Аудан әкімі А.С. Оңғарбаевтың тапсырмасына сәйкес, Арал қаласының әкімі Р. Жанаев З. Шүкіров атындағы қалалық мәдениет үйінде көше комитет төрағаларымен және қала тұрғындарымен кездесу өткізді.
Кездесуде қала әкімі Р. Жанаев Арал қаласы бойынша атқарылған жұмыстар қорытындысы және алдағы уақытқа қойылған басым міндеттер жөнінде баяндама жасап, атқарылып жатқан жұмыстарға тоқталып, алдағы жоспарларымен бөлісті.
«Құрметті жерлестер! Бүгін Сіздердің назарларыңызға қаламыздың
әлеуметтік-экономикалық дамуы мен алға қойған міндеттердің орындалу барысы туралы негізгі көрсеткіштерді баяндайтын боламын. Біздің басты мақсатымыз - қала экономикасының тұрақты дамуын қамтамасыз ету, халықтың әл-ауқатын көтеріп, қаламыздың даму әлеуетін арттыру. Жоспарланған жобаларды кезең-кезеңімен іске асыра отырып, Арал қаласының әлеуметтік-экономикалық дамуын жаңа сатыға көтеру бағытындағы жұмыстарды жүйелі жалғастырамыз. Бұл орайда Сіздердің қолдауларыңыз біз үшін өте маңызды. Алдағы уақытта да бірлескен нәтижелі жұмысымыздың арқасында туған жеріміздің өркендету жолындағы бастамаларды табысты жүзеге асырамыз деп сенемін», - деді қала әкімі.
Басқосуда тұрғындар тарапынан кәріз жүйесі, түнгі жарықтандыру мен жол салу, ойын алаңдары, газ және электр энергиясының тарифтік бағасы, тұрғын үй, қоғамдық көлік сынды бірқатар мәселелер айтылды. Арал қаласының әкімі Р. Жанаев тұрғындар көтерген мәселелерді саралап, соған сәйкес тиісті шешімдер қабылданып, жұмыстар реттілігіне сай атқарылатындығын жеткізді.
Кездесуден соң, қала әкімі қала тұрғындарын жекелеген мәселелер бойынша қабылдады.
«Арал қаласы әкімінің аппараты» КММ
Арал ауданында Қазақстан ономаст ғалымдарының қоғамдық бірлестігі «Ономастар одағы» мен Қазақстан Республикасы Мәдениет және ақпарат министрлігінің Ономастика басқармасы бірлесіп жүзеге асырып жатқан «Тарихи-диахрондық әдісті қолдану арқылы ономастикалық атауларды жүйелендіру қызметі» жобасы аясындағы «Сыр даласында – көне есімдердің сыры» атты тарихи-танымдық ғылыми экспедициясының отырысы өтті.
Жиынға аудан әкімінің орынбасары Н.Бохаев төрағалық етіп, ауданға арнайы келген қонақтарды жиналғандарға таныстырып өтті.
Отырысқа жоба жетекшісі, филология ғылымдарының кандидаты, профессор Г.Бекенова, география ғылымдарының PhD докторы Н.Зинабдин, жоба мүшесі Д.Касимова, Қызылорда облыстық қоғамдық даму басқармасының Тілдерді дамыту және ономастика бөлімінің бас маманы Л.Жұмаханқызы, сондай-ақ ауданның өлкетанушылары, ардагерлері, қала, кент және ауылдық округ әкімдері мен сала мамандары қатысты.
Кездесу барысында ғылыми-зерттеу тобының экспедициялық жұмыстарының мақсаты таныстырылып, өңірдегі тарихи жер-су атауларын ғылыми тұрғыдан зерделеу, көне атаулардың шығу тарихын анықтау және оларды жүйелеу мәселелері талқыланды.
Жиында профессор Г.Бекенова экспедиция жұмысының негізгі бағыттарына тоқталса, Л.Жұмаханқызы мемлекеттік тіл саясаты мен ономастика саласындағы өзекті мәселелер бойынша баяндама жасады.
Сонымен қатар ауданның белгілі өлкетанушылары Ү.Қуатов, Б.Қуатов және Ә.Әуезов, Е.Абдулла өңір тарихы мен жер-су атауларына қатысты тағылымды ой-пікірлерін ортаға салып, ұсыныстарын жеткізді.
Экспедиция аясында ғылыми-зерттеу тобы облыс аумағындағы елді мекендерді аралап, жергілікті тұрғындармен, өлкетанушылармен және көнекөз қариялармен кездесулер өткізіп, тарихи атауларға қатысты құнды деректерді жинақтайды.
Аталған жоба өңірдің тарихи-мәдени мұрасын дәріптеуге, топонимиялық қорды толықтыруға және ономастика саласындағы ғылыми зерттеулердің дамуына өз үлесін қосады.
Қызылорда облысының Өңірлік коммуникациялар қызметінің ақпарат алаңында өткен баспасөз конференциясында Арал ауданының әкімі Аманжол Оңғарбаев өңірдің экологиялық ахуалын жақсарту және туризмді дамыту бағытында атқарылып жатқан жұмыстарға кеңінен тоқталды.
Арал теңізінің экологиялық мәселесін шешу тек өңір үшін ғана емес, халықаралық қауымдастық үшін де маңызды міндеттердің біріне айналып отыр. Соңғы жылдары теңіз тағдырына әлемдік ұйымдар, халықаралық қаржы институттары мен шетелдік серіктестердің қызығушылығы айтарлықтай артқан. Осыған байланысты ауданға бірнеше мәрте Үкімет мүшелері, халықаралық банктер мен қорлардың өкілдері, шетелдік елшілер келіп, экологиялық жобалардың жүзеге асу барысымен танысты. Олар Арал өңірінің табиғи ортасын қалпына келтіруге бағытталған бастамаларды қолдап, жаңа жобаларды қаржыландыруға қызығушылық танытып отыр.
- Экологиялық бастамалармен қатар Арал ауданында туризм саласын дамытуға ерекше басымдық берілуде. Бүгінде өңір Орта Азиядағы алғашқы «Geopark Aral» туристік орталығының ашылуымен халықаралық деңгейдегі жаңа даму кезеңіне қадам басты. Бұл жоба қарапайым туристік нысан емес. Ол Арал өңірінің табиғи, тарихи, геологиялық және мәдени мұрасын сақтап, әлемге танытуға бағытталған кешенді бастама болып саналады. Сонымен қатар экотуризмді дамытуға, халықтың экологиялық мәдениетін қалыптастыруға және жергілікті тұрғындардың табысын арттыруға мүмкіндік береді, - деді аудан әкімі.
Қазіргі таңда «Geopark Aral» ЮНЕСКО-ның Жаһандық геопарктер желісіне қосылуға үміткер ретінде қарастырылып отыр. Жақында халықаралық сарапшылар геопарк аумағында арнайы бағалау жұмыстарын жүргізіп, жобаның әлеуетіне жан-жақты талдау жасады. Алдағы уақытта ЮНЕСКО тарапынан түпкілікті шешім қабылданады.
- Егер жоба халықаралық геопарктер желісіне енсе, өңірдегі бес туристік нысанды халықаралық талаптарға сай дамытуға және шетелдік қорлар арқылы қосымша инвестиция тартуға жол ашылады. Бұл өз кезегінде Аралдың туристік тартымдылығын арттырып, өңір экономикасына тың серпін береді. Туризм саласындағы көрсеткіштер де оң динамиканы көрсетіп отыр. Биылғы жылдың алғашқы жартыжылдығында ауданға 4 мың 800-ден астам отандық турист келсе, шетелден келген саяхатшылар саны 300-ден асты. Бұл Аралға деген қызығушылықтың жылдан-жылға артып келе жатқанын аңғартады, - деді Аманжол Сақыпұлы.
Баспасөз конференциясында аудан әкімі экологиялық бастамалар мен туризмді дамыту өзара сабақтас бағыттар екенін атап өтті.
- Аралдың табиғи және тарихи мұрасын сақтай отырып, оны халықаралық деңгейдегі туристік орталыққа айналдыру біздің басты мақсатымыздың бірі. "Geopark Aral" жобасы арқылы өңірдің әлеуетін әлемге танытып, ЮНЕСКО-ның жаһандық геопарктер желісіне қосылуға күш салып келеміз. Бұл бастама халықаралық инвестиция тартуға, жаңа жұмыс орындарын ашуға және өңір экономикасын дамытуға зор мүмкіндік береді, – деді Арал ауданының әкімі Аманжол Оңғарбаев.
№19 Арал ауданының олимпиадалық резервтің мамандандырылған балалар-жасөспірімдер мектебінің бокс залы аумағында жаңа шағын футбол алаңы пайдалануға берілді.
Заманауи спорт нысаны ауданымыздың тумасы, белгілі кәсіпкер әрі меценат, Астана қаласының Бокс федерациясының басшысы Алмат Досымовтың демеушілігімен салынып, жобаға жеке қаражаты есебінен 12 миллион теңге қаржы жұмсалды.
Салтанатты шараға қатысқан аудан әкімінің орынбасары Нұрмұхамед Бохаев бұл игі бастаманың жастардың спортпен тұрақты айналысуына, салауатты өмір салтын қалыптастыруға және бұқаралық спортты дамытуға серпін беретінін атап өтті.
Бүгінде аталған спорт кешенінде 220 жасөспірім төрт білікті жаттықтырушының жетекшілігімен жаттығып келеді. Мұнда облыс пен республика деңгейінде жоғары жетістіктерге жеткен, халықаралық жарыстарда ел намысын қорғап жүрген талантты спортшылар тәрбиеленуде.
Шара барысында аудан әкімінің орынбасары Н.Бохаев туған жердің әлеуметтік дамуына тұрақты қолдау көрсетіп келе жатқан кәсіпкер Алмат Досымовқа аудан тұрғындары атынан алғыс білдіріп, ауданның ең жоғарғы марапаты «Құрмет грамотасын» табыстады.
Айта кетейік, туған жердің бүгініне бей-жай қарамай, ертеңіне жанашырлық танытып жүрген кәсіпкер, "Almara Petroleum" ЖШС директоры Алмат Маратұлы бұған дейін де көптеген әлеуметтік жобаларға демеушілік жасап келеді. Соның бірі ретінде қаладағы №62 мектеп-лицейі базасынан заманауи телестудия кабинетінің ашылуына көрсеткен қолдауын айтсақ болады.
Мұнан бөлек осы мектепке музыкалық құрылғы және өзі оқыған №14 мектеп-лицейіне 8 интерактивті тақта, 2 кеңсеге орындығымен 30 парта және музыкалық құрылығы алып беріп, қайырымдылықтың айрықша үлгісін көрсеткенін бірі білсе, бірі білмес.
Бүгін жұртшылық куә болған жаңа футбол алаңы жас спортшылардың жетістіктерін еселеп, болашақ чемпиондардың қалыптасуына қызмет етеді деп сенеміз.
Облыс әкімі Мұрат Ергешбаев, облыстық мәслихат төрағасы Мұрат Тлеумбетов және ел ағалары Арал қаласында салынып жатқан жаңа теміржол вокзалының құрылыс алаңына барды.
Мемлекет басшысының тапсырмасымен жаңғыртудан өтіп жатқан еліміздегі 124 вокзалдың қатарында Қызылорда облысының барлық аудан орталықтарындағы және Төретам, Сексеуіл станцияларындағы вокзалдар, Жаңақорған ауданындағы Талап бекетінің платформасы бар. Былтыр сол кезде аймақты басқарған Нұрлыбек Машбекұлы бұл тізімге облыстағы барлық вокзалды енгізу үшін тиісті мекемелерге нақты ұсыныстар беріп, ескі ғимараттардың уақыт күттірмей жаңғыртылу керектігін дәлелдеді. Өйткені өңірдегі вокзалдардың ең ескілерінің салынғанына бір ғасырдан астам уақыт болған.
«Арал теңізі» теміржол вокзалының құрылысы өткен жылы басталып, жобаға 1,5 млрд теңге қаржы бөлінді. Құрылыстың бас мердігері – «Техоснастка-Ремсервис» ЖШС. Жаңа ғимараттың жалпы ауданы 459,47 шаршы метр, ал биіктігі 4,2 метр.
Қазір мұнда металл конструкцияларын монтаждау, ішкі бөлігін сылау және әрлеу, сыртқы қасбетін қаптау жұмыстары жүргізілуде. Құрылыс алаңында 25 жұмысшы еңбек етеді.
Жаңа теміржол вокзалы аудан тұрғындары мен жолаушыларға сапалы, қолайлы қызмет көрсететін, Арал қаласының сәулеттік келбетін айшықтайтын көрікті ғимараттың біріне айналмақ.
Нысанды аралаған кезде облыс әкімі жауапты сала басшылары мен мердігер мекеме өкілдеріне құрылыс сапасына қатысты міндеттер жүктеп, жұмысты белгіленген мерзімде аяқтауды, уақытылы пайдалануға беруді ескертті.
Аудан әкімі Аманжол Оңғарбаев қаладағы бірқатар әлеуметтік нысандарды аралап, құрылыс жұмыстарының барысымен танысты.
Алдымен аудан басшысы темір жол вокзалы ғимаратындағы құрылыс жұмыстарын көрді. Нысан басында мердігер мекеме өкілдерімен кездесіп, жолаушыларға қызмет көрсететін темір жол вокзалының талапқа сай әрі сапалы салынуы қажет екенін атап өтті. Сондай-ақ құрылыс барысында салғырттыққа жол бермей, әрбір жұмысты сапалы аяқтауды тапсырды.
Қала орталығындағы Ә.Қаюпов көшесі бойында орналасқан ескі темір жол желісін алу жұмыстары да жүргізілуде. Көпшілік тарапынан ұзақ жылдар бойы көтеріліп келген мәселе енді шешімін табуда. Жоба аясында ескі темір жол алынып, аумағы тегістеліп, ретке келтіріледі.
Аудан әкімі аталған жұмыстармен танысып, жобаның мүмкіндіктері әлі де пысықталатынын жеткізді. Қазіргі кезеңде ескі темір жол материалдарын мұқият жинап, аумақты тегістеу жұмыстарын сапалы жүргізуді тапсырды.
Аталған көшенің автомобиль жолына қатысты жоба-сметалық құжаттама әзірленіп, бюджеттен қаржы күтілуде. Қаржы бөлінген жағдайда тұрғындарға арналған аллеялар мен скверлер салу жоспарланып отыр.
Одан әрі аудан басшысы қала орталығындағы Тәуелсіздік алаңында болды. Қазіргі уақытта алаң аумағында тұзды сор белгілері жиі байқалуда. Қала әкімдігі бұл аумақты қайта абаттандырып, брусчатка төсеуді жоспарлауда. Сонымен қатар көрнекті тұлғаларға арналған ескерткіш-монументті жөндеу жұмыстары да қарастырылған.
Жауапты мамандар аудан әкіміне аумақтың эскиздік жобасын таныстырып, қайта жаңғырту бойынша ұсыныстарын жеткізді. Аудан әкімі ұсыныстарды пысықтап, қаржының мүмкіндігіне қарай тиісті жұмыстар кезең-кезеңімен жүзеге асырылатынын айтты.
Қазіргі таңда Бақтыбай батыр көшесін қайта жаңғырту жұмыстары жалғасуда. Арал қаласы, Бақтыбай батыр көшесінің автомобиль жолын қайта жаңғырту жұмыстары барысында автожолдың 1,7 шақырымына асфальт жабындысы төселінді. Осы жоба аясында абаттандыру жұмыстары бойынша Ж.Әлімбетов, І.Жүсіпов көшелерімен және Жетес би көшесінің қиылысына бағдаршамдар орнатылып, іске қосылды. Енді кезекте Әбілхайыр хан және Бақтыбай батыр, Бақтыбай батыр және Ә.Қаюпов көшелерінің қиылысына бағдаршам орнату жұмыстары жүргізілетін болады.
Бұдан бөлек, қазіргі таңда жоба-сметалық құжаттамада жалпы 6717 шаршы метр болатын жаяу жүргіншілер жолының 2475 шаршы метріне бурсчатка төселініп жұмыстар жалғасын табуда.
Сонымен бірге жаңадан орнатылатын 67 дана түнгі жарық шамдарының тірек бағаналарының 42 дана демонтаждалып жұмыстар жүргізілуде. Мұнан бөлек жобада тынығу аялдамалары мен мүмкіндігі шектеулі азаматтар үшін түрлі жағдай қарастырылмақ. Көше келбетін ретке келтіру бағытында көпқабатты тұрғын үйлердің қасбеттерін қаптау жұмыстары да жүргізілуде.
Аудан әкімі мердігер мекеме өкілдерімен кездесіп, барлық жұмысты сапалы әрі белгіленген мерзімде аяқтауды тапсырды.
26 наурыз- Арал теңізі күніне орай Ж. Әбдірашев атындағы №62 мектеп-лицейінде «Жасыл әлем – ұрпаққа сый» атты экологиялық акция ұйымдастырылды.
Экологиялық акцияға Халықаралық Аралды құтқару қорының Қазақстан Республикасындағы атқарушы директоры С. Мұқатаев, ЮНЕСКО сарапшысы Алиреза Амриказеми,– ЮНЕСКО-ның Қазақстандағы үйлестірушісі С.Нигматова,– Аралды құтқару қорының өкілі М.Бекниязов,– Қарақалпақстан елінен келген қор өкілі Р.Шарапова,– «Арал» геопаркі директоры С. Темірбек және басқа да сала мамандары болды.
Шара барысында аудан әкімінің орынбасары Н. Бохаев сөз алып, табиғатты қорғау мен өңір экологиясын жақсарту бағытындағы жұмыстарға тоқталды.