Сингапур Республикасындағы Қазақстан Республикасы Елшілігі Австралияның мемлекеттік шекарасынан өту кезінде Қазақстан Республикасы азаматтарының визаларының күшін жою жағдайлары жиілеп отырғанын хабарлайды.
Бұл шаралар қысқа мерзімді Visitor (Subclass 600) визасымен келетін тұлғаларға қатысты көші-қон бақылауының күшеюіне байланысты енгізілуде. Елшілік аталған санаттағы визаның жұмыс істеуге құқық бермейтінін және мұндай әрекеттердің Австралия заңнамасын тікелей бұзу болып саналатынын ескертеді.
Сапардың туристік мақсатын растай алмаған жағдайда (қайтар билетінің, қонақүй броньдарының және жеткілікті қаржылық қаражаттың болуын қоса алғанда) визалар шекарадан өту барысында бірден күшін жояды, азаматтар депортацияланады (қажет болған жағдайда арнайы орындарға уақытша орналастырылады), сондай-ақ үш жыл және одан да ұзақ мерзімге елге кіруге тыйым салынады.
Құқық бұзушылықтар туралы мәліметтер халықаралық дерекқорларға енгізіледі, бұл өзге мемлекеттердің визаларын алуына шектеулерге әкелуі мүмкін.
Сонымен қатар, жалған мәліметтер негізінде Австралия визаларын рәсімдеуге жәрдемдесетін ұйымдасқан әрекеттер Австралия заңнамасына сәйкес құқық бұзушылық болып саналып, ауыр құқықтық салдарға, оның ішінде қылмыстық жауапкершілікке әкелуі мүмкін.
Елшілік Қазақстан Республикасы азаматтарын визалық режим талаптарын қатаң сақтауға, Австралия заңнамасын бұлжытпай орындауға және заңсыз әрекеттерге тартылудан сақ болуға шақырады.
Қазақстанның Сингапурдағы Елшісі Асқар Құттықадам Сингапур Сыртқы істер министрлігінің көпжақты ынтымақтастық мәселелері жөніндегі Бас директоры Нг Бун Янмен жұмыс кездесуін өткізді.
Қазақстандық дипломат 2026 жылғы 15 наурызда республикалық референдумда қабылданған ҚР жаңа Конституциясына сәйкес, еліміз халықаралық құқықтың қағидаттары мен нормаларын құрметтейтінін, бейбітшілік пен мүдделі мемлекеттермен ынтымақтастық саясатын жүргізетінін, олардың ішкі істеріне араласпау және халықаралық дауларды бейбіт жолмен шешу ұстанымын ұстанатынын атап өтті.
Осы орайда тараптар Қазақстан мен Сингапурдың мультилатерализм мен халықаралық құқық идеалдарына берік бейілділігін, сондай-ақ жаһандық сын-қатерлер жағдайында орта және шағын мемлекеттердің күш-жігерін біріктіру қажеттігін қанағаттанушылықпен атап өтті.
Қазақстандық дипломат Президент Қ.К.Тоқаев 2025 жылғы қыркүйекте Нью-Йоркте өткен БҰҰ Бас Ассамблеясының 80-сессиясының жалпы дебаттарындағы сөзінде мәлімдегендей БҰҰ реформасы жөніндегі Астананың негізгі ұстанымдарын, соның ішінде Азия, Африка және Латын Америкасы елдерінің мүдделерін ескере отырып Қауіпсіздік Кеңесін жаңғырту мәселесімен таныстырды.
Қазақстан тарапы БҰҰ жүйесін трансформациялау және нығайту ісіне түрлі халықаралық бастамаларды ұсыну арқылы практикалық үлес қосуға ұмтылатыны атап өтілді. Олардың қатарында 2025 жылы Алматы қаласында Орталық Азия мен Ауғанстан үшін БҰҰ-ның Орнықты даму мақсаттары жөніндегі Өңірлік орталығын құру, БҰҰ-ның ЭСКАТО аясында тұрақты даму үшін цифрлық шешімдердің Азия-Тынық мұхиты орталығын құру және Халықаралық биологиялық қауіпсіздік агенттігін құру жөніндегі ұсыныстар бар.
Кездесу барысында ерекше назар Мемлекет басшысы Қ.К.Тоқаевтың БҰҰ аясында Халықаралық су ұйымын құру бастамасына аударылды. Сингапур тарапы 2026 жылғы 23 сәуірде Астанада өтетін Өңірлік экологиялық саммит аясындағы консультациялар шеңберінде осы маңызды идеяны талқылауға қайтадан шақырылды.
Кездесу барысында тараптар халықаралық аренадағы қазақ-сингапур өзара іс-қимылының жай-күйіне, соның ішінде бір-бірінің бастамалары мен кандидатураларын өзара қолдауға оң баға берді. 2026 жылғы сәуірдің соңында Астанада өтетін сыртқы істер министрліктері арасындағы саяси консультациялардың бесінші раунды және жоғары деңгейдегі өзге де жоспарланған іс-шаралар қарсаңында тараптар екі елдің басымдықтары мен БҰҰ жүйесінің бірқатар мекемелерінің басшылық органдарына ұсынылатын кандидатуралар бойынша өз ұстанымдары бойынша «сағаттарды теңестірді».
Сингапур, 2026 жылғы 8 сәуір – Қазақстанның Сингапурдағы Елшісі Асқар Куттыкадам Сингапурдың Цифрлық даму және ақпарат министрлігінің Халықаралық байланыстар департаментінің директоры Чой Ён Конгпен цифрландыру, жасанды интеллект (ЖИ), киберқауіпсіздік және GovTech салаларындағы екіжақты өзара іс-қимыл перспективаларын талқылау мақсатында кездесу өткізді.
Қазақстандық дипломат цифрландыру мен ЖИ еліміздің жаңа экономикалық моделінің негізіне айналып келе жатқанын атап өтті. Осыған байланысты Президент Қасым-Жомарт Тоқаев 2026 жылды Цифрландыру және жасанды интеллект жылы деп жариялап, Үкімет алдына алдағы 3 жыл ішінде Қазақстанды толыққанды цифрлық мемлекетке айналдыру жөнінде өршіл міндет қойды.
Сингапур тарапы Қазақстанның экономиканың барлық салаларында ЖИ технологияларын ауқымды енгізу үшін құқықтық және институционалдық негіз қалыптастырғаны туралы хабардар етілді, оның ішінде «Жасанды интеллектті дамыту туралы» Заң мен Цифрлық кодекстің қабылдануы. Елші жаңа Конституцияда алғаш рет азаматтардың цифрлық құқықтары бекітілгенін ерекше атап өтті, бұл цифрландырудың қарқынды дамуы мен киберқылмыстың өсуі жағдайында аса маңызды.
Жасанды интеллект және цифрлық даму министрлігі, Alem.ai халықаралық жасанды интеллект орталығы, Қазақстан Республикасы Президенті жанындағы ЖИ дамыту жөніндегі кеңес тиімді жұмыс істеуде.
GovTech саласына қатысты Біріккен Ұлттар Ұйымының электрондық үкіметті дамыту индексінде Қазақстан 193 мемлекет ішінде 24-орында екені атап өтілді. Сонымен қатар, еліміз онлайн-қызметтердің сапасы бойынша әлемнің үздік ондығына кіреді.
Цифрлық инфрақұрылымды дамыту тұрғысынан Alem.Cloud және AL Farabium суперкомпьютерлік кластерлерін іске қосу, NVIDIA компаниясымен серіктестікте егемен есептеу хабын құру, «Деректерді өңдеу орталықтарының алқабы» кешенді жобасын іске асыру туралы ақпарат жеткізілді.
Адами капиталды дамыту аясында Мемлекет басшысы Қасым-Жомарт Тоқаевтың тапсырмасымен 2026 жылы Қазақстанда ЖИ университеті құрылатыны атап өтілді.
Чой Ён Конг Қазақстанның жетістіктеріне оң баға беріп, өз тарапынан Сингапурдың осы саладағы озық тәжірибесінің жекелеген аспектілері туралы ақпарат берді. Атап айтқанда, ЖИ жөніндегі Ұлттық кеңестің жұмысы, «One-North» ғылыми-зерттеу және жоғары технологиялық кластеріндегі жаңа ЖИ паркі, кәсіби құзыреттер мен ЖИ сауаттылығын дамыту, шағын және орта бизнес деңгейінде ЖИ технологияларын енгізуді қолдау шаралары баяндалды.
Цифрландыру мен ЖИ саласындағы екі елдің айқын жетістіктері аясында тараптар бірлескен жұмыстың жақсы перспективалары бар екендігі жөнінде ортақ пікірге келді. Осы бағыттағы оң қадамдар ретінде 2026 жылғы наурызда «Singapore Cooperation Enterprise» даму саласындағы ынтымақтастық агенттігі делегациясының Қазақстан Республикасының Цифрлық даму министрлігі өкілдерімен кездесуі, әл-Фараби атындағы ҚазҰУ базасында Қазақстан-Сингапур кванттық технологиялар орталығының ашылуы атап өтілді.
А.Куттыкадам мен Чой Ён Конг 2026 жыл ішінде Қазақстан мен Сингапурда өтетін салалық халықаралық форумдар мен көрмелерге екі елдің ресми өкілдері мен компанияларының қатысу мүмкіндіктері туралы пікір алмасты, оның ішінде 2026 жылғы қазанда Астанада өтетін «AI&Digital Bridge» форумы және 2026 жылғы мамырда Сингапурда өтетін «Asia Tech x Singapore» іс-шарасы бар.
Халықаралық деңгейдегі ынтымақтастық тұрғысынан Қазақстан Елшісі сингапур тарапына ЭСКАТО аясында Тұрақты даму үшін цифрлық шешімдердің Азия-Тынық мұхиты орталығын құру туралы қарардың тең демеушісі ретінде қатысу және 2027-2030 жылдар кезеңіне Халықаралық электр байланысы одағының (ITU) Кеңесіне Қазақстан кандидатурасын қолдау жөнінде өтініш білдірді.
Кездесу соңында А.Куттыкадам сингапурлық серіктестерді өңіріміздің жаңа цифрлық экожүйесін қалыптастыруға қатысуға шақырып, Қазақстанның бірлескен жұмысқа, жаңа идеяларға, технологияларға және ұзақ мерзімді жобаларға ашық екенін атап өтті.
Қазақстанның Сингапурдағы Елшісі Асқар Кұттыкадам Сингапур Сыртқы істер министрлігінің Бас директоры Дживан Сингхпен жұмыс кездесуін өткізді.
Қазақстандық дипломат сұхбаттасушыны еліміздің дамуындағы сапалы жаңа кезеңнің басталуын айқындаған тарихи Конституциялық реформа туралы, сондай-ақ Президент Қасым-Жомарт Тоқаевтың Әділетті және Прогрессивті Қазақстан құру жөніндегі көзқарасы туралы хабардар етті.
Саяси өзгерістер ұлттық экономиканы кешенді қайта құрумен қатар дамып келе жатқаны, соның ішінде Мемлекет басшысы жариялаған Цифрландыру және жасанды интеллект жылы аясында жүзеге асырылып жатқаны атап өтілді.
Кездесу барысында тараптар екіжақты және көпжақты форматтардағы ынтымақтастықтың өзекті күн тәртібін талқылады, соның ішінде 2026 жылғы сәуір айының соңында Астанада өтетін сыртқы істер министрліктері арасындағы Саяси консультациялардың кезекті раундын өткізу мәселесі қаралды.
Сингапур тарапы 2026 жылғы 22-24 сәуір кезеңінде Астанада өтетін Өңірлік экологиялық саммитті өткізу және Президент Қ.К.Тоқаевтың Халықаралық су ұйымын құру бастамасын қоса алғанда Қазақстанның маңызды халықаралық бастамаларына қатысуға және қолдау көрсетуге шақырылды.
Жылы әрі ашық тұрғыда өткен кездесу қорытындысы бойынша тараптар өзара тиімді екіжақты серіктестікке жаңа серпін беру мақсатында тығыз байланыстарды қолдауға, соның ішінде жоғары деңгейдегі өзара сапарларды ұйымдастыру, сауда және инвестициялар саласындағы ынтымақтастықты ілгерілетуге уағдаласты.
Сингапур, 2026 жылғы 27 наурыз – «Азия–Еуропа қорының» (ASEF Open Day 2026) Ашық күні аясында жаңару, көктем және бірлік символы болып табылатын Наурыз мерекесіне арналған мәдени іс-шара өтті.
Сингапурдағы Қазақстан Республикасының Елшілігі ұлттық мәдени бағдарламаны ұсынып, іс-шара қонақтарының зор қызығушылығын тудырды. Атап айтқанда, жергілікті қазақстандық диаспора өкілдерінің қатысуымен ұлттық хореографияның әсемдігін паш ететін дәстүрлі қазақ биі, сондай-ақ Құрманғазының «Адай» күйі шеберлікпен орындалды.
Іс-шара қонақтары қатарында «Азия–Еуропа қорының» басшылығы мен қызметкерлері, Сингапурдағы шетелдік дипломатиялық корпус өкілдері, халықаралық ұйымдар мен кең жұртшылық болды.
Наурыз мерекесінің мәніне, оның адам мен табиғат үйлесімін, өзара құрмет пен халықтар арасындағы достық байланыстарды нығайтуды бейнелейтін ежелгі халықтық мейрам ретіндегі маңызына ерекше назар аударылды.
Қазақстанның аталған іс-шараға қатысуы Азия мен Еуропа елдері арасындағы мәдени-гуманитарлық байланыстарды одан әрі нығайтуға, ұлттық дәстүрлерді халықаралық деңгейде ілгерілетуге ықпал етті.
«Азия–Еуропа қоры» (ASEF) – 1997 жылы «Азия–Еуропа» форумы (ASEM) аясында құрылған үкіметаралық ұйым. Қор мәдениет, білім, орнықты даму және қоғамдық дипломатия салаларында бағдарламаларды жүзеге асырып, мәдениетаралық диалог пен өзара түсіністі дамытуға ықпал етеді. Қазақстан атынан Қорды басқарушы – Қазақстан Республикасының Сингапурдағы Елшісі.
Сингапур, 2026 жылғы 20 наурыз – Қазақстан Республикасының Сингапур Республикасындағы Елшісі Асқар Құттықадам Сингапурдың Сауда және индустрия министрлігінің Америка, Еуропа және Орталық Азия департаментінің директоры Жасмин Куа Зубайр ханыммен кездесу өткізді.
Кездесу барысында тараптар екіжақты сауда-экономикалық ынтымақтастықтың қазіргі жағдайы мен перспективаларын талқылап, жаһандық экономикалық күн тәртібіндегі өзекті мәселелер бойынша пікір алмасты.
Қазақстан Елшісі сингапурлық тарапты Қазақстан Республикасының жаңа Конституциясының қабылдануы туралы хабардар етті. Бұл оқиға Әділетті әрі Прогрессивті Қазақстанды қалыптастыру жолындағы сапалы жаңа кезеңнің басталуын білдіреді. Мемлекеттік басқарудың ашық әрі тұрақты жүйесін қалыптастыру, сондай-ақ басқа да маңызды жаңашылдықтар мемлекет пен бизнес арасындағы ұзақ мерзімді әріптестікті нығайтуға ықпал ететіні атап өтілді.
Тараптар халықаралық экономиканың қазіргі жай-күйін, соның ішінде жаһандық нарықтардың фрагментациясын, инвестициялар үшін бәсекенің күшеюін, сондай-ақ геосаяси шиеленіс пен логистикалық тәуекелдердің әлемдік экономикаға әсерін талқылады.
А.Құттықадам Қазақстанның ағымдағы экономикалық көрсеткіштері туралы мәлімет берді. 2025 жылдың қорытындысы бойынша ЖІӨ өсімі 6,5%-ды құрағаны атап өтілді. Негізгі драйверлер ретінде өңдеуші өнеркәсіп, құрылыс, көлік және қызмет көрсету секторлары айқындалды. Мемлекет басшысы Қ.К.Тоқаевтың тұрақты өсімді қамтамасыз ету және ұлттық экономиканы әртараптандыруға бағытталған стратегиясының арқасында Қазақстан алғаш рет әлемнің 50 ірі экономикасының қатарына енді.
Сұхбаттаушылар екіжақты ынтымақтастықтың басым бағыттарын, оның ішінде энергетика, цифрландыру және жасанды интеллект, су технологиялары, «жасыл экономика», сондай-ақ стратегиялық маңызды минералдар мен инновациялық әзірлемелер салаларын талқылады.
Инвестициялық ынтымақтастық аясында қазақстандық тарап Alatau City көпфункционалды урбанистік кластер жобасын таныстырды. Бұл жоба сингапурлық компаниялар үшін Қазақстан, Орталық Азия және іргелес өңірлер нарықтарына шығудың перспективалы платформасы ретінде ұсынылды.
Тараптар сондай-ақ Қазақстан мен Сингапур арасындағы қызметтер саудасы және инвестициялар туралы келісімді толыққанды іске асырудың маңыздылығын атап өтіп, жақын арада осы Келісімнің іске асырылуын қарау жөніндегі Бірлескен комитеттің алғашқы отырысын өткізуге дайын екендіктерін білдірді.
Кездесу барысында сингапурлық тарап Қазақстанның экономикалық өлшемі айқын халықаралық бастамалары туралы хабардар етілді, оның ішінде 2026 жылғы 22–24 сәуірде Астанада өтетін Өңірлік экологиялық саммит және Мемлекет басшысы Қ.К.Тоқаевтың Халықаралық су ұйымын құру жөніндегі бастамасы бар.
Кездесу қорытындысы бойынша тараптар Қазақстан мен Сингапур арасындағы әріптестікті одан әрі тереңдетуге және кең ауқымды бағыттар бойынша практикалық өзара іс-қимылды кеңейтуге өзара мүдделілігін растады, оның ішінде жоғары және ең жоғары деңгейдегі өзара сапарларға дайындық аясында.
Қазақстан Республикасы Тәуелсіздігінің 35 жылдығын мерекелеу аясында Абай атындағы Қазақ ұлттық опера және балет театрының Сингапурдағы гастрольдері өтті.
2026 жылғы 23–25 қаңтар аралығында гастрольдер Сингапур Ұлттық университеті (NUS) жанындағы Мәдени орталықтың Үлкен залында ұйымдастырылды. Бұл Қазақстан–Сингапур қарым-қатынастары тарихындағы Абай атындағы театр балет труппасының Сингапурдағы алғашқы гастрольдері болды.
Үш күнге созылған гастрольдік сапар барысында қазақстандық әртістер көрермен назарына «Классикалық балет жауһарлары» және «Кармен-сюита» атты бағдарламаны ұсынды. Атап өтерлігі, бір актілі, әлемге әйгілі «Кармен-сюита» балеті Сингапур сахнасында алғаш рет қойылды.
Артистердің жоғары кәсіби шеберлігі, сахналық безендіруі мен костюмдері сингапурлық көрермен тарапынан зор ықыласқа ие болды. Қойылымдар көрермендер мен қонақтардың жылы пікірлеріне ие болды.
Өткізілген гастрольдер Қазақстан мен Сингапур арасындағы мәдени диалогты дамытуға елеулі үлес қосты. Аталған іс-шара екіжақты достық байланыстарды нығайтуға, гуманитарлық ынтымақтастықты кеңейтуге және Қазақстанның бай мәдени мұрасын халықаралық аренада ілгерілетуге ықпал етті.
Сингапур Республикасындағы Қазақстан Республикасының Елшілігінің қолдауымен «Астана» халықаралық қаржы орталығы (АХҚО) AIFC Connect: Singapore 2025 атты іскерлік іс-шарасын Singapore FinTech Festival және Global Finance & Technology Network (GFTN) ұйымдастырған Insights Forum аясында өткізді.
Іс-шараның негізгі мақсаты – Қазақстан мен Сингапур арасындағы экономикалық байланыстарды нығайту және халықаралық инвесторларды АХҚО алаңы арқылы бірлескен жобаларды жүзеге асыруға тарту.
BIG Invest (BI Group Holding) инвестициялық платформасы мен OD Consulting компаниясының қолдауымен өткен форумға инвестициялық және қаржы ұйымдарының, банктердің, финтех және сақтандыру компанияларының өкілдері, сондай-ақ Сингапурдың жетекші қаржы орталықтарының, дипломатиялық корпус пен іскерлік қауымдастықтарының 150-ден астам қатысушысы жиналды.
Талқылау барысында АХҚО Әкімшілігі Басқармасының төрағасы Бахтияр Тлеубеков, AFSA бас директоры Евгения Богданова, сондай-ақ Kazakh Invest және екі елдің қаржы секторларының өкілдері инвестициялық мүмкіндіктерді, капитал және цифрлық активтер нарығының дамуын, сондай-ақ АХҚО-ның өңірлік қаржы орталығы ретіндегі рөлін талқылады.
Бүгінде АХҚО юрисдикциясында 48 сингапурлық компания тіркелген, олар қаржы, технология, сауда, өнеркәсіп және қызмет көрсету салаларында жұмыс істейді.
2025 жылғы 4 қарашада Сингапурдағы резиденциясымен Жаңа Зеландиядағы Қазақстан Республикасының Елшісі Асқар Құттықадам Жаңа Зеландияның халықаралық қатынастар институтында (New Zealand Institute of International Affairs – NZIIA) дәріс оқыды.
NZIIA – 1934 жылы құрылған тәуелсіз үкіметтік емес ұйым. Ол халықаралық қатынастар мен Жаңа Зеландияның сыртқы саясатына қызығушылық танытатын академиялық және іскер орта өкілдерін, дипломатиялық корпусты және қоғам мүшелерін біріктіреді.
Қазақстандық дипломат мемлекеттің 35 жылдық тәуелсіздік кезеңіндегі саяси және әлеуметтік-экономикалық дамудың негізгі бағыттарын, сондай-ақ еліміздің сыртқы саясатының басты қағидаттары мен басымдықтарын кеңінен баяндады.
Ерекше назар Орталық Азиядағы өңірлік ынтымақтастықтың серпінді үдерістеріне, оның ішінде Қазақстанның ұлттық мүдделері тұрғысынан қарауға аударылды.
Президент Қасым-Жомарт Тоқаевтың «Жасанды интеллект дәуіріндегі Қазақстан: өзекті міндеттер және оларды цифрлық трансформация арқылы шешу» атты Жолдауында айқындалған стратегиялық басымдықтар аясында Астананың жасанды интеллект пен цифрландыру, көлік пен логистика, өнеркәсіптік даму және сыни маңызды материалдарды игеру салаларындағы жетекші ұстанымдары талқыланды.
Дәріс соңында Елші А.Құттықадам жаңа зеландиялық сарапшылардың, студенттердің және жұртшылық өкілдерінің сұрақтарына жауап берді.
2025 жылғы 3 қарашада Жаңа Зеландия астанасы Веллингтон қаласында Сингапурдағы резиденциясымен Жаңа Зеландиядағы Қазақстан Елшісі А.Құттықадамның Жаңа Зеландияның Сыртқы істер министрі У.Питерспен кездесуі өтті.
Қазақ дипломаты Қазақстанның қазіргі әлеуметтік-экономикалық және саяси дамуы, сондай-ақ еліміздің сыртқы саясатының негізгі басымдықтары туралы ақпарат берді.
Тараптар екіжақты ынтымақтастықтың жай-күйі мен келешегі, сондай-ақ халықаралық ұйымдар аясындағы өзара іс-қимыл мәселелері бойынша пікір алмасты.
Министр У.Питерс пен Елші А.Құттықадам халықаралық күн тәртібіндегі бірқатар өзекті мәселелер бойынша пікір алмасты.