"Техникалық реттеу және метрология мәселелері жөніндегі ведомствоаралық комиссия туралы" Қазақстан Республикасы Премьер-Министрінің өкім жобасы

Жоба

 

 

Техникалық реттеу және метрология мәселелері жөніндегі ведомствоаралық комиссия туралы

 

 

  1. Техникалық реттеу және метрология мәселелері жөніндегі ведомствоаралық комиссия (бұдан әрі – Комиссия) құрылсын.
  2. Қоса беріліп отырған:

1) Комиссия құрамы;

2) Комиссия туралы ереже бекітілсін.

 

 

Премьер-Министр                                                    Ә. Смайылов

 

Қазақстан Республикасы

Премьер-Министрінің

2022 жылғы __________

№ ___ өкімімен бекітілген

 

 

Техникалық реттеу және метрология мәселелері жөніндегі ведомствоаралық комиссияның құрамы

 

Қазақстан Республикасы Премьер-Министрінің орынбасары – Сауда және интеграция министрі, төраға;

Қазақстан Республикасы Сауда және интеграция бірінші вице-министрі, төраға орынбасары;

Қазақстан Республикасы Сауда және интеграция министрлігі Техникалық реттеу және метрология комитетінің төрағасы, хатшы;

Қазақстан Республикасы Денсаулық сақтау вице-министрі (келісім бойынша);

Қазақстан Республикасы Ұлттық экономика вице-министрі (келісім бойынша);

Қазақстан Республикасы Ішкі істер министрінің орынбасары (келісім бойынша);

Қазақстан Республикасы Білім және ғылым вице-министрі (келісім бойынша);

Қазақстан Республикасы Энергетика вице-министрі (келісім бойынша);

Қазақстан Республикасы Ауыл шаруашылығы вице-министрі (келісім бойынша);

Қазақстан Республикасы Мәдениет және спорт вице-министрі (келісім бойынша);

Қазақстан Республикасы Индустрия және инфрақұрылымдық даму
вице-министрі (келісім бойынша);

Қазақстан Республикасы Әділет вице-министрі (келісім бойынша);

Қазақстан Республикасы Экология, геология және табиғи ресурстар
вице-министрі (келісім бойынша);

Қазақстан Республикасы Қорғаныс министрінің орынбасары (келісім бойынша);

Қазақстан Республикасы Төтенше жағдайлар вице-министрі (келісім бойынша);

Қазақстан Республикасы Қаржы вице-министрі (келісім бойынша);

Қазақстан Республикасы Цифрлық даму, инновациялар және аэроғарыш өнеркәсібі вице-министрі (келісім бойынша);

Қазақстан Республикасы Еңбек және халықты әлеуметтік қорғау
вице-министрі (келісім бойынша);

Қазақстан Республикасы Ұлттық Кәсіпкерлер палатасы басқармасы төрағасының орынбасары (келісім бойынша).

Қазақстан Республикасы

Премьер-Министрінің

2022 жылғы __________

№ ___ өкімімен бекітілген

 

 

Техникалық реттеу және метрология мәселелері жөніндегі ведомствоаралық комиссия туралы ереже

 

 

1-тарау. Жалпы ережелер

 

  1. Техникалық реттеу және метрология мәселелері жөніндегі ведомствоаралық комиссия (бұдан әрі – Комиссия) Қазақстан Республикасы Үкіметінің жанындағы консультативтік-кеңесші орган болып табылады.
  2. Комиссия өз қызметінде Қазақстан Республикасының Конституциясын, Қазақстан Республикасының заңдарын және Қазақстан Республикасының өзге де нормативтік құқықтық актілерін, сондай-ақ осы Ережені басшылыққа алады.
  3. Қазақстан Республикасының Сауда және интеграция министрлігі Комиссияның жұмыс органы болып табылады.
  4. Комиссияның отырыстары қажеттілгіне қарай өткізіледі және егер оған Комиссия мүшелерінің жалпы санының кемінде үштен екісі қатысса заңды болып саналады.

 

 

2-тарау. Комиссияның міндеттері

 

  1. Комиссияның негізгі міндеттері:

1) техникалық реттеу және метрология жүйелерін жетілдіру мәселелері бойынша ұсынымдар әзірлеу;

2) техникалық реттеу және метрология саласындағы мемлекеттік саясаттың негізгі бағыттарын айқындау бойынша ұсынымдар әзірлеу;

3) техникалық реттеу және метрология саласындағы халықаралық ынтымақтастықты және интеграциялық өзара іс-қимылды дамыту перспективаларын қарау;

4) мемлекеттік органдардың, шаруашылық жүргізуші субъектілердің және қоғамдық бірлестіктердің ұсыныстарын талдауды жүзеге асыру;

5) техникалық регламенттерді әзірлеу және оларға өзгерістер енгізу бойынша ұсыныстар дайындау;

6) салаларда техникалық реттеу және метрология жүйелерін дамыту жөнінде ұсыныстар қалыптастыру;

7) техникалық регламенттер мен стандарттарды енгізу мәселелерін қарау жөнінде ұсыныстар қалыптастыру.

 

 

3-тарау. Комиссияның ұйымдастырылуы мен жұмыс тәртібі

 

  1. Комиссияның ұйымдастырылуы мен жұмыс тәртібі Қазақстан Республикасы Үкіметінің 1999 жылғы 16 наурыздағы № 247 қаулысымен бекітілген Қазақстан Республикасы Үкіметінің жанындағы консультациялық-кеңесші органдар мен жұмыс топтарын құру тәртібі, қызметі мен таратылуы туралы нұсқаулыққа (бұдан әрі – Нұсқаулық) сәйкес жүзеге асырылады.
  2. Комиссияның төрағасы оның қызметіне басшылық жасайды, отырыстарда төрағалық етеді, жұмысын жоспарлайды.

Комиссияның төрағасы болмаған уақытта оның функцияларын орынбасары атқарады.

  1. Комиссияның жұмыс органы Комиссия жұмысын ұйымдастырушылық-техникалық қамтамасыз етуді жүзеге асырады, оның ішінде Комиссия отырысының күн тәртібі бойынша ұсыныстарды, қажетті құжаттарды, Комиссия отырысы өткізілгенге дейін 7 (жеті) жұмыс күні қалғанда хаттама жобасымен қоса Комиссия мүшелеріне жіберілуі тиіс материалдарды дайындайды.
  2. Комиссия отырысы өткізілгеннен кейін Комиссия хатшысы хаттама ресімдейді. Хатшы Комиссияның мүшесі болып табылмайды.
  3. Комиссияның шешімдері ашық дауыс беру арқылы қабылданады және егер оларға Комиссия отырысына қатысқан мүшелердің жалпы санының көпшілігі дауыс берсе, қабылданды деп есептеледі. Дауыс беру Комиссия отырысында Нұсқаулыққа қосымшаға сәйкес нысан бойынша дауыс беру парағын толтыру жолымен жүргізіледі. Дауыстар тең болған жағдайда, төраға дауыс берген шешім қабылданды деп есептеледі.

Комиссия мүшелері ерекше пікірін білдіре алады, оны білдірген жағдайда, ол жазбаша түрде баяндалады және Нұсқаулықтың 24-тармағында көзделген Комиссияның есеп-хатына қоса беріледі.

  1. Комиссия отырыстарын өткізу нәтижелері бойынша және дауыс беру парақтарының негізінде 5 (бес) жұмыс күні ішінде хаттама жасалады, оған төраға қол қояды.
  2. Егер қаралатын мәселелер бойынша дауыс беру парағында көзделмеген шешімдер болса, Комиссия хатшысы 2 (екі) жұмыс күні ішінде хаттаманың жобасын жасап, Комиссияның мүшелеріне дауыс беру үшін электрондық цифрлық қолтаңба (бұдан әрі – ЭЦҚ) қойылған электрондық құжат форматында жібереді.
  3. Хаттама жобасын алғаннан кейін Комиссияның мүшелері 3 (үш) жұмыс күні ішінде ЭЦҚ қойылған электрондық құжат форматындағы хаттарды жіберу арқылы дауыс берулері қажет. Егер Комиссия мүшесі белгіленген мерзімде дауыс бермесе, хаттама жобасына ескертулерсіз дауыс берілді деп саналады.

 

 

4-тарау. Комиссияның қызметін тоқтату

 

  1. Комиссия өзінің қызметін Қазақстан Республикасы Премьер-Министрінің өкімімен тоқтатады.
распоряжение
Дата публикации
07 февраля 2022