Наурыз мейрамын тойлау Маңғыстаудағы Амал мерекесінен басталады

Маңғыстау облысында Наурыз мейрамына арналған мерекелік іс-шаралар басталды. Дәстүр бойынша көктем мен жаңарудың жаршысы саналатын Амал мерекесінен Наурызнама онкүндігі басталып, ел бойынша Наурыз мейрамының шымылдығы ашылады.

Негізгі іс-шара өңірдің киелі орындарының бірі — Маңғыстау облысының ең биік нүктесі саналатын «Адай ата – Отпан тау» тарихи-мәдени кешенінде өтті.

Мерекелік іс-шараға Қазақстанның әр өңірінен келген қонақтар мен шетелдік меймандар да қатысты. Польша, Түркия және Өзбекстаннан келген туристер қазақ халқының салт-дәстүрі мен мәдениетімен танысты. Ал сахнада Қырғызстан, Түркия, Әзербайжан және Өзбекстаннан келген шығармашылық ұжымдар өнер көрсетті.

Айта кетейік, Мемлекет басшысы Қасым-Жомарт Тоқаев бекіткен Наурызнама онкүндігі тұжырымдамасына сәйкес, елімізде Наурыз мейрамын тойлау жыл сайын 14 наурызда — Амал мерекесінен басталады.

Бұл іс-шара Туризм және спорт министрлігі дайындаған 2026 жылға арналған зәкірлі мәдени-туристік іс-шаралар күнтізбесіне де енгізілген.

Отпан таудың шыңында 32 киіз үй тігіліп, мерекеге шамамен 5 мыңға жуық адам қатысты. Бағдарлама аясында «Ана жүрегі – мейірім мекені» аналар фестивалі, театрландырылған қойылым, халық қолөнерінің көрмесі, сондай-ақ Қазақ хандығы дәуіріне арналған VR-ойын мен 3D бұйымдар ұсынылған «Цифрлы киіз үй» (Digital Nauryz) жобасы таныстырылды.

Дәстүр бойынша Отпан таудың басында ұрпақтар сабақтастығы мен ел бірлігінің нышаны саналатын «Бірлік оты» жағылды.