жатқан учаскелерді тұрақты түрде патрульдейді. Рейдтер барысында балықшылар мен су айдындарының жанында жүрген азаматтармен алдын алу жұмыстары жүргізіледі. Жетуі қиын су айдындарын жедел тексеру үшін квадроцикл пайдаланылады, бұл заң бұзушылықтарды уақытында анықтауға және адамдардың қауіпті мұзға шығуына жол бермеуге мүмкіндік береді.
Атырау облысында ТЖД қызметкерлері полиция департаментімен бірлесіп Жайық өзенінің бойында рейдтер ұйымдастырды. Құтқарушылар балықшыларға суда қауіпсіздік ережелерін еске салды және ықтимал қауіптер туралы ескертті. Өңір тұрғындарына қауіпсіздік талаптарын қатаң сақтау ұсынылады.
Шығыс Қазақстан облысында қысқы кезеңнің басталуынан бері мұз үстінде 360-тан астам профилактикалық рейд өткізілді. Іс-шараларға волонтерлер мен полиция қызметкерлері қатысады, тұрақты түрде нұсқаулықтар жүргізіледі. Су айдындарында қауіпсіздік ережелерін бұзғаны үшін 23 адам әкімшілік жауапкершілікке тартылды. Құтқарушылар автокөліктің мұзға шығуы өте қауіпті екенін атап көрсетеді.
Жетісу облысында ТЖ департаменті полиция қызметкерлерімен және волонтерлермен бірлесіп су айдындарында қауіпсіздікті қамтамасыз етуге арналған профилактикалық іс-шара өткізді. Негізгі назар қысқы балық аулау кезінде болатын оқыс оқиғалардың алдын алуға аударылды. Акция барысында азаматтарға мұздағы қауіпсіз мінез-құлықтың негізгі ережелері еске салынып, қазіргі таңда облыстағы су айдындарда мұз әлі қалыптаспағаны, оның қалыңдығы қауіпсіздік нормаларына сәйкес келмейтіні түсіндірілді.
Қызылорда облысында рейдтік іс-шаралар күнделікті өткізіледі. Рейдтер барысында құтқарушылар Сырдария өзенінің жағасында балықшылармен және су айдындарының жанында жүрген азаматтармен түсіндіру жұмыстарын жүргізеді, қауіпсіздік шараларын және жұқа мұзға шығудың мүмкін болатын салдарын еске салады.
ТЖМ су айдындарында қауіпсіздік ережелерін сақтау қажеттігін ескертеді. Бір адам үшін мұздың қауіпсіз қалыңдығы кемінде 10 см болуы тиіс, ал қараңғы уақытта, нашар көріну кезінде, мұз қата бастаған және еру кезеңінде мұзға шығуға қатаң тыйым салынады! Мұздың қалыңдығы 10-25 см аралығында болған жағдайда мұз астынан балық аулауға тек құтқару жилеті болған кезде рұқсат етіледі!
Мұзда болған кезде:
1) мұздың жұқа және қатпаған жерлеріне шығуға;
2) мұздың жекелеген (қауіпті) учаскелерінде топтармен жиналуға;
3) мұздағы ойықтарға, жарықшақтарға жақындауға;
4) өткелдер үшін бөлінген орындардың шекарасынан тыс көлік құралдарымен мұзға шығуға;
5) от жағуға;
6) 20 сантиметрден аз қашықтықта екі ойық, ал басқа жұп ойықтардан 2 метрден аз қашықтықта екі ойық жасауға;
7) мұзда жабдықтар мен қоқыстарды қалдыруға жол берілмейді.
ТЖМ азаматтарды абай болуға, өз өміріне және айналасындағы адамдардың өміріне қауіп төндірмеуге шақырады. Қарапайым қауіпсіздік шараларын сақтау апаттарды болдырмауға көмектеседі.
Еліміздің түрлі өңірлеріндегі азаматтық қорғау органдарының қызметкерлері жыл қорытындысы бойынша беделді қоғамдық және кәсіби номинациялар жеңімпазы атанып, жоғары дайындық деңгейін, кәсібилігін және өз ісіне адалдығын көрсетті.
Батыс Қазақстан облысында «Жұмысшы мамандықтар жылы – 2025» аясында Орал қаласында жастардың үздік өкілдері анықталды. Орал қаласының Төтенше жағдайлар басқармасының инженері Асланбек Хайруллин «Үздік құтқарушы» құрметті атағын иеленді. Бұл марапат оның қызметтік міндеттерін атқару барысында көрсеткен ерлігін, рух күшi мен жауапкершілігін мойындау болды.
Қызылорда облысында ТЖД Жедел-құтқару жасағы басшысының орынбасары, сүңгуір-құтқарушы халықаралық атағының иегері Мейрамбек Доспенбетов халықтың дауыс беру нәтижесінде жеңімпаз атанып, «Жыл қорғаушысы – Защитник года» атағын иеленді. Марапаттау рәсімі Қызылорда облысының Өнер орталығында өтті, онда түрлі саладағы үздік өкілдер марапатталды. Жеңімпазға арнайы мүсінше мен диплом табысталды. Лауреаттардың құрметіне республикалық белгілі өнерпаздар мен облыстық филармонияның шығармашылық ұжымдары қатысқан мерекелік концерт ұйымдастырылды.
Абай облысында ТЖД қызметкері «Бүгінгі күннің қаһарманы» деп танылды. Семей қаласында қала әкімінің «Мемлекеттік жастар саясатын іске асыруға қосқан үлесі үшін» атты жыл сайынғы сыйлығын табыстау рәсімі өтті. Семей қаласы ТЖ басқармасы азаматтық қорғау тобының аға офицері Темірлан Амантаев ең маңызды номинациялардың бірінің лауреаты атанды. Марапатты қала әкімі Әділет Қожанбаев табыстады. Бұл жеңіс оның кәсібилігін, жоғары жауапкершілігін және азаматтардың қауіпсіздігін қамтамасыз етуге қосқан күнделікті үлесін айқын дәлелдеді.
ТЖМ қызметкерлерінің жетістіктері жанқиярлық еңбек, тәуекелге дайындық пен адамдарға қызмет ету басты құндылықтар болып қалатын азаматтық қорғау саласындағы қызметтің беделін және маңызын көрсетеді.
.
Еліміздің өңірлеріндегі тұрғын секторда өрт қауіпсіздігі ережелерін сақтау және жылыту маусымында улы газбен уланудың алдын алу бағытындағы ауқымды профилактикалық жұмыстар жалғасуда. Басты назар әлеуметтік осал топтарға тиесілі үйлерге аударылған.
Жылыту маусымы басталғаннан бері әлеуметтік осал топтарға тиесілі тұрғын үйлерге 34 876 өрт қауіпсіздігі датчигі орнатылды. Профилактикалық іс-шараларға аула аралау, халық арасында түсіндіру жұмыстарын жүргізу, улы газ датчигін орнату, сондай-ақ пешпен жылыту жүйесін тексеру және жөндеу кіреді.
Шығыс Қазақстан облысында ТЖД құтқарушылары тұрғын үйлерді шамамен 34 800 рет аралады. Тұрғындарға өрт қауіпсіздігі талаптары егжей-тегжейлі түсіндірілуде. Өңірде дауылды ескерту жарияланған: суық антициклон сақталып, ауа температурасы төмендеуде. Осыған байланысты құтқарушылар азаматтарды электр жылыту құралдарын қолданғанда қауіпсіздік шараларын қатаң сақтауға шақырады: электр желісін шамадан тыс жүктемеу, құралдардың жұмыс істеуін бақылау, әсіресе түнде оларды қараусыз қалдырмау қажет. ТЖД қызметкерлері ақаулы және өрт қаупі бар пештерді жөндеуге де көмек көрсетеді. Глубоковское ауданы бойынша әлеуметтік осал отбасылардың үйлерінде пешпен жылыту жүйесін қалпына келтіру жұмыстары жүргізілді.
Жамбыл облысында профилактикалық іс-шаралар Шу ауданының аумағында жүргізілді. Жұмыс барысында құтқарушылар 130 улы газ датчигін орнатып, 20 мұржаны тазалады. Әлеуметтік осал топтарға тиесілі үйлерге ерекше назар аударылды.
Жетісу облысында өрт хабарлағыш трагедияның алдын алды. 2025 жылғы 2 желтоқсанда Сарқан қаласында 112 пультіне тұрғын үйдегі түтінді өрт хабарлағыш іске қосылғаны туралы хабар түсті. Үйде үй иесі мен оның төрт немересі болған. Оқиға орнына келіп жеткен өрт сөндіру бөлімшелері пештің жанында бөлме аралық қабырғаның бықсығанын анықтады. Өрт уақытында сөндірілді, оттың таралуы мен бөлмелерді түтін басуына жол берілмеді, зардап шеккендер жоқ. Хабарлағыш ТЖМ қызметкерлерінің алдын алу жұмыстары аясында қараша айында орнатылған еді. Дәл оның уақытылы іске қосылуы қауіпті ерте кезеңде анықтауға мүмкіндік берді.
ТЖМ азаматтарға тұрғын үйлерді түтінді өрт хабарлағышпен жабдықтаудың, пештерді, мұржаларды және электр сымдарын үнемі тексерудің, сондай-ақ балаларды қараусыз қалдырмаудың маңыздылығын еске салады.
Адамды құтқару кезінде көрсеткен батылдығы, ержүректілігі және жанқиярлығы үшін Шығыс Қазақстан облысы ТЖД Өскемен қаласы Төтенше жағдайлар басқармасы № 6 өрт сөндіру бөлімінің бөлімше командирі Ринат Жылқышинов «Ерлігі үшін» мемлекеттік медалімен наградталды.
Шығыс Қазақстан облысының әкімі Нұрымбет Сақтағанов салтанатты жағдайда батырға жоғары награданы табыс етіп, оның кәсібилігін, батылдығын және азаматтық қорғау қызметіне адалдығын атап өтті.
Естеріңізге сала кетейік, 2025 жылдың 11 маусымында Өскемен қаласындағы бес қабатты тұрғын үйдің пәтерінде өрт шықты. Оқиға орнына жеткен кезде Ринат Жылқышинов газ-түтіннен қорғау қызметінің тобы құрамында қатты түтін жағдайында барлау жүргізді. Тұрғын үйде іздестіру барысында ол 1946 жылы туған пәтер иесін тапты. Өрт сөндіруші зардап шеккен адамға құтқару қалпағын кигізіп, оны қауіпті аймақтан эвакуациялап, шұғыл медициналық көмек бригадасының дәрігерлеріне тапсырды. ТЖД қызметкерінің жылдам және сауатты әрекеттерінің арқасында адам өмірін құтқарып қалуға мүмкіндік туды.
Ринат Жылқышиновтың ерлігі кәсібіне адалдықтың айқын үлгісі болып табылады, сондай-ақ азаматтық қорғау органдарының барлық қызметкерлері үшін лайықты бағдар болып табылады.
Биыл 19 қазанда Қазақстан Республикасының Төтенше жағдайлар министрлігі құрылғанына 30 жыл толуын атап өтті. Айтулы күнге орай ведомствоның қызметкерлері мен ардагерлерін Жер орбитасынан — Халықаралық ғарыш станциясының бортынан құттықтады.
Құттықтау сөздерін Халықаралық ғарыш станциясы экипажының құрамында болған «Роскосмос» мемлекеттік корпорациясының ғарышкерлері Сергей Кудь-Сверчков, Сергей Микаев, Олег Платонов жолдады. Өз үндеулерінде олар қазақстандық құтқарушыларға олардың ержүрек әрі жанқиярлық еңбегі үшін құрмет пен алғысын білдірді.
Құттықтау мәтіні:
Құрметті Қазақстан Республикасы ТЖМ-нің қызметкерлері мен ардагерлері!
Біз, Роскосмос ғарышкерлері — Сергей Кудь-Сверчков, Сергей Микаев және Олег Платонов, сіздерді Халықаралық ғарыш станциясының бортынан сәлем жолдаймыз.
Сіздерді Төтенше жағдайлар министрлігінің құрылғанына 30 жыл толуымен құттықтаймыз. Сіздердің қызметтеріңіз ерлік, жанқиярлық және парызға адалдықтың айқын көрінісі. Сіздер күн сайын адамдардың өмірін құтқарып, халықты түрлі апаттардан қорғап келесіздер. Сіздер бірлік пен рух күшінің үлгісісіздер. Сіздерге амандық, игілік және жаңа жетістіктер тілейміз. Мерекелеріңізбен!
Халықаралық ғарыш станциясынан жолданған құттықтау Қазақстан Республикасының Төтенше жағдайлар министрлігі құтқарушыларының күнделікті еңбегіне көрсетілген қолдау мен құрметтің символына айналды.
Қысқы кезеңде елді мекендер арасындағы автомобиль жолдарына шықпастан бұрын алдағы қозғалыс бағдары бойынша ауа райы болжамын міндетті түрде зерделеген жөн.
Егер қандай да бір елді мекенге бару керек болған жағдайда уақытында және қажет елді мекенге жете алатындай теміржол көлігімен барған дұрыс.
Төменде келтірілген қарапайым ұсынымдарды орындасаңыз, боран болған кезде және бораннан кейін аман қалуға көп көмегін тигізеді.
Қыста жолға шығар алдында:
1. Мұқият ауа райы болжамын зерделеңіз;
2. Қозғалыс үшін қандай жолдар жабылуы мүмкін екенін анықтаңыз. Ақпаратты «Қазавтожол» ҰК» АҚ сайтында толығымен жабық учаскелердің картасынан көруге болады, 1403 телефон нөмірі немесе «112» телефон нөмірі арқылы нақтылауға болады.
«112» қызметінен ресми дауылды ескерту алған жағдайда елді мекендерден және жолға шығудан бас тартқан жөн.
3. Жолға шығуға алдын ала дайындалған жөн:
Машинаны шұғыл жағдайларда қажет болатын қосымша өте керек жүкпен жасақтау: отын қорына арналған канистр (кемінде 20 л) және құюға арналған құйғысымен бірге; тент немесе кемінде 4*3м өлшеміндегі автомобильге арналған қамтама; қарапайым құрал-сайман (күрек); сүйрейтін арқан; шәй құйылған термос пен азық-түлік қоры; сіріңке, шам, құрғақ отын; газ отыны мен дәнеркерлеу лампасы; қолшам мен оның батарейкасының қоры; GPS-навигатор, пауэрбанк; жылы киім жиынтығы; ұйықтайтын қап немесе жүн көрпе, плед;
Машинаның міндетті түрде қосалқы доңғалағы, домкрат, баланға арналған кілт, жөндеу жиынтығы, сорғы, аккумулятор қуаттайтын кәбіл, авариялық тоқтайтын белгі, өртсөндіргіш пен дәрі қобдишасы болуы тиіс.
Ең бастысы автомобиль техникалық жарамды жағдайда болуы тиіс.
Егер жолда келе жатқанда боран басталса:
Егер жолға шыққаннан кейін қолайсыз ауа райы болған кезде (боран, бұрқасын және т.б.), көріну нашарлағанда:
1. Алдыңғы және артқы тұманға қарсы шамдарды, сондай-ақ авариялық оттарды қосу керек.
2. Алдында немесе бүйір жағында кедергі болғанда қауіпсіз тоқтау үшін жылдамдықты біртіндеп азайтқан жөн.
3. Егер көпжолақты жол болса оң жақтағы жолаққа шығыңыз, бұл қар тазалайтын техниканың өтуіне мүмкіндік береді. Бұл жерде басып озу маневрлерін жасамай қажет ара қашықтықты сақтаған дұрыс.
4. Соқпақ жолмен жүрген кезде машинаның төменгі берілісінде аздаған айналыс күшімен, жолдан шықпай жүру керек.
5. Бұрқасын, боран көріну шектеулі болған кезде елді мекеннен алыс белгісіз жерде қар астында немесе тұрып қалуыңыз мүмкін болғандықтан кез келген автожолда қозғалысты жалғастыру қауіпті.
Мүмкіндігінше автотын құю станциясы, жол бойындағы дәмхана, дөңгелек жөндеу пункті, кемпинг, ұзаққа жүретін машиналар тұрағы, парковка және т.б. болуы мүмкін жақын маңдағы қауіпсіз орынға жетіп алған дұрыс.
Тіке жол бойына тоқтамаған жөн.
6. Егер қозғалу мүмкін болмаған жағдайда және көмексіз шыға алмайтын болсаңыз үрейге берілмей бірден 112, 102 шұғыл қызметтерінің телефон нөмірлеріне қоңырау шалыңыз. Навигатордың көмегімен координаттарыңызды анықтаңыз. Өзіңіз координатаңызды, айналадағы отын қоры және т.б. болып жатқан ақпаратты беріңіз. Көмекке міндетті түрде келеді.
Мемлекеттік органдар автомобильдерді лектік ілесіп жүруге шешім қабылдаған жағдайда:
- жол қозғалысы ережелерін сақтаңыз;
- ілесіп жүретін мемлекеттік орган белгілеген жылдамдық режимін сақтаңыз;
- өткізу пунктінен шыққан автомобильдің артынан қатаң лекте қозғалыңыз;
- кез келген шешім қабылдап не тоқтай алатындай, алдында келе жатқан автомобильдің арасындағы қашықтықты сақтаңыз;
- алдыңғы автомобильдерді басып озуға болмайды;
- айналаңыздағы мән-жайды бақылаңыз.
ТЖМ жүйесінде Қазақстан Республикасының Тәуелсіздігімен құрдас қызметкерлер еңбек етуде. Солардың бірі – Қызылорда облысы Төтенше жағдайлар департаменті Азаматтық қорғаныс басқармасының аға офицері Ғафур Ақмырзаев.
Ол 1991 жылы Қызылорда облысы Жалағаш ауданының Жалағаш кентінде туған. 2013 жылы Көкшетау техникалық институтына оқуға түсті. 2013 жылы тәжірибе алмасу бағдарламасы аясында Беларусь Республикасы Төтенше жағдайлар министрлігінің Азаматтық қорғау университетіне ауысып, 2017 жылы аталған оқу орнын бітірді.
Оқу барысында білімімен, тәртібімен және еңбекқорлығымен ерекшеленіп, қатарластарынан қалмай, өзін жақсы қырынан көрсете білді. Ол тек оқу үлгерімімен ғана емес, сондай-ақ түрлі мәдени-қоғамдық іс-шараларға белсене қатысуымен де көзге түсті. Жоғары оқу орындары арасында өткен ұлттық-мәдени фестивальдерге, сондай-ақ Минск қаласында ұйымдастырылған «Қазақстан мәдениеті күндері» атты іс-шараға қатысты. Осындай игі істерінің нәтижесінде университет басшылығынан бірнеше мәрте алғыс хаттарға ие болды. Беларусь Республикасының ТЖМ Командалық-инженерлік институтының 80 жылдығына арналған естелік төсбелгімен наградталды.
2015 жылы университетте білім алып жатқан шетелдік студенттер арасында өткен үстел теннисінен жарыста 1-орынды иеленді. Сондай-ақ Беларусь елінде түсірілген белгілі режиссер Ақан Сатаевтың «Анаға апарар жол» көркем фильмінде қосымша эпизодта Ұлы Отан соғысы жауынгерінің рөлін сомдады.
Мұның барлығы жас курсанттар үшін үлкен мотивация болып табылады. «Мен үшін Беларусьтегі курсанттық күндерім – бірнеше мәрте айтуға тұрарлық қызықты оқиғаларға толы кезең», – дейді ол.
Ол университетті бітіргеннен кейін Қызылорда облысы Төтенше жағдайлар департаменті Төтенше жағдайларды жою бөлімінің аға инженері лауазымына тағайындалды. Ғафур Тәуелсіздік алғаннан кейін дүниеге келген ұрпақтың өкілі ретінде курсанттан азаматтық қорғау органдарының офицеріне дейінгі лауазымдарда абыроймен қызмет атқаруда.
Ғафурдың ұйымдастырушылық қабілеті жоғары деңгейде, ұжымды жұмылдыра біледі. Ол қойылған міндеттердің уақытылы орындалуын қамтамасыз етеді. 2017 жылдан 2025 жылға дейін Қызылорда облысы аумағында өткен «Көктем», «Қыс», «Жер», «Протон» және «Қорғау» республикалық командалық-штабтық оқу-жаттығулар дайындықтары мен өткізілуіне белсене қатысты. Ол кәсібилігін жоғары деңгейде көрсетті. Күрделі және төтенше жағдайларда тез әрекет ете білетіндігі, дұрыс әрі мақсатқа бағытталған шешімдер қабылдай білетіндігі көрсетілді. Өткізілген оқу-жаттығулар нәтижесінде Қызылорда облысына жоғары баға берілді.
«Жас құтқарушылар» клубының жұмысын ұйымдастырады, оның мақсаты балалардың, студенттердің және жастардың түрлі төтенше жағдайларда дағдыларын арттыру, қолжетімділікті, білім мен денсаулықты дамытуға ықпал ету. 2017-2019 жылдары Төтенше жағдайлар департаменті «Жас құтқарушылар» клубының командасын республикалық жарыстарға дайындап, команда жарыстарда жүлделі орындарға ие болды.
2020 жылы Ғафур Қызылорда облысы волонтерлерінің фронт-офисіндегі «Үміт» бағыттарының жетекшісі болып сайланды. Волонтерлер жоғалып кеткен адамдарды іздеу, төтенше жағдайлардың қаупін азайту және табиғи әрі техногендік сипаттағы төтенше жағдайлардың салдарын жою жобаларына қатысты.
Төтенше жағдайларды алдын алу және оларға ден қою мақсатында «Волонтерлер» ұйымдарының волонтерлерін жұмылдырған бірнеше ақпараттық-ағартушылық іс-шаралар жүргізілді.
2023 жылы «Мінсіз қызмет 10 жыл» медалімен наградталды. 2025 жылы «Қызылорданың волонтерлері» қоғамдық қорының алғыс хатымен наградталды.
Жұбайымен бірге екі баланы тәрбиелеп отыр.
Құрметті азаматтық қорғау органдарының қызметкерлері мен ардагерлері!
Сіздерді Қазақстан Республикасының Тәуелсіздік күнімен шын жүректен құттықтаймын!
Бұл мемлекеттік мереке — еліміздің егемендігі мен бірлігінің, тұрақты дамуының айқын белгісі. Тәуелсіздік Қазақстан халқының жауапкершілігі мен жасампаз еңбегінің, тұрақтылыққа ұмтылысы мен мемлекетті нығайту жолындағы табанды еңбегінің нәтижесі.
Азаматтық қорғау қызметі Қазақстан Республикасының дамуына елеулі үлес қосып, жоғары кәсібилікті, тәртіптілікті және таңдаған іске адалдықты көрсетіп келеді. Сіздердің тәжірибелеріңіз, ұйымшылдықтарыңыз және күрделі жағдайларда әрекет етуге дайындықтарыңыз жүйе әлеуетін одан әрі нығайтудың берік негізі болып саналады.
Қызметтің қалыптасуы мен дамуына қосқан үлестері үшін ардагерлерге шынайы алғысымды білдіремін, ал жеке құрамға қызметтік міндеттерін адал атқарғандары үшін ризашылығымды білдіремін.
Сіздерге зор денсаулық, амандық, кәсіби табыс және ертеңгі күнге деген сенім тілеймін.
Қазақстан Республикасының
Төтенше жағдайлар министрі
генерал-лейтенант
Шыңғыс Әрінов