Өңірде кәмелетке толмағандардың істері және олардың құқықтарын қорғау жөніндегі облыстық комиссия төрағасы Қ.Е.Мендіғалиевтің тапсырмасы бойынша құрылған ведомствоаралық мониторингтік топтардың жұмысы жалғасуда.
Олардың мақсаты - кәмелетке толмағандардың істері және олардың құқықтарын қорғау жөніндегі аудандық (қалалық) комиссиялардың, жауапты мемлекеттік органдардың, білім беру мекемелерінің балалар суицидінің алдын алу жөніндегі жұмысын зерделеу.
Қазіргі уақытта әрбір аудан және Орал қаласы бойынша жұмыстар атқарылуда. Мониторингтік топ құрамында облыстық кәмелетке толмағандар ісі жөніндегі комиссия мүшелері, БҚ облыстық әдістемелік психологиялық қолдау орталығының қызметкерлері, суицидологтар және басқа да мүдделі тұлғалар бар. Топ жұмысының қорытындысы ағымдағы жылдың сәуір айында Батыс Қазақстан облысы әкімдігі жанындағы комиссияның кеңейтілген отырысында талқыланады.