Бүгінгі күні Комитет 905 тексеру жүргізіп, олардың аясында жалпы сомасы 2 трлн теңгеден асатын бюджет қаражаты қамтылды. Тексерулер барысында 348,3 млрд теңгеге қаржылық бұзушылықтар анықталды.
Анықталған бұзушылықтардың 310,4 млрд теңгесі немесе жалпы соманың 89,1%-ы қалпына келтірілді.
Мемлекеттік сатып алулардың ашықтығы – бюджет қаражатын тиімді пайдалануға және сыбайлас жемқорлықтың алдын алуға көмектесетін негізгі қағидаттардың бірі. Осыған байланысты камералды бақылау арқылы 12,4 трлн теңгеге жүргізілген сатып алулар тексеріліп, нәтижесінде 1,2 трлн теңге көлеміндегі бұзушылықтардың жолы анықталды.Сонымен қатар, 28 жағдайда шығын операцияларын тоқтату бойынша қаржылық әрекет ету шаралары қабылданды.
Құқық қорғау органдарына жалпы 13,0 млрд теңгеге 62 материал жолданып, олардың 42-сі бойынша қылмыстық істер қозғалды, 854 лауазымды тұлға тәртіптік жауапқа тартылды, 717,3 млн теңге сомаға 6 мыңнан астам әкімшілік іс қозғалды.
«Онлайн бюджет мониторингі» модулі аясында әзірленген тәуекел критерийлері бойынша білім беру, денсаулық сақтау, мәдениет, туризм және спорт салаларында жалақы түріндегі жеке тұлғалардың карт-шоттарына заңсыз төлемдердің 139 375 жағдайы анықталды.
Мониторинг объектілеріне 72 млрд теңгеге төлемдерді қайта қарау талабымен хабарламалар жіберілді.
Бүгінгі таңда 1 377,8 млн тенге расталып, бюджетке 871,5 млн теңге өтелді.