Облыстық отбасы үлгісіндегі балалар ауылында дәстүрлі өнерді дәріптеп, жас ұрпақтың ұлттық құндылықтарға деген қызығушылығын арттыру мақсатында Домбыра сыныбы ашылды.
Шараға қатысқан Орал қаласының әкімі Мұрат Байменов жас домбырашыларға сәттілік тілеп, «Қасиетті домбыра — халқымыздың рухани байлығы, оны қастерлеп, келер ұрпаққа аманаттау — әр қазақтың парызы» екенін атап өтті. Сондай-ақ, жаңа ашылған домбыра сыныбына домбыра аспабын сыйға тартты.
Іс-шара барысында балалар ұлттық ән-күйлерді орындап, өнерлерін ортаға салды. Ал соңында, қала басшысы 9-сынып бітіруші тәрбиеленушілермен бірге «Түлектер аллеясына» жеміс ағаштарын отырғызды.
Бұл игі бастама – ұлттық өнерге деген сүйіспеншілікті арттырып, балалардың жүрегіне рухани тәрбие дәнін себудің жарқын үлгісі!