#Беларусь

Минск, 2021 жылғы 18 тамыз – Минск «Достық үйінің» тарихи ғимаратында Қазақстан Республикасының Беларусь Республикасындағы Елшілігінің ұйымдастыруымен дипломатиялық өкілдіктер командалары арасында Қазақстан Республикасы Тәуелсіздігінің 30 жылдығына арналған шахмат турнирі өтті.

Турнирдің салтанатты ашылуында Қазақстанның 30 жыл тәуелсіздігі ішінде қол жеткізген негізгі жетістіктері атап өтілді.

Турнирге Қазақстан, Түрікменстан, Өзбекстан, Швеция, Ұлыбритания, Сербия дипломатиялық миссияларының қызметкерлері, сондай-ақ Еуропалық Одақтың Беларусь Республикасындағы өкілдігі қатысты.

Кейбір ойыншылар бұған дейін шахмат тақтасында бірнеше рет кездесіп, бір-бірін жақсы білді  және ұтысқа жету үшін зор күш салды. Ойын қызу басталды және ФИДЕ қатаң талаптарына сәйкес Швейцария жүйесі бойынша өтті.

 Ымырасыз күресте ең көп ұпай жинаған үш ойыншы алдыға суырылып, турнир жеңімпаздары болып Хаджикурбан Довлетов (Түрікменстан) , Рикардсон Конрад (Швеция) және Ғалымжан Әлиханов  (Қазақстан) атанды.

Ойын соңында Қазақстан Республикасының Беларусь Республикасындағы Елшілігі барлық қатысушыларға зор алғыс білдіріп, турнир жеңімпаздары мен жүлдегерлеріне спорттық кубоктар мен грамоталар табыс етті.

Бұған қоса турнирге қатысқан дипломаттардың балалары – Мирас Әлиханов, Мадияр Қанат және Тамерлан Шуватов жеке марапаттарға ие болды. Олар жас ерекшеліктеріне қарамастан, ересек қарсыластарына лайықты қарсы тұра алды.

2021 жылғы 25 наурызда Қазақстанның Беларусьтегі Төтенше және Өкілетті Елшісі Асқар Бейсенбаевтың Беларусь Республикасының Президенті Александр Лукашенкомен кездесуі өтті.

Әңгіме барысында сауда-экономикалық және мәдени-гуманитарлық өзара іс-қимылды кеңейту қажеттігіне баса назар аудара отырып, ынтымақтастықтың басым бағыттары талқыланды.

«Қазақстан мен Беларусь кез келген аренада, соның ішінде халықаралық аренада бір-бірін қолдайтын достас елдер болып табылады. Сізге үлкен алғысымды білдіргім келеді. 2020 жыл оңай болған жоқ, пандемиямен күрес жылы болды, ол кезде барлық елдер оқшауланып жатқанда, Беларусь тарапынан біз үлкен достық көмекті көрдік», - деп атап өтті А. Бейсенбаев.

Беларусь Президенті өз кезегінде Қазақстан-Беларусь қарым-қатынасына жоғары баға беріп, олардың жан-жақты дамуына қолдау көрсетуге дайын екенін айтты.

«Беларусь пен Қазақстан соңғы жылдары қарым-қатынастарды дамытуда және интеграция тұрғысынан, әсіресе ЕАЭО желісі бойынша, екі жақты қатынастарда, саудада және кооперацияда өте көп жетістіктерге қол жеткізді. Әрине, бұл көлемді кеңейту үшін неғұрлым терең кооперация болғанын қалайтын едік. Біз өндірісті көбірек жүктеуге, құрастыру өндірісін құруға, барларын жүктеуге дайынбыз. Бір сөзбен айтқанда, үкіметтерге жұмыс істеу керек», - деп атап өтті Беларусь басшысы.

А. Лукашенко Қазақстан Президенті Қ. Тоқаевтың Беларусь Республикасына сапары екіжақты өзара іс-қимылға жаңа серпін бере алатынын атап өтті.

Кездесу достық және сенімді жағдайда өтті.