1952 жылы 2 шілдеде дүниеге келген, 1969 жылы Орал облысы Казталовка ауданы орталығындағы Алма Оразбаева атындағы орта мектебін бітірген. Білімі жоғары, Ресей Федерациясының Саратов механизация институтын тәмәмдаған, мамандығы – инженер-механик.
Алғашқы еңбек жолын 1969 жылы Казталов ауданы «Бостандық» совхозында слесарь болып бастады. Жоғарғы оқу орнын бітірген соң, 1975-1985 жылдары «Қошанкөл» совхозында МТМ меңгерушісі, «Казталовка» совхозында бас инженер, 1985-1996 жылдары «Қошанкөл» совхозының директоры, 1996-1998 жылдары Орал қаласындағы «Батысгазстрой» АҚ бас механик, «Казахинтергаз» АҚ президенті қызметтерін атқарған. 1998 жылдан Орал құю механикалық зауытының директоры қызметінде, жалпы еңбек өтілі 53 жылды құрайды.
Ол «Қошанкөл» совхозын басқарған тұста (1989 ж.) шаруашылық тәсілмен 45 шақырымдық полиэтилен құбырын тартып, ауыл тұрғындарының толықтай табиғи газбен қамтылуын қамтамасыз жасады. Сондай-ақ, банкроттық жағдайдағы Орал құю механикалық зауыты қызметін қабылдап, өндіріске жаңа технологияларды енгізу, қазіргі заман талабына сай ұйымдастыру нәтижесінде зауыттың тұрақты жұмыс жасауына қол жеткізді. Зауыт өндірісіне өнімнің сапасын жогарылататын «ХТС» технологиясы енгізіліп, «индукциялық құю» пештері орнатылды. Сонымен қатар, мұнай-газ саласында қолданылатын жаңа құрылғы өндірісі іске қосылды және құбыр ию құрылғылары алынып, қолданысқа берілді.
Казталов аудандық мәслихатының 2022 жылғы 25 қарашадағы №24-2 шешімімен «Ауданның құрметті азаматы» атағы берілді.