GOV.KZ – Единая платформа цифровых ресурсов государственных органов (ЕПЦР ГО)
Меню
Страницы
Все материалы
25 сентября 2026
В СЕЛЕ ШОРНАК РАБОТЫ ПО СТРОИТЕЛЬСТВУ ДОМА КУЛЬТУРЫ НА 500 МЕСТ ВЫПОЛНЕНЫ НА 70%.В селе Шорнак Сауранского района Туркестанской области продолжается строительство Дома культуры на 500 мест. Строительно-монтажные работы выполнены на 70%, отставания от графика нет. Завершить строительство планируется в ноябре 2026 года.
Сейчас на объекте ведутся внутренняя отделка, облицовка фасада и прокладка наружных инженерных сетей. К работам привлечены 40 человек, задействованы 3 единицы техники.
По проекту Дом культуры представляет собой двухэтажное здание общей площадью 2354 кв. м на участке 1,27 га. После завершения строительства здесь смогут проводить культурные мероприятия и выступления творческих коллективов, организовывать досуг детей и молодежи.
Строительство началось в 2025 году. Заказчиком выступает отдел строительства Сауранского района, подрядчиком - ТОО «Дос и К Сервис».
Справочно: стоимость строительства по итогам конкурса составила 1 775,5 млн тенге. Предусмотренная проектом продолжительность строительства - 17 месяцев. Технический надзор осуществляет ТОО «Universal Construction Expert», авторский надзор - ТОО «Казинспроект».
30 марта 2026
"Көрнекі ақпаратқа қойылатын талаптар" облыстық семинарыТҮРКІСТАНДА «КӨРНЕКІ АҚПАРАТҚА ҚОЙЫЛАТЫН ТАЛАПТАР» ТАҚЫРЫБЫНДАҒЫ ОБЛЫСТЫҚ СЕМИНАР ӨТТІ
Түркістан облысы мәдениет басқармасының ұйымдастыруымен "Көрнекі ақпаратқа қойылатын талаптар" атты облыстық семинар ұйымдастырылды. Семинарға Қазақстан Республикасы Ғылым және жоғары білім министрлігі Тіл саясаты комитетінің басқарма басшысы Қайыржан Алдашұлы, Алматы облысы тілдерді дамыту басқармасының мамандары өз тәжірибесімен бөлісті.
Аталған іс-шараның негізгі мақсаты - Қазақстан Республикасында тіл саясатын дамытудың 2023–2029 жылдарға арналған тұжырымдамасын іске асыру аясында көрнекі ақпараттар мен жарнамалардың тілдік сауаттылығын арттыру, оларды қолданыстағы заңнама талаптарына сәйкестендіру және осы бағытта әдістемелік көмек көрсету болды.
Семинарда сала мамандары өзара тәжірибе алмасып, өзекті мәселелерді талқылады. Іс-шараға мемлекеттік органдар өкілдері, ғалымдар мен мамандар қатысты. Семинар қорытындысы бойынша қатысушыларға көрнекі ақпараттарды рәсімдеу және орналастыру барысында заң талаптарын сақтау, тілдік нормаларды дұрыс қолдану бағытында нақты ұсыныстар берілд.
Түркістан облысы мәдениет басқармасының баспасөз қызметі
14 июля 2025
Монументті өнер құрылыстарын (ескерткіштер) орнату туралыМемлекет басшысы өткен жылғы Қазақстан Республикасының Президенті жанындағы Ұлттық құрылтайдың «Адал адам – Адал еңбек – Адал табыс» атты отырысында монументтік өнер құрылыстарын орнатуды заңнамалық реттеуді күшейту жөнінде тапсырма берді.
Тапсырманы орындау мақсатында Министрлік 2020 жылғы 28 сәуірдегі № 103 Министрліктің бұйрығымен бекітілген Монументтік өнер құрылыстарын орнату қағидаларына өзгерістер мен толықтырулар енгізді.
Бұл түзетулер 2024 жылғы желтоқсан айында күшіне еніп, монументтік өнер құрылыстарын орнату жұмыстары жаңа тәртіпке сай жүргізілуде.
Осы Қағидаларға сай монументтік өнер құрылыстарын орнату (бұдан әрі – құрылыс)жөніндегі жұмыс төмендегі талаптарға сәйкес жүргізіледі:
Бірінші, құрылысты орнату Қазақстан Республикасы Үкіметінің 1999 жылғы 28 қыркүйектегі № 1465 «Мерейтойлар мен атаулы күндерді мерекелеу туралы» қаулысымен айқындалған көрнекті тұлғалардың мерейтойлық және атаулы күндеріне орайластырылады. Яғни осы қаулыға сәйкес жаңа ескерткіштер белгілі тұлғалар мен айтулы оқиғалардың жүз жылдықтарына, одан кейiн әрбір ширек ғасырлық жылдарда орнатылатын болады.
Екінші, құрылыстарды заңды немесе жеке тұлғаларға тиесілі жекеменшік учаскелерде орнатуға тыйым салынады.
Үшінші, бір елді мекенде жеке бір тұлғаның немесе тақырыптық маңызды тарихи оқиғаға арналған бір ғана құрылыс орнату қарастырылған.
Төртінші, облыстардың, республикалық маңызы бар қалалардың, астананың жергiлiктi атқарушы органдары (бұдан әрі – ЖАО) құрылыс бойынша жұмысты жоспарға сай жүргізеді. Жоспар Министрлікпен қалыптастырылады және жоспарға енгізу үшін ЖАО-дар өз ұсыныстарын қаржыландырумен, жер учаскесін бөлу туралы шешіммен Тарих және мәдениет ескерткіштерін қорғау жөніндегі жергілікті комиссияның хаттамасымен расталуы қажет.
Бесінші, орнатылатын құрылыстардың үздік жобаларын ЖАО-дар республикалық шығармашылық конкурс жариялау арқылы анықтайды. Осы конкурстың нәтижесінде үздік деп танылған кемінде үш жұмыс күнде жобасы Монументтік өнер құрылыстарын орнату жөніндегі комиссияның (бұдан әрі – Комиссия)қарауына енгізу үшін Министрлікке жолданады.
Алтыншы, Комиссия мақұлдаған құрылыстардың жұмыс жобалары ЖАО-мен жоғарыда көрсетілген жоспарға сәйкес мерзімде орнатылады.
Бұдан өзге Президенттің тапсырмаларына сәйкес трайбалистік сипаттағы жаңа ескерткіштерді орнатуға жол берілмейді. Сонымен қатар, жаңа ескерткіштерді орнату кезінде Республикалық ономастика комиссиясымен бекітілген «Тарихи тұлғалар» тізімін басшылыққа алу қажет.
11 июля 2025
ТҮРКІСТАН ОБЛЫСЫНЫҢ ӨНЕРПАЗДАРЫ БІРІНШІ ОРЫНҒА ИЕ БОЛДЫ
Түркі әлемінің мәдени астанасында Ақтау қаласында республикалық командалық айтыс өз мәресіне жетті. Былтыр бастау алған жобаға еліміздің үш мегаполисі мен 17 облысынан жалпы 20 команда қатысқан болатын. «Маңғыстау – түркі мәдениетінің төрі» атты өнер мерекесінің ақтық кезеңінде Түркістан және Қарағанды облысының айтыскер ақындары мен күйші, жыршы-термешілерінен құралған құрамасы бақ сынады. Қазылар алқасының шешімімен қос команда жүлделі І орын мен алтын домбыраға ие болды.Ауқымды шарада Түркістан облысы мәдениет басқармасының басшысы Әзімхан Қойлыбаев арнайы команданы қолдап келді. Облыстың сәлемін жеткізіп, сый-сияпат табыстады.Аламанды айтыскер ақын, ҚР Парламенті мәжілісінің депутаты, филология ғылымдарының докторы, профессор, Қазақстанның еңбек сіңірген қайраткері, «Құрмет» орденінің иегері Аманжол Әлтай жүргізіп отырды. Қазылар алқасына жазушы, ҚР Еңбек сіңірген қайраткері, ҚР Парламентінің депутаты Жүсіп Нұртөре төрағалық етті.Оның құрамында өнерде ерекше орны бар Алмасбек Алматов, Айгүл Үлкенбаева, Мэлс Қосымбаев, Қалқаман Сарин, Айгүл Қосанова секілді танымал тұлғалар болды.
Облыс құрамасында айтыстың арыстаны, «Құрмет» орденінің иегері, «Алтын домбыра» иесі Бекарыс Шойбеков бастаған өңіріміздің мықтылары бар. Атап айтқанда команда жетекшісі, «Айтыс ақындары мен жыршы-термешілердің Халықаралық Одағы» Түркістан облысы филиалының төрағасы Тұрар Тлеулиев, ақындар бапкері Бекмұрат Анарбаев, таныстырушы Шахмардан Бекарысұлы, Бекарыс Шойбеков (Сүре айтыс), Қажымұхан Абзалов (Қайым айтыс), Дәурен Ақсақалов (Түре айтыс), Аян Ниязбек (Өтірік өлең айтысы), өнерпаздардан Оразәлі Жаңабай (Дәстүрлі әнші), Руслан Ахинбеков (Терме), Аязбек Рустамов (Жыршы), Шыңғыс Исаев (Күйші).Айта кетейік, айтысты ҚР Мәдениет және ақпарат министрлігінің және «AMANAT» партиясының қолдауымен өтіп жатқан сайысты Маңғыстау облысы әкімдігі мен Айтыс ақындары мен жыршы-термешілердің Халықаралық одағы бірлесіп ұйымдастырған.Түркістан облысы мәдениет басқармасының баспасөз қызметі
11 июля 2025
«КІТАППЕН - БІР КҮН» АТТЫ ӘДЕБИ-ТАНЫМДЫҚ ІС-ШАРА ӨТТІТүркістан облыстық «Фараб» әмбебап ғылыми кітапханасында 9-10 шілде күндері, ҚР Президенті Қасым-Жомарт Кемелұлы Тоқаевтың бастамасымен жүзеге асып жатқан «100 кітап» ұлттық сауалнамасы аясында «Кітаппен – бір күн» атты әдеби-танымдық іс-шара өтті.Екі күнге созылған шараға Қазақстан Жазушылар одағының Түркістан облыстық филиал төрағасы, ақын Айдар Сейдәзім, сондай-ақ Қазақстан Жазушылар одағының мүшесі, ақын Сайлауан Жоланов және «Arman-Qanat» қоғамдық қорының негізін қалаушы, Ерекше балаларға арналған «Армандар орындалады» жобасының авторы, ақын, «Шапағат» медальінің иегері Әсел Бимурзаева арнайы қатысты. Қонақтармен әдеби сұхбат құрылып, кітап пен қоғам, жас ұрпақ пен рухани жаңғыру тақырыбында тұшымды ойлар ортаға салынды.«100 кітап» ұлттық сауалнамасы – Қазақстан Республикасының Президенті Қасым-Жомарт Тоқаевтың бастамасымен жүзеге асырылып жатқан маңызды мәдени-ағартушылық жоба. Бұл сауалнама – отандастарымыздың кітап оқу мәдениетін көтеру, әдеби мұраға деген қызығушылығын арттыру және қоғамдық талғам негізінде Қазақстандықтардың сүйікті 100 кітабын анықтау мақсатында ұйымдастырылған.Жастардың әдебиеттен алшақтауының себептері мен шешу жолдары;Қазіргі әдебиеттің қоғамға ықпалы;
Жастарға арналған әдебиеттің болашағы; Әйелдің қоғамдағы мәртебесі; Бала тәрбиесі;
«100 кітап» тізіміне енуі тиіс шығармалар жөнінде өзекті сұрақтар қойылып, қонақтар тарапынан мазмұнды жауаптар мен ұсыныстар айтылды.
Іс-шараның аясында белгілі жазушы, Қазақстан Республикасы Мемлекеттік сыйлығының лауреаты Мархабат Байғұттың көрнекті туындысы – «Әкімнің әйелі» оқырмандар назарына ұсынылды. Аталған шығарма «100 кітап» ұлттық сауалнамасы аясында тізімге енуге ұсынылатын әдебиеттердің бірі ретінде көпшілікпен талқыланды. Мархабат Байғұттың «Әкімнің әйелі» атты шығармасы – қазіргі қазақ прозасындағы әлеуметтік тақырыптарды терең қозғайтын, шынайы өмір көріністерін көркем тілмен өрнектеген туындылардың бірі. Жазушы бұл шығармасы арқылы қоғамдағы өзекті мәселелерді – билік пен халық арасындағы қарым-қатынас, отбасылық құндылықтар, әйелдің қоғамдағы орны, адамгершілік пен ар-ождан секілді тақырыптарды көркемдік биік деңгейде жеткізеді.Айта кетейік, іс-шараның екінші бөлігінде, ҚР Ұлттық Ұланы 5574 әскери бөлімінің сарбаздарының арнайы қатысуымен «100 кітап» ұлттық сауалнамасы аясында кітапталқы ұйымдастырылды. әдеби отырыс барысында қатысушылар тізімге енуге ұсынылған, Мархабат Байғұттың «Әкімнің әйелі» атты туындысы кеңінен талқыланып, шығармадағы оқиғалар желісі, кейіпкерлер бейнесі, авторлық ұстаным мен көтерілген әлеуметтік мәселелер жан-жақты сараланды.Түркістан облысы мәдениет басқармасының баспасөз қызметі
11 июля 2025
ТҮРКІСТАНДА КІТАПХАНА САЛАСЫНЫҢ ОБЛЫСТЫҚ БАЙҚАУЫ ӨТТІҚР Президенті Қасым-Жомарт Кемелұлы Тоқаевтың 2025 жылды «Жұмысшы мамандықтар жылы» деп жариялауына орай елімізде жұмысшы кәсібінің мәртебесін арттыруға бағытталған түрлі жобалар жүзеге асырылуда. Соның бірі де бірегейі –мәдениет саласы қызметкерлерінің кәсіби жетістіктерін дәріптеуге бағытталған «Кәсіподақ және жұмысшы мамандық» жобасы. Аталған жоба аясында бүгін «Қазақстандық салалық мәдениет, спорт, туризм және ақпараттық қызметкерлерінің кәсіптік одағы» қоғамдық бірлестігі Түркістан облыстық филиалы және Түркістан облыстық «Фараб» әмбебап ғылыми кітапханасының ұйымдастыруымен кітапхана саласы бойынша «Үздік жұмысшы маман» атты облыстық байқауы өтті.Аталмыш байқауға облыстың әр ауданынан кітапхана саласында табысты еңбек етіп жүрген 14 кітапханашы қатысып, өзара сайысқа түсті. Байқаудың негізгі мақсаты – кітапханашы мамандығының маңызын арттыру, сала қызметкерлерінің қоғам алдындағы беделін көтеру, үздік мамандарды анықтап, оларға қолдау көрсету, сондай-ақ шығармашылық әлеуетті арттыру.Кәсіподақ Түркістан облыстық филиалының төрағасы Асылхан Темірханұлы, Түркістан облыстық мәдениет басқармасының тарихи-мәдени құдылықтарды қорғау бөлімінің бас маманы Нұрдаулет Келдібекұлы және Түркістан облыстық «Фараб» әмбебап ғылыми кітапханасының екінші дәрежелі кітапханашысы Мейрамкүл Сұлтанбекқызы байқауға әділ қазылық етті.Іс-шара барысында қатысушылар үш кезең бойынша сынға түсті:
I кезеңде кітапханашылар өз-өзін таныстырды.II кезеңде кітапханалық қызмет туралы дайындаған бейнеролигін көрсетті.III кезеңде дайындалған викториналық сұрақтарға жауап беріп, кәсіби біліктілігін көрсетті.Қазылар қатысушылардың шығармашылық белсенділігін, кәсіби дайындығын, сахнада өзін-өзі ұстау мәдениетін, жауапкершілігін, зияткерлік деңгейін ескере отырып, үздіктерді анықтады.Әділ қазы алқаларының шешімімен
III орын Отырар аудандық орталықтандырылған кітапханалар жүйесінің қызметкері Рысалды Есілбекқызына,III орын Түркістан қалалық орталықтандырылған кітапханалар жүйесінің қызметкері Айсұлу Тұрарбекқызына,
II орын Сарыағаш аудандық орталықтандырылған кітапханалар жүйесінің қызметкері Мақпал Маратқызына,
I орын Мақтаарал аудандық орталықтандырылған кітапханалар жүйесінің қызметкері Сымбат Асанқызына,
Бас жүлде Арыс аудандық орталықтандырылған кітапханалар жүйесінің қызметкері Гүлайхан Жаңабайқызына бұйырды. Қатысушыларға арнайы сыйлықтар мен дипломдар табысталды.Шара соңында барлық қатысушыға арнайы дипломдар мен қаржылық ынталандыру сыйлықтары табысталды. Сонымен қатар, Түркістан облыстық мәдениет басқармасының және «Фараб» әмбебап ғылыми кітапханасының арнайы сыйлығы лайықты иелерін тапты.Түркістан облысы мәдениет басқармасының баспасөз қызметі
08 июля 2025
ТҮРКІСТАНДА ҰЛТТЫҚ ДОМБЫРА КҮНІНЕ АРНАЛҒАН «ДОМБЫРА – ДАСТАН» ІС-ШАРАСЫ ӨТТІТүркістан қаласындағы «Амфитеатр» кешенінде Ұлттық домбыра күніне орай «Домбыра – дастан» атты мерекелік іс-шара өтті. Түркістан облыстық мәдениет басқармасы басшысының орынбасары Ержан Исатаев құттықтау сөз сөйлеп, домбыраның ұлт руханиятындағы маңызына тоқталды.
– Ұлттық мұраны ұлықтайтын бүгінгі шараның руханиятты дамытуға қосар үлесі мол. Домбыра – ұлттық аспап қана емес, елдің болмысын, жан-дүниесін айшықтайтын ұлы мұра. Осы құндылығымызды қастерлеп, жанын серік еткен барлық қатысушыларға алғысымды білдіремін, – деді Ержан Ибадуллаұлы.
Кеш барысында Сүгір Әлиұлының «Ыңғай төк», Абай Желдібаевтың «Ерке сылқым», Зейнеп Аласьяның «Ертұғырыл», Құрманғазының «Айжанқыз», «Адай», «Балбырауын» сияқты ұлттық күйлері орындалып, көрерменнің зор қошеметіне бөленді. «Тұмар», «Алқоңыр», «Түркістан» ансамбльдері мен мемлекеттік шығармашылық тапсырыс аясында ашылған үйірмелердің шәкірттері өз орындаушылық шеберлігімен көзге түсті.
Сондай-ақ «Фараб», «Самғау» би ансамбльдерінің билері сахнаның көркін аша түсті. «Жайсаң дала», «Ақжелең», «Тұлғаларға туынды» сынды шығармалар ұлттық мұраның ұлағатын сездірді. Шараның шарықтау шегі ретінде домбырашылар арасындағы күй тартысын атауға болады.
Кеш соңында барлық өнерпаздар мен мемлекеттік шығармашылық тапсырыс аясындағы домбыра үйірмелерінің оқушылары қалың көрерменмен бірге «Балбырауын» күйін орындады. Көрермендер қол соғып, алғысын білдірді.
Айта кетейік, Түркістан облысында «Ұлттық домбыра күні» мерекесіне орай бірқатар шара өткізілді. Атап айтқанда, 30 маусым күні Түркістан қаласында «Тұран даласының күйлері» қалалық күйішілер байқауы, «Достық» үйінде «Үкілі домбыра» фестивалі ұйымдастырылды. Сондай-ақ, 1 шілде күні Түркістан қаласы «Фараб» кітапханасында дәстүрлі «Күй құдіреті» республикалық күйшілер байқауы ұйымдастырылып, республиканың әр аймағынан келген 25 өнерпаз бақ сынады. Аудан, қалаларда 100-ге тарта мәдени-көпшілік шаралар ұйымдастырылды.
Түркістан облысы мәдениет басқармасының баспасөз қызметі
08 июля 2025
«ТАЗА ҚАЗАҚСТАН»: ТҮРКІСТАНДА МӘДЕНИЕТ ҚЫЗМЕТКЕРЛЕРІ СЕНБІЛІККЕ АТСАЛЫСТЫТүркістан қаласындағы облыстық мәдениет және өнер мекемелерінің қызметкерлері жалпықалалық сенбілікке атсалысты.
«Таза Қазақстан» бағдарламасы аясындағы сенбілік киелі шаһарды көркейту, санитарлық тазалықты қамтамасыз ету мақсатында ұйымдастырылды. Мәдениет ошақтары көпшілікпен бірлесе отырып, қала көшелерінде тазалық жұмыстарын жүргізді. Қоршаған ортаны күтіп ұстауға үлес қосып, айналаны таза ұстауға шақырды.
Айта кетейік, тазалық жұмыстары тұрақты түрде жүргізіліп келеді. Киелі орындар мен мәдени мұралардың маңайында өткізіліп тұрады. Сондай-ақ мекеме аумақтары да тазартылып отырады.
08 июля 2025
ТҮРКІСТАНДА ҰЛТТЫҚ ДОМБЫРА КҮНІНЕ ОРАЙ МЕРЕКЕЛІК ІС-ШАРА ӨТТІ«Фараб» әмбебап ғылыми кітапханасында Ұлттық домбыра күніне арналған «Домбыра – рухтың үні» атты мерекелік іс-шара өтті.
Іс-шараның мақсаты – ұлттық өнерді ұлықтап, күй өнерін жас ұрпаққа насихаттау, рухани құндылықтарды дәріптеу.
Бағдарлама аясында «Ақжайық» музыка мектебінің оқушылары ұлттық нақыштағы бірнеше күйді нақышына келтіре орындап, көрермендерге ерекше әсер сыйлады. Сонымен қатар айтыскер ақындар мен өнер саласының танымал өкілдері арнау өлеңдерін оқып, ұлттық мұрамыздың маңызын жыр жолдарымен жеткізді.
Салтанатты жиында Түркістан қаласы әкімдігінің Мәдениет, тілдерді дамыту, дене шынықтыру және спорт бөлімінің басшысы Қадырболат Мұсағалиев құттықтау сөз сөйлеп, дәстүрлі өнерді қолдаудың маңыздылығына тоқталды. Шара соңында белсенді қатысушылар мен өнерпаздар арнайы марапаттарға ие болды.
08 июля 2025
БАЛАЛАР КІТАПХАНАСЫ САЯБАҚТА ТАНЫМДЫҚ ШАРА ӨТКІЗДІТүркістан облыстық Ы.Алтынсарин атындағы балалар кітапханасы ашық аспан астында танымдық-мәдени іс-шара өткізді. «Жібек жолы» ойын-сауық саябағында бұл шара балалар кітапханасына оқырман тарту және кітапханаға деген қызығушылықты арттыру мақсатында ұйымдастырылған.
«Саябақтағы кітапхана» шара аясында кітап көрмелері жасақталып, келушілерге балалар әдебиетімен танысу, балаларға арнап түрлі интерактивті тапсырмалар, логикалық ойындарға қатысу мүмкіндігі ұсынылды. Балалар мен ата-аналар белсенділік танытып, кітапхана қызметкерлерінен кеңес алып, кітапхана қызметтері жайлы мағлұмат алды.
Ата-аналар мен балалар кітапхана қызметіне оң көзқарас танытып, алдағы уақытта кітапханаға жиі келуге ниет білдірді. Сондай-ақ «Тиянақты кітапханашы» жазғы оқу курсына қатысушы кітапханашылар да іс-шара қонақтарының қатарынан табылды.
Бұл жоба – кітапты көпшілікке жақындату, демалыс пен оқуды ұштастыра отырып, жаңа оқырмандарды тартудың тиімді жолдарының бірі ретінде өз нәтижесін береді деген сенімдеміз. Мұндай шаралар жас оқырмандарды кітаппен дос болуға баули отырып, олардың шығармашылық қабілеттерін дамытуға зор ықпал етеді.
Айта кетейік, бұл шара балалардың жазғы демалысы кезеңінде әр аптаның бейсенбі күндері қаламыздағы саябақтарда өткізіледі. Сонымен қатар демалыс уақытын пайдалы әрі қызықты өткізуге талпынып, ең көп кітап оқыған оқырмандарға түрлі сыйлықтар беріледі.
Социальные сети
Меню подвал