Көрінбейтін миллиондық аялдамалар
Бұл жолы мемлекеттік аудиттің назарында — Жезқазған қаласының жолаушылар көлігі және автомобиль жолдары бөлімі. Аудит нәтижелері қоғамда алаңдаушылық туғызып отыр: қағаз жүзінде орындалған жұмысқа миллиондаған теңге бөлінген, ал шын мәнінде – ештеңе салынбаған.
Аудиторлардың мәліметінше, қала көшелеріне 39 автобус аялдамасын орнату туралы келісімшарт аясында бөлім мамандары өрескел заңбұзушылықтарға жол берген. Есептерде аяқталған деп көрсетілген жұмыстар нақты орындалмаған. Басқаша айтқанда, аялдамалар тек есеп беруде ғана «орнатылған», ал мемлекеттік қазынадан қомақты қаржы шығындалған.
Сандарға көз жүгіртейік:
— 2,7 млн теңге — мүлдем орнатылмаған аялдамаларға төленген;
— 4,9 млн теңге — негізсіз «күтпеген шығындар» мен атқарылмаған жұмыстарға кеткен;
— 6,7 млн теңге — уақытша ғимараттар мен құрылымдарға жұмсалған, бірақ олардың нақты бар-жоғы белгісіз.
Жалпы шығын көлемі — 14,4 млн теңге. Бұл қаржыға аялдамалар толықтай орнатылып қана қоймай, қаладағы қоғамдық көлік инфрақұрылымының бір бөлігі жаңартылар еді. Ал әзірге жезқазғандықтар жаздың аптабында да, қыстың аязы мен боранында да аялдамасыз тұр.
Аудит қорытындысы бойынша қаржылық заңбұзушылықтарды жою және бюджетке шығынды өтеу туралы нұсқама берілген. Бұл нұсқаманың орындалу мерзімі әлі келмеген.
Бұл оқиға — жай ғана салақтық не жемқорлық жайлы кезекті әңгіме емес. Бұл — халықтың жергілікті билікке деген сеніміне соққы және қарапайым халықтың игілігі үшін бөлінген қаражаттың қалайша ізім-ғайым жоғалатынының айқын көрінісі.