Жаңа Конституция жобасымен таныса отырып, еліміздің болашағына бағытталған маңызды әрі батыл қадам жасалып жатқанын аңғардым. Бұл құжатта адам құқықтары мен бостандықтарын қорғауға ерекше мән берілгені қуантады. Әсіресе, заң үстемдігі, әділдік және қоғам алдындағы ашықтық қағидаттарының күшейтілуі – мемлекет пен халық арасындағы сенімді арттыратын маңызды өзгерістер деп ойлаймын.
Конституциядағы жаңартулар азаматтардың пікірін ескеруге, қоғамдағы әр адамның дауысын маңызды етуге бағытталған. Бұл – шынайы демократиялық мемлекет құру жолындағы нақты қадам. Әр азаматтың құқығы заңмен қорғалып, мемлекеттік шешімдер қабылдау барысында халықтың мүддесі бірінші орынға қойылса, елдің дамуы да тұрақты болары анық.
Жаңа Конституция – тек заңдық құжат қана емес, ол болашақ ұрпаққа қалдырар жауапкершілігіміздің көрінісі. Сондықтан бұл өзгерістерді қолдаймын және әрбір азамат ел тағдырына бейжай қарамай, өз пікірін білдірсе, қоғамымыз одан әрі нығая түседі деп сенемін.
Құдайберген Гүлбаршын Рысқұлов ауылының тұрғыны