Қазақстан Республикасы Үкіметінің 2024 жылғы 31 мамырдағы № 432 қаулысымен бекітілген Қазақстан Республикасында заңсыз ойын бизнесі мен лудоманияға қарсы іс-қимыл жөніндегі 2024–2026 жылдарға арналған кешенді жоспар (бұдан әрі – Кешенді жоспар) бекітілді. Кешенді жоспар 28 іс-шараны қамтитын төрт бағыттан тұрады. Төрт бағыттың бірі – лудоманияның алдын алуды ұйымдастыру. Оны орындау мақсатында келесідей шаралар іске асырылып жатыр:
- түрлі демографиялық топтар арасында құмар ойындарға деген құштарлықтың себептері мен ауқымы туралы республикалық деңгейде әлеуметтік зерттеу жүргізілді. Жаппай сауалнамаға еліміздің түкпір-түкпірінен Қазақстан Республикасының 5 998 азаматы қатыстырылып, ойын бизнесі саласындағы және онымен байланысты салалардан 20 сарапшымен сұхбат жүргізілді.
Нәтижесінде, Қазақстан азаматтары арасында құмар ойындармен тұрақты түрде айналысатын адамдардың құмар ойындардың түрлеріне қарай болжамды саны келесідей:
- лицензиясы бар казино және ойын автоматтары залы – 459 444 адам;
- интернет-казино (Қазақстанда тыйым салынған) – 484 055 адам;
- лицензиясы бар букмекер кеңселері – 456 276 адам;
- лицензиясы жоқ букмекерлік кеңселер – 494 019 адам;
- заңды лотереялар – 491 710 адам.
-оқушылар, студенттер және жастардың басқа санаттары арасында лудоманияның алдын алу бойынша әдістемелік ұсынымдар әзірленіп, қабылданды және мүдделі тараптарға жолданды;
- лудоманияның алдын алу үшін жастармен жұмыс істейтін жаттықтырушыларға жалпыға бірдей оқыту ұйымдастырылды. Оған Қазақстанның түкпір-түкпірінен білім беру ұйымдары мен әскери бөлімдердің 800-ден астам педагогы мен психологтары қатысты;
- мектептерде ата-аналарды педагогикалық қолдау орталықтары құрылды. Ата-аналардың оқу бағдарламасына «Ойын және интернетке тәуелділіктің, лудоманияның алдын алу» бөлімі енгізілген (1-11 сынып ата-аналарына арналған 24 сабақ, жүйелілік – айына 2 рет);
- 6 мыңнан астам мектеп тәрбие жұмысының жоспарына білім алушылар арасында интернетке тәуелділіктің, құмар ойындардың, лудоманияның және геймингтің алдын алу бөлімін енгізді;
- діни қызметшілер діни бірлестіктерге келушілер арасында құмар ойындардың зияны және олардың салдары туралы түсіндіру жұмыстарын жүргізіп жатыр (мысалы, Қазақстан Мұсылмандары діни басқармасы 1 миллионнан астам діндарды қамти отырып, 4 мыңнан астам іс-шара өткізді);
- Ғылым және жоғары білім министрлігінің желісі бойынша 2024 жылы салауатты өмір салтын насихаттау мақсатында жоғары оқу орындарымен
«Салауатты өмір салты үшін!» флешмобы, денсаулық фестивалі, «Бірінші курс студенті» спартакиадасы секілді жалпы 400 іс-шара өткізілді;
- Қорғаныс министрлігінің желісі бойынша әскери бөлімдер мен мекемелер қолбасшылығымен 38 дөңгелек үстел, 7 конференция, 14 жиналыс ұйымдастырылды, 16 919 әскери қызметшімен сұхбат және әңгімелесу өткізілді.
