БҚО- ДА МӘСЛИХАТ ДЕПУТАТТАРЫНЫҢ КЕЗЕКТЕН ТЫС САЙЛАУЫН ҰЙЫМДАСТЫРУ ЖҰМЫСТАРЫ БАСТАЛДЫ

Бүгін БҚО аумақтық сайлау комиссиясының алғашқы отырысы өтті. Жиында 2026 жылдың 29 қарашасына тағайындалған барлық деңгейдегі Қазақстан Республикасы мәслихаттары депутаттарының кезектен тыс сайлауын ұйымдастыру және өткізу мәселелері қаралды. Отырысқа БҚО аумақтық сайлау комиссиясының мүшелері, облыстық округтік сайлау комиссияларының төрағалары және бұқаралық ақпарат құралдарының өкілдері қатысты.

Сайлау науқанының негізгі кезеңдері мен мерзімдері:

Орталық сайлау комиссиясының 2026 жылғы 13 қазандағы №60/98 қаулысымен бекітілген үлгі күнтізбелік жоспарына сәйкес, БҚО аумақтық сайлау комиссиясының хатшысы Жасұлан Нұрғожин негізгі іс-шаралар кестесін таныстырды:

• Кандидаттарды ұсыну: 14 қазанда басталып, 27 қазан күні сағат 18:00-ге дейін жалғасады.
• Тіркеу кезеңі: Партиялық тізімдер мен кандидаттарды тіркеу жұмыстары 1 қараша күні сағат 18:00-де аяқталады.
• Сайлау алдындағы үгіт: 1 қараша күні сағат 18:00-де басталып, 28 қараша күні сағат 00:00-ге дейін жүргізіледі.
• Тыныштық күні: 28 қараша.
• Дауыс беру күні: 29 қараша күні сайлау учаскелері сағат 07:00-ден 20:00-ге дейін сайлаушыларды қабылдайды.
• Қорытынды шығару: Сайлау нәтижелері дауыс беру күнінен кейін бес күндік мерзімде белгіленеді.

Отырыста БҚО аумақтық сайлау комиссиясы төрағасының орынбасары Арман Жиенғалиев өңірдегі сайлау инфрақұрылымы мен дайындық барысы туралы баяндады. Облыс бойынша сайлауды өткізу міндеті құрамында 4 079 мүшесі бар 673 комиссияға жүктеліп отыр. Олардың қатарында:

• 14 аумақтық сайлау комиссиясы;
• 488 учаскелік сайлау комиссиясы;
• 158 аудандық және қалалық мәслихат депутаттарын сайлау жөніндегі бірмандаттық округтік комиссия;
• 15 облыстық мәслихат депутаттарын сайлау жөніндегі бірмандаттық округтік комиссия бар. Маңызды ескерту: бірмандаттық сайлау округтерінің шекаралары әкімшілік-аумақтық бөлініспен тұспа-тұс келуіне байланысты, Бәйтерек және Теректі аумақтық сайлау комиссиялары округтік сайлау комиссияларының өкілеттіктерін қоса атқарады.

       Сайлау инфрақұрылымы, комиссиялардың құрамы мен округтердің тізімдері туралы барлық міндетті ақпараттар ресми интернет-ресурстар мен мерзімді басылымдарда заңмен бекітілген мерзімде жарияланады. БҚО аумақтық сайлау комиссиясының төрағасы Әділ Жоламанов сайлау науқанының әрбір кезеңі қолданыстағы заңнама талаптарына сай, жоғары деңгейде әрі сапалы орындалуы тиіс екенін қадап айтты. Ол әріптестерінің назарын азаматтардың сайлау құқықтарын толық көлемде қамтамасыз етуге аударды. Отырыс барысында сайлау комиссияларының арнайы жұмыс кестесі бекітілді.

#мәслихатсайлау2026 #бқосайлау #выборызко #выборыдепутатов