Ертіс ауданының полиция қызметкерлеріне алғыс білдірілді

"Көмек көрсетуге қолын созуға дайын болу — шынайы құрметке лайық қасиет»
Ертіс ауданының полиция бөліміне Ертіс ауылының тұрғыны Жанар Дюсембинадан полиция қызметкерлерінің жанашырлығы, мұқият қарым-қатынасы және көрсеткен көмегі үшін алғыс хат келіп түсті.
Өзінің алғыс хатында тұрғын полиция бөлімінің бірінші орынбасары Ғабит Мұқанов пен полиция қызметкері Азамат Саяновқа шынайы ризашылығын білдірді.
Жанар Дюсембинаның айтуынша, оның ұлы стадионда ішінде ұялы телефон мен қуаттағыш құрылғысы бар барсетканы ұмытып кеткен. Жоғалған затты табу мақсатында бірнеше рет хабарландыру беріп, түрлі чаттарға жүгінгенімен, ұзақ уақыт бойы ешкім хабарласпаған.
Полиция қызметкерлерінің көмегінің арқасында ұмыт қалған заттар иелеріне қайтарылды. Бұл көмек отбасы үшін жай ғана тұрмыстық мәселенің шешімі емес, қиын жағдайда бейжай қалмай, қол ұшын созған жандарға алғыс білдіруге себеп болды.
Ғабит Мұқановқа ерекше ризашылығын білдіріп, оның азаматтардың өтініштеріне мұқият қарайтынын, әрбір жағдайға түсіністікпен қарап, мәселенің шешімін табуға дайын екенін атап өтті.
«Полиция қызметкерлерінің өз міндеттерін орындап қана қоймай, адамдарға адамгершілік танытып, көңіл бөліп, шын ниетімен көмектесуге ұмтылғаны өте құнды. Осындай азаматтардың арқасында құқық қорғау органдарына деген сенім артып, әрдайым көмекке келуге дайын жандардың бар екеніне көз жеткіземіз», — деп атап өтті Жанар Дюсембина.
Мұндай алғыс сөздер полиция қызметінің тек қоғамдық тәртіпті қамтамасыз етумен шектелмейтінін, сонымен қатар азаматтарға күнделікті көмек көрсету, олардың мәселелеріне назар аудару және әрбір өтінішке жауапкершілікпен қарау маңызды екенін тағы бір мәрте дәлелдейді.
Азаматтардың сенімі нақты істер арқылы қалыптасады, ал шынайы алғыс — адал қызмет пен адамгершілік көмектің жоғары бағаланғанының айғағы.