Комитет әлемдегі инфекциялық аурулардың, оның ішінде маймыл шешегінің эпидемиологиялық жағдайына тұрақты мониторинг жүргізуде.
Әлемнің жекелеген елдерінде ауру жағдайларының тіркелуіне және халықаралық көлік қатынастарының белсенділігін ескере отырып, инфекцияның Қазақстан аумағына әкеліну ықтималдығы жоққа шығарылмайды. Сонымен қатар қоздырғыштың берілу ерекшеліктерін ескере отырып, ел халқы арасында маймыл шешегінің кеңінен таралу қаупі төмен деп бағаланады.
Инфекцияның елге әкелінуі мен таралуының алдын алу мақсатында Қазақстан Республикасы Бас мемлекеттік санитариялық дәрігерінің 2024 жылғы 26 тамыздағы № 8 қаулысына сәйкес санитариялық-профилактикалық және эпидемияға қарсы іс-шаралар кешені жүргізілуде.
Атап айтқанда:
* мемлекеттік шекара арқылы өткізу пункттеріндегі санитариялық-карантиндік бақылау күшейтілді;
* ауру жағдайлары тіркелген елдердегі эпидемиологиялық жағдайға және осы мемлекеттерден келген азаматтарға мониторинг жүргізілуде;
* барлық өткізу пункттері мен санитариялық-карантиндік пункттер дене температурасын жанаспай өлшейтін құралдармен жабдықталған;
* медициналық ұйымдар мен зертханалардың инфекцияны уақтылы анықтауға және диагностикалауға дайындығы қамтамасыз етілуде;
* аса қауіпті инфекцияға күдік туындаған жағдайда хабарлау және ведомствоаралық өзара іс-қимыл жасау алгоритмдері бекітіліп, қолданысқа енгізілген.
Эпидемиологиялық жағдайға қатысты ерекше назар аударуды қажет ететін елдердің тізбесі әлемдегі ахуалдың өзгеруіне қарай тұрақты түрде жаңартылып отырады. Көліктің барлық түрінде жүргізілген санитариялық-карантиндік бақылау нәтижелері бойынша аса қауіпті инфекциялармен ауырған немесе оларға күдік тудыратын адамдар анықталған жоқ.
Комитет эпидемиологиялық жағдайға мониторинг жүргізуді жалғастырып, халықтың денсаулығын сақтау және елдегі санитариялық-эпидемиологиялық саламаттылықты қамтамасыз ету үшін қажетті шараларды қабылдауда.
Комитет халықты суши мен роллдарды тұтыну кезінде сақтық шараларын сақтауға және оларды дайындайтын әрі сататын орындарды таңдауға жауапкершілікпен қарауға шақырады.
Суши мен роллдар тағам қауіпсіздігі тұрғысынан ерекше назар аударуды қажет етеді. Оларды дайындау кезінде шикі, аз тұздалған немесе маринадталған балық, теңіз өнімдері және тез бұзылатын басқа да ингредиенттер пайдаланылуы мүмкін. Бұл өнімдер әрдайым толық термиялық өңдеуден өтпейді.
Дайындау, тасымалдау және сақтау технологиялары бұзылған жағдайда мұндай өнімдер тағамнан улануға, жіті ішек инфекцияларына және паразиттік ауруларға себеп болуы мүмкін.
Тағамнан улану мен жұқпалы аурулардың алдын алу үшін тұтынушыларға суши мен роллдарды қауіпсіздік талаптарын сақтайтын, ресми тіркелген қоғамдық тамақтану және сауда нысандарынан ғана сатып алу ұсынылады. Өнімдерді рұқсат етілмеген сауда орындарынан және белгісіз сатушылардан сатып алуға болмайды.
Өнімді таңдаған кезде оның сақтау жағдайларына, сыртқы түрі мен иісіне назар аудару қажет. Бұзылу белгілері байқалған суши мен роллдарды тұтынуға болмайды.
Балаларға, жүкті әйелдерге, егде жастағы адамдарға және иммунитеті әлсіреген адамдарға ерекше сақтық таныту ұсынылады, өйткені бұл санаттағы адамдарда тағамдық инфекциялар денсаулыққа неғұрлым ауыр зардаптар әкелуі мүмкін.
Комитет азаматтарды тағам қауіпсіздігі қағидаларын сақтауға, суши мен роллдарды сатып алатын орындарды таңдауға жауапкершілікпен қарауға және өз денсаулығы мен жақындарының денсаулығын қорғау шараларын қабылдауға шақырады.
15 қазанда бүкіл әлем Дүниежүзілік таза қол күнін атап өтті.Бұл күн 2008 жылы белгіленген және жыл сайын ең қарапайым әдеттердің бірі көптеген аурулардан қорғай алатынын еске салады.
Санитарлық-эпидемиологиялық бақылау комитеті еске салады: қолды сабынмен жуу жұқпалы аурулардың алдын алудың ең қолжетімді және тиімді тәсілдерінің бірі болып қала береді. Дүниежүзілік денсаулық сақтау ұйымының (ДДСҰ) деректері бойынша, қолды үнемі жуу ішек аурулары қаупін шамамен 30%-ға, ал жедел респираторлық инфекциялар қаупін шамамен 20%-ға азайтады. Таза қол адамның өзін ғана емес, оның отбасын, әріптестерін, балаларды және егде жастағы адамдарды да қорғайды.
Біз қолды тамақтанар алдында және тамақ дайындау алдында, дәретханаға барғаннан кейін, көшеден және қоғамдық көліктен кейін, жануарлармен жанасқаннан кейін, сондай-ақ түшкіргеннен, жөтелгеннен және мұрынды сіңбегеннен кейін жууды ұсынамыз. Сондай-ақ науқасқа күтім жасаудан бұрын және кейін, беттің, көздің және ауыздың жанына қол тигізер алдында да қолды жуу маңызды.
Қолды кемінде 40-60 секунд жуу керек, қолдың сыртқы беттері мен саусақ аралықтарын ұмытпаған жөн. Одан кейін сабынды ағын сумен мұқият шайып, қолды таза сүлгімен немесе бір реттік майлықпен сүрту керек. Егер су мен сабын болмаса, құрамында кемінде 60% спирті бар спирттік антисептикті қолдануға болады, оны теріге 20-30 секунд ысқылау керек.
Бүгін Астанада тұмауға ұқсас аурулары (ТҰА) және ауыр жіті респираторлық инфекциялары (АЖРИ) бар пациенттер анықталған жағдайда медициналық ұйымдардың іс-қимылдарын пысықтау бойынша оқу-жаттығу өтті.
Оқу-жаттығудың мақсаты – медициналық ұйымдардың пациенттерді уақтылы анықтауға, медициналық көмек көрсетуге, оларды тиісті медициналық ұйымдарға дұрыс бағыттауға және зертханалық қызметпен өзара іс-қимыл жасауға дайындығын бағалау.
№ 5 қалалық емханада жіті респираторлық вирустық инфекция белгілері бар пациенттердің жүгіну санының артуы модельденді. Медициналық қызметкерлер пациенттерді бастапқы қабылдау және сұрыптау, келушілер ағындарын бөлу, медициналық тексеру жүргізу, мәліметтерді медициналық ақпараттық жүйеге енгізу, сондай-ақ тұмау мен COVID-19-ға зертханалық зерттеулер жүргізу үшін биологиялық материал алу тәртібін пысықтады.
Қалалық инфекциялық орталықта ауыр респираторлық инфекция белгілері бар шартты пациенттерді қабылдау сценарийі пысықталды. Жедел медициналық жәрдем бригадалары пациенттердің жағдайын бағалау, ауруханаға дейінгі кезеңде көмек көрсету, оларды тасымалдау және қабылдаушы стационарға медициналық ақпаратты беру тәртібін пысықтады.
Пациенттер жаппай түскен жағдайда медициналық сұрыптау жүргізуге, оларды қолда бар төсек-орын қорына сәйкес орналастыруға және қажет болған кезде қосымша инфекциялық төсектерді жедел ашуға дайындыққа ерекше назар аударылды. Оқу-жаттығу сценарийі бойынша екі сағат ішінде стационарға ТҰА және АЖРИ белгілері бар 30-ға дейін шартты пациенттің түсуі көзделді.
Сондай-ақ жедел медициналық жәрдем, емхана, стационар және вирусологиялық зертхана арасындағы өзара іс-қимыл, санитариялық-эпидемияға қарсы режимді сақтау және медицина қызметкерлерін жеке қорғаныш құралдарымен қамтамасыз ету мәселелері пысықталды.
Оқу-жаттығу қорытындысы бойынша қатысушылардың іс-қимылдары талданып, ықтимал ұйымдастырушылық кемшіліктер анықталып, оларды жою жөніндегі түзету шаралары әзірленеді. Бұл медициналық ұйымдардың респираторлық инфекциялар бойынша маусымдық сырқаттанушылықтың өсуіне дайындығын арттыруға және халыққа медициналық көмектің уақтылы көрсетілуін қамтамасыз етуге мүмкіндік береді.