Батыс Қазақстан облысының әкімдігінде кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті. Балалардың қауіпсіздігін қамтамасыз ету, жасөспірімдердің суицидтік әрекеттерінің алдын алу мәселелері талқыланды. Отырысқа облыстық комиссия мүшелерімен бірге жергілікті жерлерде комиссия төрағалары болып табылатын аудандар мен Орал қаласы әкімдерінің орынбасарлары қатысты. Жиналғандар балалардың өмірі мен денсаулығына қауіпті жағдайлардың алдын алу мен бұғаттаудың кешенді шараларын күшейтуге баса назар аударды.