Отырар ауданында тұрғындарға 2027 жылдан бастап әлеуметтік төлемдерді ұсыну кезінде азаматтардың әлеуметтік мұқтаждығын бағалау қағидатын қолдануға байланысты түсіндіру жұмыстары жүргізілді.
Жиынға ауыл округтерінің әкімдері, бөлімдер мен мекеме басшылары, әлеуметтік сала мамандары және аудан тұрғындары қатысты.
Жиынды аудан әкімінің орынбасары Айдос Құлмаханов ашып, жүргізді. Ол әлеуметтік қолдау шараларын тиімді ұйымдастырудың, тұрғындарға мемлекеттік әлеуметтік көмектің жаңа тәртібін түсіндірудің және азаматтардың әлеуметтік қажеттіліктерін дұрыс бағалаудың маңыздылығына тоқталды.
Күн тәртібіндегі негізгі мәселе бойынша Түркістан облысы бойынша жұмыспен қамтуды үйлестіру және әлеуметтік бағдарламалар басқармасы басшысының орынбасары Зылиха Садыққызы баяндама жасап, жаңа тәсілдің негізгі бағыттарын түсіндірді.
Кездесу барысында азаматтарды әлеуметтік А, В және С санаттарына бөлу тәртібі, аталған санаттарға жатқызу талаптары, әлеуметтік мұқтаждықты айқындау өлшемдері және әлеуметтік төлемдерді тағайындау кезінде ескерілетін негізгі талаптар кеңінен түсіндірілді.
Мамандардың айтуынша, әлеуметтік қолдау көрсету барысында азаматтардың нақты әлеуметтік жағдайын ескеру, көмектің қажеттілігі мен нысаналы бағытын айқындау маңызды. Осыған байланысты жаңа қағидат халыққа көрсетілетін әлеуметтік көмектің тиімділігін арттыруға және қолдауды шын мәнінде мұқтаж азаматтарға бағыттауға мүмкіндік береді.
Жиын барысында қатысушылар өздерін толғандырған сауалдарын қойып, әлеуметтік төлемдерді тағайындау тәртібі, санаттарға бөлу талаптары және әлеуметтік мұқтаждықты бағалау мәселелері бойынша мамандардан нақты жауаптар алды.
Жиынды қорытындылаған аудан әкімінің орынбасары Айдос Құлмаханов әлеуметтік қолдау саласындағы өзгерістерді тұрғындарға түсіндіру жұмыстарын жүйелі түрде жүргізудің маңыздылығын атап өтті. Сондай-ақ жауапты сала мамандарына жаңа талаптарды халыққа қолжетімді әрі түсінікті түрде жеткізу жөнінде тиісті тапсырмалар берді.
Отырар ауданындағы №1 жалпы білім беретін мектепте ішкі істер органдарының қызметін таныстыру, қазақстандық полицияның оң имиджін қалыптастыру және оқушыларды отансүйгіштікке тәрбиелеу мақсатында «Жас сақшы» полиция сыныбы ашылды.
Салтанатты рәсім ішкі істер органдарында қызмет атқарып, зейнетке шыққаннан кейін өмірден өткен полиция ардагері Шындалиев Әкімбай Шындалыұлын еске алуға арналды.
Жиынға Түркістан облысы Полиция департаментінің басшылығы, Отырар ауданының әкімі, аудандық полиция бөлімінің қызметкерлері, ішкі істер органдары мен Ұлттық ұлан ардагерлері, мектеп ұжымы, оқушылар және марқұмның отбасы мүшелері қатысты.
Отырар ауданы әкімінің орынбасары Айдос Құлмаханов пен ішкі істер саласының ардагері Жұмахан Әбдіқадіров бастаманың маңызын атап өтті. Олар жас ұрпаққа құқықтық тәрбие берудің, тәртіп пен жауапкершілікті қалыптастырудың және полиция қызметінің беделін арттырудың мәніне тоқталды.
Жиын барысында саптық рәсім өтіп, Қазақстан Республикасының Мемлекеттік әнұраны орындалды. Қонақтар жаңа сыныптың жұмысына сәттілік тіледі.
Салтанатты рәсімнің негізгі бөлігі оқушыларды «Жас сақшы» қатарына қабылдау және ант беру рәсіміне арналды. Жас сақшылар Отанға адал қызмет етуге, заңды құрметтеуге, қоғамдық тәртіпті сақтауға және ел тыныштығын қорғауға үлес қосуға ант берді. Оларға жас сақшы туы табысталып, сыныптың ашылу рәсімі өткізілді.
Қатысушылар мектеп фойесінде ұйымдастырылған полиция көрмесін тамашалады. Онда полиция қызметінің бағыттары, арнайы құрал-жабдықтар және құқық қорғау органдарының жұмысы туралы ақпарат ұсынылды. Сондай-ақ оркестрдің орындауында музыкалық шығармалар шырқалды.
Мәжіліс залындағы концерттік бағдарламада мектеп оқушылары мен өнерпаздар патриоттық әндер орындап, сахналық көріністер ұсынды. Бағдарлама аясында «Отырар дастаны» қойылымы көрсетіліп, «Алға, қазақ жігіттері», «Атамекен», «Жалғызым қазақ», «Ерлердің ісі бітер ме», «Түркістаным – тұраным», «Қазақстан» әндері орындалды.
Шындалиевтер отбасы туралы бейнеролик көрсетіліп, Әкімбай Шындалыұлының өмір жолы мен ішкі істер органдарындағы абыройлы қызметі баяндалды. Ардагерлер мен отбасы мүшелері оның ел тыныштығын сақтау жолындағы еңбегін, адамгершілік қасиеттерін және кейінгі ұрпаққа үлгі боларлық өнегесін атап өтті.
«Жас сақшы» полиция сыныбында оқушыларға саптық дайындық, дене шынықтыру, құқықтық, патриоттық және эстетикалық тәрбие бағыттары бойынша сабақтар өткізіледі. Сонымен қатар олардың құқықтық сауаттылығын арттыруға, рухани-адамгершілік қасиеттерін дамытуға және полиция қызметінің ерекшеліктерін таныстыруға басымдық беріледі.
Жаңа сыныптың ашылуы жасөспірімдердің бойында Отанға деген сүйіспеншілікті, заңға құрметті, тәртіп пен жауапкершілікті қалыптастыруға бағытталған. Бұл бастама өскелең ұрпақ пен полиция қызметкерлері арасындағы байланысты нығайтып, құқық қорғау органдарының оң имиджін арттыруға ықпал етеді.
Салтанатты рәсім соңында қатысушылар ел тыныштығын, халықтың амандығын және тәуелсіз Қазақстанның тұғырлы болуын тіледі.
Түркістан облысында дүниежүзілік мақта күніне орай «AQ-DALA – 2026» салтанатты іс-шарасы өтті. Отырар ауданы Қарақоңыр ауылдық округіндегі «Түркістан мақта агроөнеркәсіптік кешені» ЖШС мақта алқабында өткен іс-шараға облыс әкімі Нұралхан Көшеров, өңір тұрғындары мен еңбек адамдары қатысты.
Мемлекет басшысы Қасым-Жомарт Тоқаев қоғамда адал еңбек пен еңбек адамының мәртебесін арттырудың маңызын үнемі айтып келеді. Бүгінгі шара «Адал азамат – Адал еңбек – Адал табыс» қағидатына сүйене отырып, құндылықтардың сабақтастығын айқындайды.
Салтанатты шарада облыс басшысы Нұралхан Көшеров көпшілікті мерекемен құттықтап, ауыл шарушылығы саласындағы жетістіктерге тоқталды.
– Бүгін біз Отырардың ақ даласында жиналып, ақ алтын өсірген азаматтардың еңбегіне құрмет көрсетіп отырмыз. Бұл мерекенің басты кейіпкерлері – дән өсіретін диқандар, өнім жинайтын механизаторлар, су жеткізетін мамандар мен мақтаны өңдейтін еңбеккерлер. Түркістан облысы үшін мақта – негізгі ауыл шаруашылығы дақылдарының бірі. Оны өсіру, жинау және өңдеу мыңдаған тұрғынның еңбегімен байланысты. Сондықтан ақ алтынның қадірі, ең алдымен, оны өсірген адамның еңбегімен өлшенеді. Биыл облыста мақта 173,6 мың гектарға егілді. Қазір алқаптарда жиын-терім жұмыстары жүргізілуде. Маусым қорытындысымен 556 мың тонна мақта жинау көзделуде (32 ц/га). Мемлекет басшысы Қасым-Жомарт Кемелұлы Тоқаев ауыл шаруашылығында озық технологияларды кеңінен енгізіп, су үнемдеуге батыл көшу жөнінде нақты тапсырма берді. Су тапшылығы сезілетін біздің өңір үшін бұл – күнделікті жұмыстың басты бағыты. Бүгінде мақта алқабының 91 мың гектарында су үнемдеу технологиялары қолданылуда. Жекелеген алқаптарда гектарына 60 центнерге дейін өнім алынуы суды ұқыпты пайдалану мен жаңа тәсілдердің нәтижесін көрсетеді. Біздің мақсатымыз – мақтаны өсірумен шектелмей, одан түсетін табыстың көбірек бөлігін өз өңірімізде қалыптастыру. Осы бағытта мақта өсіруден бастап өңдеу, жіп иіру және дайын тоқыма өнімін шығаруға дейінгі толық тізбекті қамтитын елімізде теңдесі жоқ кластер қалыптасып келеді. Бүгін сіздер осы кластерлік жобалардың алғашқысы – «Түркістан мақта агроөнеркәсіптік кешені» ЖШС-ның жобасымен танысып отырсыздар. Біз Түркістан мақтасын шикізат күйінде ғана өткізбей, оны терең өңдеп, дайын өнімге айналдыратын заманауи өндіріс жүйесін қалыптастыруды көздейміз. Жалпы аграрлық салаға шетелдік инвесторларды тартып, олардың озық технологиялары мен өндірістік тәжірибесін өңірімізге әкеліп жатырмыз. Ендігі міндет – осы тәжірибені өзіміз толық меңгеру. Инвестицияның нәтижесін біз тұрақты жұмыс орындарынан ғана емес, өзімізде қалыптасқан білікті кадрлар мен бәсекеге қабілетті дайын өнімнен де көретеміз. Сіздердің жетістіктеріңіз – бір күннің емес, жылдар бойғы адал еңбектің нәтижесі. Ақ алтынды өсіріп, туған жердің берекесін арттырып жүрген баршаңызға шынайы алғысымды білдіремін. Егін бітік шығып, әр маусым қуаныш пен молшылық әкелсін! – деді Нұралхан Оралбайұлы.
Сондай-ақ іс-шара барысында облыс әкімі бір топ озат еңбеккерге ҚР ауыл шаруашылығы министрлігінің «Еңбек ардагері» медалін, «Ауыл шаруашылығы үздігі» төсбелгісін табыстап, үздіктерді «Құрмет» грамотасы және Түркістан облысы әкімінің мақта шаруашылығының үздігі дипломымен марапаттады.
Түркістан облысы – еліміздегі мақта дақылын өсіретін жалғыз өңір. Өңірде мақтаны өсіруден бастап оны өңдеу, жіп иіру және дайын тоқыма өнімдерін шығаруға дейінгі толық өндірістік тізбек қалыптасып келеді. 2030 жылға дейін облыста жалпы құны 212,6 млрд теңгені құрайтын 5 кластер іске асырылады. Нәтижесінде жылына 229,5 мың тонна дайын өнім өндіріліп, 7 мыңнан астам жұмыс орнын ашу жоспарланып отыр.
Бүгінгі күннің өзінде «Түркістан мақта агроөнеркәсіптік кешені» ЖШС озық технологияларды пайдаланып, 52 мың гектарға мақта егіп отыр. Жалпы қуаты 180 мың тонна болатын 2 мақта өңдеу зауыты, тамшылатып суару таспасы мен ПВХ құбырларын өндіретін зауыттар, сондай-ақ жіп иіру фабрикасы іске қосылды. Нәтижесінде 1200 жұмыс орны ашылды. Одан бөлек, тағы 2 мақта өңдеу зауытын және жылына 5 мың тонна мақта тұқымын өндіретін зауытты іске қосу жоспарлануда. Ал «TURAN» арнайы экономикалық аймағында жылына 45 млн шаршы метр тоқыма емес материал шығаратын зауыт, 45 млн шаршы метр мата бояйтын зауыт іске қосылады. Сондай-ақ мұнда жылына 7 млн жиынтыққа дейін тоқыма бұйымдары мен киім өндіретін тігін фабрикасы және джинс маталарын өндіретін кәсіпорын іске қосылмақ.
Облыста мол өнімді қабылдауға және өңдеуге қуатты инфрақұрылым бар. Өңірдегі 29 мақта өңдеу зауыты мен 169 қабылдау бекеті жылына 1 млн тоннадан астам шитті мақтаны қабылдап, өңдеуге мүмкіндік береді. Мақта шаруашылығындағы 25 мыңға жуық агроқұрылымда 70 мыңға жуық адам еңбек етеді.
2025 жыл – мақташылардың рекордтық жетістік жылы болды. Облыста 466 мың тоннаға жуық шитті мақта жиналып, орташа түсімділік гектарына 32 центнерге жетті. Бұл соңғы 20 жылдағы ең жоғары нәтиже.
Мерекелік іс-шара барысында ауыл шаруашылығы саласындағы заманауи технологиялар, жергілікті өндірушілердің өнімдері мен азық-түлік тауарларының көрмесі ұйымдастырылды. Сонымен қатар көпшілік назарына концерттік бағдарлама ұсынылды.
«AQ-DALA – 2026» шарасы – мақта шаруашылығының жетістігін ғана емес, еңбек адамының еңбегін, жаңа технологияны меңгерген мамандарды және ауылдағы жаңа мүмкіндіктерді дәріптейтін маңызды алаң.
Отырар ауданында «Бала қауіпсіздігі және суицидтік мінез-құлықтың алдын алу» тақырыбында ата-аналар жиыны өтті.
Аудандық мәдениет сарайында ұйымдастырылған жиынға білім беру саласының өкілдері, ата-аналар, мектеп педагогтері, медицина және отбасыны қолдау саласының мамандары қатысты.
Жиынның негізгі мақсаты – бала қауіпсіздігін қамтамасыз етудегі отбасы, мектеп және қоғамның өзара байланысын нығайту, балаларға психологиялық қолдау көрсетудің маңыздылығын түсіндіру, сондай-ақ суицидтік мінез-құлықтың алдын алу бағытындағы жұмыстарды саралау болды.
Іс-шараның шымылдығы Т. Ибрагимов атындағы жалпы білім беретін мектептің педагогтері мен оқушылары дайындаған тәрбиелік мәні зор көрініспен ашылды. Көріністе бала тәрбиесіндегі ата-ана жауапкершілігі, отбасындағы қарым-қатынас пен балаға көңіл бөлудің маңызы көрініс тапты.
Жиында аудандық білім бөлімінің басшысы Құдайберген Шербаев бала қауіпсіздігін қамтамасыз ету және жасөспірімдер арасында келеңсіз жағдайлардың алдын алу бағытында білім беру ұйымдарында атқарылып жатқан жұмыстарға тоқталды.
Сонымен қатар аудан әкімінің орынбасары Айдос Құлмаханов бала тәрбиесінде отбасы мен мектептің бірлескен жұмысының маңыздылығын атап өтіп, балалардың қауіпсіз ортасын қалыптастыру – баршаға ортақ міндет екенін жеткізді.
Кездесуде отбасыларды қолдау, қиын жағдайға тап болған жанұяларға әлеуметтік-психологиялық көмек көрсету мәселелері де кеңінен сөз болды. Осы бағытта отбасыны қолдау орталығының маманы ата-аналарға отбасындағы өзара түсіністік пен сенімнің маңыздылығы жөнінде түсіндірме берді.
Медицина мамандары өз кезегінде балалардың психологиялық және физикалық саулығына назар аударып, жасөспірімдердің мінез-құлқындағы өзгерістерді дер кезінде байқап, тиісті мамандардың көмегіне жүгінудің маңыздылығын атап өтті.
Жиынның ерекшелігі – ата-аналармен ашық пікір алмасу форматында өтуі. Қатысушыларға баланың зорлық-зомбылық туралы айтуға қорқуы, отбасындағы сөзбен кемсіту мен салыстырудың бала психологиясына әсері, интернет пен телефонға тәуелділік, сондай-ақ балаға күнделікті көңіл бөлу мәселелері бойынша сұрақтар қойылды.
Ата-аналар өз ой-пікірлерін ортаға салып, бала тәрбиесінде жиі кездесетін мәселелермен бөлісті. Сонымен қатар жиын барысында әр отбасы мен білім беру ұйымы алдағы уақытта бала қауіпсіздігін қамтамасыз ету үшін қандай нақты қадамдар жасай алатыны жөнінде пікір алмасты.
Жиында айтылғандай, бала қауіпсіздігі – тек мектептің немесе белгілі бір мекеменің міндеті емес. Бұл – ата-ана, ұстаз, маман және тұтас қоғам болып атқаратын ортақ жауапкершілік.
Баланың жан дүниесіне үңілу, оны тыңдай білу, қиындыққа тап болған сәтінде қолдау көрсету және сенімді қарым-қатынас орнату – жасөспірімдер арасында түрлі келеңсіз жағдайлардың алдын алудың маңызды тетіктерінің бірі.
Жиын соңында қатысушылар бала қауіпсіздігін қамтамасыз ету, отбасылық құндылықтарды нығайту және жасөспірімдерге психологиялық қолдау көрсету бағытындағы жұмыстарды жүйелі түрде жалғастыру қажеттігін атап өтті.
Отырар ауданында шәкірттерін білім нәрімен сусындатып, өмірге жол сілтейтін ұлғатты ұстаздардың төл мерекесіне арналған ауқымды мерекелік іс-шара ұйымдастырылды.
Мерекелік кеште «Отырар өнер және саз мектебінің» оркестрі жиналған көпшілікті күмбірлеген күймен қарсы алды. Аудандағы білім беру ұйымдары дайындаған арнайы көрме жұмыстары ұсынылып, келген қонақтар ұстаздардың шығармашылық жетістіктерімен танысты.
Салтанатты жиынды аудан әкімі Қайрат Жолдыбайұлы мен аудандық мәслихат төрағасы Уалихан Жамалханұлы ашып, жүрекжарды жылы лебіздерін білдірді. Ұстаздық жолдың ауыр да абыройлы жүгін арқалаған ардақты жандардың еңбегі ешқашан ұмытылмайтынын атап өтті.
Әкім мен төраға өңіріміздегі білім саласының дамуына сүбелі үлес қосып жүрген бір топ ұстаздарды кәсіби мерекелерімен құттықтап, алғыс хаттар мен марапаттарды табыстады.
Сонымен қатар, мерекелік жиынға арнайы қатысқан Түркістан облысының білім басқармасы басшысының орынбасары Өсербаев Амантай Оразалыұлы білім саласында нәтижелі еңбек етіп жүрген бір топ ұлағатты ұстаздарға басқарма басшысының Алғыс хаттарын салтанатты түрде табыс етті.
Іс шарада ардагер ұстаздарға сый-сыйапат жасалып, одан әрі концерттік бағдарламаға ұласты. Сахна төріне шыққан «Сегіз сері» тобының орындауындағы «Бипыл» мен «Ұстазым» әндері көпшіліктің көңілін көтерсе, жас өнерпаз Теміршаева Аяулымның орындауындағы «Ұстазым» әні жүректерге жылу ұялатты. Сондай-ақ Адиля Алмазқызы мен Сұлухан Рашидқызының «Ұстазға тағзым», «Аяла» тобының «Ұстазым ұнайды», Айгерім Ахауова мен Адиля Алмазқызының «Ардақты ұстазым» әндері кештің сәнін кіргізді. Салтанат Жиренбай мен «Сегіз сері» тобының орындауындағы «Ананың тілі» әні де көрерменнің ыстық ықыласына бөленді.
«Ұстаздан тәрбие алған» немесе «Ұстаз алдын көрген» деген сөздер қазақ баласы үшін қашанда қасиетті ұғым екені белгілі. Осы бір қағиданың астарына терең үңілдірген мерекелік кеш ұстаз мәртебесін бір саты жоғары көтеріп, қатысушыларға ұмытылмас рухани әсер сыйлады.
Облыс әкімі Нұралхан Көшеров Отырар ауданына барып, тұрғындармен кездесті. Кездесуде ауданның әлеуметтік-экономикалық даму көрсеткіштері сараланып, алдағы кезеңге арналған негізгі міндеттер айқындалды.
Жиында тұрғындар өздерін толғандырған мәселелерді ашық айтып, ұсыныс-пікірлерін жеткізді. Өңір басшысы көтерілген мәселелерді тыңдап, тиісті жауапты сала басшыларына нақты тапсырмалар берді. Сонымен қатар кездесуге келген тұрғындардың өтініштері мен ұсыныстарын жеке тыңдап, қабылдау өткізді.
– Бүгін қазақ өркениетінің алтын діңгегі, киелі Арыстанбаб бабамыз мәңгілік тыныстап жатқан, талай тарихи оқиғаның куәсі болған Отырар өңірінің тұрғындарымен жүздесіп отырғаныма қуаныштымын.
Отырар ауданының әлеуметтік-экономикалық дамуында оң динамика қалыптасқан. 2026 жылдың 8 айында жалпы өңірлік өнім көлемі 67,5 млрд теңгені құрап, өткен жылдың сәйкес кезеңімен салыстырғанда 43,6 пайызға артқан. Өнеркәсіп өнімінің көлемі 27,3 млрд теңгеге жетсе, оның ішінде өңдеу өнеркәсібінің көлемі 4,6 млрд теңгені құрады.
Негізгі капиталға бағытталған инвестиция көлемі 28,6 млрд теңгені, сауда көлемі 5,3 млрд теңгені құрап отыр. Ауыл шаруашылығы өнімінің көлемі 26,7 млрд теңгеге жетіп, өткен жылдың сәйкес кезеңімен салыстырғанда 5,3 пайызға өскен. Құрылыс жұмыстарының көлемі 9,9 млрд теңгені құрап, пайдалануға берілген тұрғын үй көлемі 14,5 мың шаршы метрге жетті.
Ауданда биыл Темір ауылындағы Темір станциясын жаңғырту жұмыстары жүргізіліп, нысан пайдалануға берілді. Ал «Жайлы мектеп» ұлттық жобасы аясында өткен жылы 600 орындық жаңа мектеп ел игілігіне берілді.
Инженерлік инфрақұрылымды дамыту бағытында да жұмыстар атқарылуда. Биыл Балтакөл, Маяқұм және Көксарай ауылдық округтеріндегі 7 елді мекенді табиғи газбен қамту жұмыстары басталды. Жоба толық жүзеге асқан жағдайда, аудан бойынша газбен қамтылған елді мекендер саны 29-ға жетіп, қамту деңгейі 78,4 пайызды құрайды.
Тұрғындардың әл-ауқатын арттыру, инвестициялық жобаларды жүзеге асыру, жаңа жұмыс орындарын ашу және ауданның әлеуметтік-экономикалық даму көрсеткіштерін одан әрі жақсарту бағытындағы жұмыстарды күшейтуді тапсырамын, – деді Нұралхан Көшеров.
Бұдан бөлек, ауданда жол және инфрақұрылым мәселелерін шешуге басымдық берілуде. «Ауыл – Ел бесігі» жобасы аясында биыл жергілікті бюджет есебінен жалпы ұзындығы 58,5 шақырым болатын 25 көшеге орташа жөндеу жұмыстары жүргізілуде. Нәтижесінде аудан бойынша автомобиль жолдарының қанағаттанарлық жағдайдағы үлесін 87 пайызға жеткізу көзделген.
Сонымен қатар 11 елді мекенде балалар ойын алаңдарын салу, 19 елді мекенде көшелерді жарықтандыру және жаяу жүргіншілерге арналған аяқжолдар салу жұмыстары қолға алынған. Бір елді мекенде абаттандыру жұмыстары жүргізілуде.
Кездесуде Отырар ауданының әкімі Қайрат Жолдыбайұлы ауданның өткен жылы атқарған жұмыстары мен алдағы жоспарлары туралы баяндады.
Ашық форматта өткен кездесуде тұрғындар білім беру, автомобиль жолдары, кәріз жүйесі, инженерлік инфрақұрылым, жер қатынастары және басқа да әлеуметтік мәселелерді көтерді. Әрбір мәселе бойынша жауаптар беріліп, тиісті жұмыстарды жүргізу жөнінде нақты тапсырмалар жүктелді.
Кездесуден кейін облыс әкімі Нұралхан Көшеров тұрғындарды жеке қабылдады. Қабылдауға келген азаматтардың өтініштері қаралып, көтерілген мәселелер бақылауға алынды.
Отырар ауданында 1 қазан – Халықаралық қарттар күніне орай мерекелік шара өтті.Мерекелік шараға аудан әкімі Қайрат Жолдыбайұлы мен аудандық мәслихат төрағасы Уәлихан Ұзақов қатысып, ақ жаулықты әжелер мен ардақты ақсақалдарды мерекемен құттықтап, зор денсаулық, ұзақ ғұмыр, отбасыларына амандық пен береке тіледі.
Шара барысында ауданның қазыналы қарттарына құрмет көрсетіліп, олардың ел дамуына қосқан еңбегі мен өмірлік тәжірибесінің кейінгі ұрпақ үшін маңызы атап өтілді. Бір топ ардагерлеге аудан әкімі мен аудандық мәслихат төрағасының алғыс хаттары табысталып, сый-сыйапат жасалды.
Жиында ауданның әлеуметтік-экономикалық дамуына сүбелі үлес қосқан ардагерлер Мырзахмет Темірбеков, Шайырбек Айжарықов, Тәліп Асанов, Көлбай Жалғасбай, Нұрқұл Ердемқұл, Таңат Әбікей, Төрехан Амантай және ардақты аналар Қалдан Байжұман, Маржан Танашевалар мерекелік лебіздерін білдіріп, көрсетілген құрметке ризашылықтарын жеткізді.
Мерекелік кештің көркін аудан өнерпаздарының арнайы әзірлеген концерттік бағдарламасы қыздырды. Жас өнерпаздар әннен шашу шашып, көрермендерге көтеріңкі көңіл-күй сыйлады.Қарттарымыз – елдің берекесі мен бірлігінің ұйытқысы, ұрпаққа ақыл-өнеге беріп келе жатқан ардақты жандар.
1 қазан – Халықаралық қарттар күні – ұрпақ сабақтастығын ұлықтап, өмір жолы өнегеге толы аға буынға құрмет көрсететін ерекше күн. Осы айтулы мерекеге орай Темір ауылдық мәдениет үйінде ауылдың ардақты ақсақалдары мен ақ жаулықты аналарына арналған іс-шара өтті.
Мерекелік жиынға Отырар аудандық қоғамдық кеңесінің төрағасы Төрехан Амантай Төреханұлы, аудандық мәслихат депутаты Амзеев Ардақ Нажмидинұлы және Темір ауыл округінің әкімі Ақарыс Жүсіпұлы қатысып, ақсақалдар мен ақ жаулықты әжелерді мерекелерімен құттықтады.
Жиын барысында қарияларға жүрекжарды ізгі тілектер арналып, олардың ел мен жердің өсіп-өркендеуіне қосқан үлесі, өмірлік тәжірибесі мен кейінгі ұрпаққа берер тәрбиелік тағылымы атап өтілді. Мерекелік әндер шырқалып, үлкендерге көтеріңкі көңіл күй сыйланды.
Қазақтың дәстүрі мен үлкенге деген құрметін айшықтаған ерекше сәттердің бірі – қарияларға құрмет көрсету рәсімі болды. Ауылдың ақсақалдарына қазақы дәстүрмен шапан жабылып, ақ жаулықты әжелерге орамал тарту етіліп, гүл шоқтары мен арнайы сыйлықтар табысталды.
Іс-шара соңында ауыл қариялары ұйымдастырушыларға ризашылықтарын білдіріп, ақ баталарын берді. Ақсақалдардың батасы мен ақ жаулықты әжелердің ізгі тілегі мерекелік кездесудің мәнін одан әрі арттыра түсті.
Сонымен қатар мерекелік шараға денсаулығына немесе басқа да себептерге байланысты келе алмаған қарттарымыз да назардан тыс қалған жоқ.
Аудандық мәслихат депутаты Амзеев Ардақ Нажмидинұлы мен Темір ауыл округінің әкімі Ақарыс Жүсіпұлы ауылдағы бірқатар қарттардың шаңырағына арнайы барып, оларды Халықаралық қарттар күнімен құттықтады. Ізгі тілектерін жеткізіп, мерекелік сыйлықтарын табыс етті.
«Қарты бар үйдің – қазынасы бар» дейді дана халқымыз. Өйткені елдің кешегісін біліп, бүгінін бағамдап, ертеңіне бағыт сілтейтін аға буынның орны әрдайым бөлек.
Қарттарымыздың ғибратты ғұмыры – кейінгі ұрпаққа өнеге, ақылы – бағыт, батасы – рухани тірек.
Ардақты қарияларымызға мықты денсаулық, ұзақ ғұмыр, отбасыларына амандық пен береке тілейміз! Ұрпақтарының қызығын көріп, елдің сый-құрметіне бөленіп, ақ баталарыңызды беріп, ортамызда аман-есен жүре беріңіздер!
Түркістан облысында «Қазақстан халқына» қорының ұйымдастыруымен БАҚ өкілдеріне арналған баспасөз туры өтті. Сапар аясында журналистер бүгін Отырар ауданы, Қоғам ауылындағы Кеңес Одағының батыры Сейтқасым Әшіров атындағы жалпы орта мектепке барды. Білім ордасы 1992 жылы пайдалануға берілген. Қазіргі таңда 418 оқушы екі ауысымда білім алады. «Қазақстан халқына» қорының қолдауымен физика, химия, биология пән кабинеттері жабдықталып жатыр. Айта кетейік, қор тарапынан өңірде білім саласын дамыту мақсатында жалпы құны 13 миллиард теңгеден астам қаржы бөлініп, 35 мектеп заманауи құрал-жабдықтармен қамтылған.
Сондай-ақ, сапар аясында БАҚ өкілдері Шәуілдір ауылындағы Мәдениет сарайының жұмысымен танысты. Онда Отырар аудандық мәдениет сарайы жаңғыртылған. Жоба аясында Отырар аудандық мәдениет сарайында тұрғындардың сұранысын ескере отырып, 5 негізгі бағыт бойынша 13 шығармашылық үйірме ашылды. Сонымен қатар, бірқатар жаңа шығармашылық бағыттарды дамыту үшін қосымша штаттық бірліктер қарастырылған. Ашылу салтанатына «Қазақстан халқына» қорының төрайымы Ләззат Шыңғысбаева және Түркістан облысы әкімінің орынбасары Ертай Алтаев қатысты. Ләззат Шыңғысбаева Түркістан өңірінде қор тарапынан атқарылып жатқан жұмыстарға жоғары баға берді.
Отырар ауданының әкімі Қайрат Жолдыбайұлы Темір ауыл округінің тұрғындарымен кездесіп, тиісті кезеңде аудан көлемінде атқарылған жұмыстар мен алдағы жоспарлар жөнінде кеңінен баяндады.
Кездесу барысында аудан басшысы өңірдің әлеуметтік-экономикалық даму көрсеткіштеріне тоқталып, өнеркәсіп, ауыл шаруашылығы, инвестиция тарту, құрылыс, инфрақұрылым, ауыз су, жол жөндеу, газдандыру және абаттандыру бағыттарында жүзеге асқан жұмыстарды атап өтті.
Кездесуде Темір ауыл округіндегі өзекті мәселелер мен елді мекендерді дамыту бағытындағы жұмыстар да сөз болды. Атап айтқанда, көшелерді жарықтандыру, жолдарды жөндеу, абаттандыру, балалар ойын алаңшаларын салу және инженерлік инфрақұрылымды жаңғырту бағытындағы жобалар кезең-кезеңімен жүзеге асырылатыны айтылды.
Жалпы ауыл округінде Б.Момышұлы көшесінен М.Батырбеков көшесіне дейінгі аралықта көше жарықтандыру желілерінің құрылысы жүргізіліп, саябақ, стадион және аллея аумағындағы жарықшамдар жаңартылды. Сонымен бірге, ішкі көшелер мен полигон аумағында санитарлық тазалық жұмыстары тұрақты ұйымдастырылды.
Жиында тұрғындар тарапынан ауыл ішіндегі жол сапасы, көше жарығы, ауыз су және әлеуметтік нысандарға қатысты ұсыныс-пікірлер айтылып, аудан әкімі көтерілген мәселелер кезең-кезеңімен шешімін табатынын жеткізді.
Кездесуден кейін аудан әкімі ардагер ұстаз Шарипа Спақызының үйіне барып, Қарттар күні мерекесімен құттықтады. Ұзақ жылдар бойы білім саласында еңбек етіп, шәкірттерді тәрбиелеуге еселі үлес қосқан ардагердің иығына кестелі орамал жауып, құрмет көрсетті. Шарипа Спақызы аудандағы ауыл шаруашылығы саласында еңбек етіп, трактор жүргізген алғашқы әйел. Жастайынан еңбекке араласқан қарт ана қоғамдық жұмыстарға да белсене қатысып, халықтың қолдауымен депутат болып сайланған. Бүгінде немере-шөберелерінің қызығын көріп отырған қарт ана көрсетілген құрметке ризашылығын білдіріп, ақ батасын берді.