1946 жылы 6 шілдеде Батыс Қазақстан облысы Казталовка ауданы Бостандық ауылдық советінде дүниеге келген. 1953 жылы Қоныс бастауыш мектебінің бірінші сыныбына барған. Оқуын аудан орталығындағы Алма Оразбаева атындағы орта мектебінде жалғастырып, осы мектептің он бірінші сыныбын 1964 жылы бітірген. Білімі жоғары, 1969 жылы А.С.Пушкин атындағы Орал педагогикалық институтын, 1979 жылы Батыс Қазақстан ауылшаруашылық институтын тәмәмдаған, мамандығы – физика және жалпы техникалық білім беру пәндерінің оқытушысы, ауылшаруашылық өндірісінің экономист-ұйымдастырушысы.
1969 жылдың тамыз-желтоқсан айларында Бостандық орта мектебінде физика, математика пәндерінің оқытушысы, 1969-1975 жылдары Казталовка аудандық комсомол комитетінің мектеп бөлімінің меңгерушісі, аудандық комсомол комитетінің хатшысы, 1975-1977 жылдары аудандық партия комитеті ұйымдастыру бөлімінің нұсқаушысы, 1977-1985 жылдары насихат және үгіт бөлімінің меңгерушісі, 1985-1989 жылдары «Қошанкөл» совхозы партия комитетінің хатшысы, 1989 жылдың желтоқсан айынан СССР-дың 60 жылдығы атындағы совхоз директоры қызметтерін атқарған.
Оның шаруашылық басқарған кезеңінде жоғары экономикалық рентабельділікке қол жеткізіліп, совхоз орталығында жаңа үлгідегі 420 орындық орта мектеп, кулинария цехы, жылытылған автотұрақ ғимараттары, көптеген тұрғын үйлер және мал орындары салынып, пайдалануға берілді. Қараоба және Қонысбай ауылдарына 12 шақырым жерден жер асты су көзінен тұщы су құбыры тартылып, ауыл көшелеріне су колонкалары орнатылды. Қараоба ауылының көшелеріне сырттан топырақ тасылып, ауылішілік автомобиль жолдары көтерілді. Орта мектептің материалдық-техникалық базасы нығайтылып, аудан тарихындағы тұңғыш мектеп-гимназияға айналуына жағдай жасалды.
Казталов аудандық мәслихатының 2022 жылғы 25 қарашадағы №24-2 шешімімен «Ауданның құрметті азаматы» атағы берілді.