Меню
Жалпыға бірдей декларациялауды енгізу негіздерінің бірі ел азаматтары мен мемлекеттік аппарат арасындағы диалогтың заманауи түрін қамтамасыз ету үшін тұрғындардың декларация тапсыру механизмін енгізу болып табылады.
Мемлекет декларацияларды алынған кірістер және әлеуметтік шығыстар бойынша қолданылатын салық шегерімдері туралы ақпарат көзі ретінде пайдалана отырып:
- осы мәліметтерді талдайды;
- ел халқының қазіргі жағдайының егжей-тегжейлі көрінісін көреді;
- халықтың әлеуметтік осал топтарын айқындайды;
- мемлекеттік қолдау саясатын салмақтап құрады және түзетеді.
2025 жылғы 1 қаңтардан бастап жаппай декларациялаудың төртінші кезеңіне жататын халықтың қалған санаттары – зейнеткерлер, жеке сектор қызметкерлері, студенттер, үй шаруасындағы әйелдер және басқа да тұлғалар – міндетті декларациялаудан босатылады.
Бұл ретте шетелде мүлкі бар тұлғалар және мемлекеттік қызметшілер мен оларға теңестірілген тұлғалардың жұбайлары сияқты азаматтар бұл жеңілдіктен тыс қалды.
2025 жылғы 1 қаңтардан бастап активтер мен міндеттемелер туралы декларацияны келесі санаттағы тұлғалар тапсырады:
- Сайланбалы және мемлекеттік лауазымдарға кандидаттар, сондай-ақ олардың жұбайлары;
- Банктердің, бағалы қағаздар нарығы мен сақтандыру ұйымдарының ірі қатысушысы мәртебесін алуға үміткер тұлғалар және олардың жұбайлары;
- Жеке практикамен айналысатын тұлғалар (нотариустар, адвокаттар, жеке сот орындаушылары, медиаторлар);
- Цифрлық активтері бар Қазақстан Республикасының азаматтары мен резиденттері;
- Шетелде мүлкі бар Қазақстан Республикасының азаматтары мен резиденттері, оның ішінде:
жылжымайтын мүлік, көлік құралдары, жер учаскелері;
шетелдік банктердегі шоттардағы ақшалай қаражат, егер олардың жиынтық сомасы 1 000 АЕК-тен асатын болса (2024 жылы 1 АЕК – 3 692 теңге, 1 000 × 3 692 = 3 692 000 теңге);
инвестициялық алтын;
шетелдік компаниялардағы қатысу үлесі;
тұрғын үй құрылысына қатысу үлесі;
шетелде тіркелген эмитенттердің бағалы қағаздары мен туынды қаржы құралдары;
шетелдік брокерлік шоттардағы ақша қаражаты;
зияткерлік меншік, авторлық құқық объектілері;
жеке тұлғаның алдында немесе жеке тұлғаның басқа тұлғалар алдындағы дебиторлық/кредиторлық берешегі (растаушы құжаттар болған жағдайда);
өз қалауы бойынша – бағалау құны 1 000 АЕК-тен асатын өзге де мүлік.
- Мемлекеттік қызметшілер мен оларға теңестірілген тұлғалар, сондай-ақ олардың жұбайлары;
- Банктердің, бағалы қағаздар нарығы мен сақтандыру ұйымдарының ірі қатысушылары, сондай-ақ олардың жұбайлары;
- Квазимемлекеттік сектор субъектілерінің, заңды тұлғалардың басшылары, құрылтайшылары (қатысушылары), сондай-ақ жарғылық капиталында (акционерлік қоғамдардың акцияларында) 10%-дан астам үлесі бар тұлғалар және олардың жұбайлары;
- Жеке практикамен айналысатын тұлғалар (нотариустар, адвокаттар, жеке сот орындаушылары, медиаторлар);
- Өзі дербес салық төлеуге жататын табыс алған тұлғалар (мүлікті жалға беруден түскен табыс; шетелдік банктік шоттардағы сыйақылар; цифрлық активтермен жасалған операциялардан түскен табыстар; төлем көзінен салық ұсталмаған өзге де табыстар), дара кәсіпкердің табысынан басқа;
- Шетелдік банктердегі шоттарында жиынтық сомасы 1 000 АЕК-тен асатын ақша қаражаты бар тұлғалар;
- Шетелде активтері бар тұлғалар (жылжымайтын мүлік, көлік құралдары, бағалы қағаздар, туынды қаржы құралдары, инвестициялық алтын, шетелдік компаниялардағы үлестер, тұрғын үй құрылысына қатысу үлестері);
- Цифрлық активтерге иелік ететін тұлғалар;
- Салықтық есепті кезең ішінде жиынтық құны 20 000 АЕК-тен асатын мүлікті сатып алған тұлғалар (мысалы: 2025 жылы 1 АЕК = 3 932 теңге, 20 000 × 3 932 = 78 640 000 теңге), оның ішінде Қазақстан Республикасынан тыс жерде де;
- Салық агентіне басқа шегерімдердің алдын ала сомасы түріндегі салықтық шегерімдерді қолдану туралы өтініш берген тұлғалар.