Шетелдік қаржыландыру кезінде қандай есептер ұсынылады

Мониторинг мынадай көздерден алынатын ақшаға және (немесе) өзге де мүлікке қолданылады:

• шет мемлекеттерден;

• халықаралық және шетелдік ұйымдардан;

• шетелдіктерден;

• азаматтығы жоқ адамдардан.

ҚР Салық кодексінің 56-бабының 9-тармағына және № 685 бұйрыққа сәйкес, егер ақша және (немесе) өзге де мүлік 1 теңгеден асатын мөлшерде алынып, төменде көрсетілген қызмет түрлеріне бағытталса, хабарламалар мен мәліметтерді ұсыну міндеті туындайды:

1. Заң көмегін көрсету, оның ішінде:

• құқықтық ақпарат беру;

• азаматтар мен ұйымдардың мүдделерін қорғау және өкілдік ету;

• заңдық консультация беру.

2. Қоғамдық пікірді зерделеу және қоғамдық пікірге сауалнамалар мен әлеуметтанушылық сауалнамалар жүргізу, сондай-ақ олардың нәтижелерін тарату және орналастыру.

Коммерциялық мақсаттарда жүргізілетін қоғамдық пікірге сауалнамалар мен әлеуметтанушылық сауалнамалар бұған жатпайды.

3. Ақпаратты жинау, талдау және тарату.

Мұндай қызмет коммерциялық мақсаттарда жүзеге асырылатын жағдайлар бұған жатпайды.

Шетелден ақшалай қаражат алу фактісінің өзі аталған нысандарды ұсыну міндетінің туындауын білдірмейді. Қаржыландыру көзін, қаражаттың нысаналы мақсатын, қызметтің сипатын және заңнамада көзделген ерекшеліктерді ескеру қажет.